Matalikilo 31 - Baibo Busansulushi Bwa Libuku Ili

Jakobo mbwaakacicaako kuli Labani

¹ Jakobo wakanyumfwa kwaamba ayi bana bakwe Labani basankwa batokwaamba ayi, “Jakobo wabwesa shintu shoonse shalinga kucite baishiwesu. Buboni bwakwe boonse bwaswa kushintu sha baishiwesu.”

² Alimwi wakabona kwaamba ayi Labani wakatalika kumushinamina ubo buteshi mbwaakalinga pakataanshi,

³ Lyalo Mwaami Lesa wakamwaambila ayi, “Koya kucishi ca bamashali bako bakulukulu, kubeshikamukowa bako. Nebo ndanooli awebo.”

⁴ Paceebo ceeco Jakobo wakatuma nkombe kuli Lakelo aLeya ayi bese bakumane mumuunda umo mbelele ampongo moshakalinga kubete.

⁵ Mpeeke wakabaambila ayi, “Ndaboona kwaamba ayi baishiwanu batalika kunshinamina ubo buteshi mbobakalinga pakataanshi. Nacibi boobo Lesa wa bata walinga anebo.

⁶ Noonse nobilo mulishi kwaamba ayi ndakalinga kusebensela baishiwanu ankusu shoonse.

⁷ Ono bakancenjeeka akusandula malipilo angu mankanda likumi. Sombi Lesa taakwe kubasuminisha ayi banciise.

⁸ BaLabani balinga kucita na baamba ayi, ‘Malipilo ako alaakuba mpongo sha cisekeleli,’ litanga lyoonse lyakalinga kushalabo twaana twa cisekeleli. Na bapilula akwaamba ayi, ‘Malipilo ako ono nimpongo shamyuubimyuubi,’ litanga lyoonse lyakalinga kushalabo twaana twa myuubimyuubi.

⁹ Lesa mwiine ngwanyaya mbelele ampongo baishiwanu akupa ndime.

¹⁰ “Muciindi cakushalana ndakalota, ndakabona ayi bapeepe bakalinga kutanta bakalinga bamyuubimyuubi, bamabalamabala, alimwi abacisekeleli.

¹¹ Munjelo wakwe Lesa wakabandika anebo muciloto akwaamba ayi, ‘Jakobo!’ Lyalo ndakakumbula ayi, ‘Nkambo.’

¹² Wakatolelela ayi, ‘Bona, bapeepe boonse batootanta mbamyuubimyuubi, mabalamabala, alimwi abacisekeleli. Ndime ntoolengesha ayi cicitike bobulya mukwiinga ndaboona shoonse Labani nshaatoocita kuli ndiwe.

¹³ Ndime Lesa uyo wakaboneka kuli ndiwe kuBetelo uko nkowakeemika libwe ayi cibe ciibalusho akulipuumwita mafuta a olifi. Alimwi nkokooko nkowakashomeshesha cakulumbila kuli ndime. Ono libambile kupiluka kucishi nkowakashalilwa.’ ”

¹⁴ Mpomunyaawo Lakelo aLeya bakakumbula Jakobo ayi, “Taaku cacaala bulya cakwaamba ayi tukabwese na bata bakafwe.

¹⁵ Batootucita anga mbaswamashi. Bakatuulisha, ono alimwi banyonyoola maali oonse ngobakalipilwa ceebo cesu.

¹⁶ Ncakwiila buboni boonse ubo Lesa mbwaanyaya bata mbwesu abana besu. Amucite cili coonse Lesa ncaamwaambila.”

¹⁷ Kuswawaawo Jakobo wakabika bana bakwe abamakaakwe pangamela.

¹⁸ Lyalo shifubwa shoonse wakashibingila kunembo. Wakabwesa ashintu shimwi shoonse nshaakalinga wabaasho uko kuMesopotamya, akuboolela kuli Isaki, ishi, kucishi ca Kenani.

¹⁹ Labani wakalinga waya mukucesa booya mbelele shakwe. Ono ciindi ico ceenka, Lakelo wakeepa balesa bakupanga ba baishi.

²⁰ Jakobo wakeenda Labani mwine Alamiya kumaano mukutamwishibisha ayi utooya lweendo.

²¹ Wakabwesa shintu shakwe shoonse akunyamuka calubilolubilo. Wakasotoka Mulonga wa Yufuletisi akululama kuGilyadi, cishi ca tulundu.

Labani mbwaakakonkela Jakobo

²² Ndipakeenda nshiku shotatwe, Labani wakalwiitwa ayi Jakobo wakaloboka.

²³ Wakabwesa bantu bakwe akukonkela Jakobo. Wakatola nsondo kaakonkelabo kushikila wamucana muGilyadi, cishi ca tulundu.

²⁴ Mashiku ayo Lesa wakaambila Labani muciloto ayi, “Cenjela kwaamba ayi utalengeshi boowa Jakobo munshila ili yoonse.”

²⁵ Labani ndyaakeensha Jakobo, Jakobo wakalinga wayaka misumba yakwe mutulundu, alakwe Labani wakayakila nkomunya uko mucishi ca tulundu ca Gilyadi pantu pomwi abeshikamukowa bakwe.

²⁶ Labani wakaambila Jakobo ayi, “Ino wanyindilanshi kumaano cakubwesa bana bangu anga mbantu bacatwa munkondo?

²⁷ Wayeeyanshi kukweshemukabo kutanshibisha? Niwakandwiita naakwiinga washindikilwa cakusangalala, kwiimba alimwi akulishilwa misebe atulumbu.

²⁸ Tookwe kumpa aciindi kwaamba ayi ndashe bashikulu bangu abana bangu calusuno. Tookwe kucitawo cintu ca maano!

²⁹ Ndicite nkusu shakukucisa, sombi Lesabo wa baiso ngowancenjesha mashiku ainda ayi ntakulengeshi boowa munshila ili yoonse.

³⁰ Ndishi kwaamba ayi wakanyamuka mukwiinga wakalinga kunyumfwite kalyokolyoko ka kuyanda kuboolela kumishaanu, ono wakeepilanshi balesa ba muŋanda yangu?”

³¹ Jakobo wakakumbula ayi, “Ndakaloonda, ceebo ndakalinga kuyeeya ayi mpashi mutoonyaya bana banu banakashi.

³² Nacibi boobo na mucane kwaamba ayi womwi pakati kesu ulicite balesa banu, uyo utoocaikwa. Ono pameenso abeshikamukowa besu, amulangoole na kuli cintu canu nceendi aco. Na mucicaane mubwese.” Jakobo taakalinga kwishi ayi Lakelo ngowakeepa balesa abo.

³³ Labani wakaya walangoola mumusumba wakwe Jakobo, kuswa moomo wakaya muli Leya, lyalo wakaya muwa balandakashi bobilo, sombi taakwe kucanaamo balesa bakwe. Mpeeke wakaya muli Lakelo.

³⁴ Ono Lakelo wakabwesa balesa abo akubabika mucakukalaawo pangamela lyalo wekalaawo. Labani wakalangoola moonse mumusumba, sombi taakwe kutucana.

³⁵ Mpomunyaawo Lakelo wakaambila baishi ayi, “Mutakalali nkambo, nshikoonshi kunyamuka kamuliiwo mukwiinga ndakubala.” Labani wakalangoola, sombi taakwe kucana balesa ba muŋanda yakwe.

³⁶ Lyalo Jakobo wakakalala. Mpeeke wakeepusha cabukali ayi, “Ncibiibinshi ncendacita? Ngumulawonshi ngondasotoka uyo wamupa nkusu shakunoosa cimfwima anga ngumunyama?

³⁷ Bulya ono mwalangoola mushintu shangu shoonse, cintunshi ca muŋanda ncemwacana caanu? Amucibiike patuba kwaamba ayi bantu banu abaangu baciboone alimwi baambe ulubite pali ndiswe sobilo.

³⁸ Ndekalaanu myaaka makumi obilo kushika sunu. Mbelele ampongo shanu teshakalinga kusansulaawo, alimwi nshikwe kulyaawo mbelele isankwa mulitanga lyanu.

³⁹ Na mbelele yacaikwa kubanyama ba muluundu, nshindakalinga kwiileta kuli ndimwe, sombi ndime ndakalinga kuba amulandu, alimwi mwakalinga kunyinshaamo keeteete kwaamba ayi ndipilile ili yoonse yeenga yeepwa malumwi nabi mashiku.

⁴⁰ Liinji liinji ndakalinga kubalwa lumwi alimwi akwaandwa mpewo mashiku. Tulo nshindakalinga kutubonaawo.

⁴¹ Myaaka yoonse makumi obilo mbondakalinga kwikala amwebo ubo. Ndakatola myaaka likumi ayone kusebensela ayi njebe bana banu bobilo, iyi imwi yosanwe awomwi ndakalinga kusebensela mbelele ampongo. Nakubi boobo, mwakapilula malipilo angu mankanda likumi.

⁴² Necakalinga cakwaamba ayi Lesa wa bamashali bangu bakulukulu, Lesa wa baAbulaamu abaIsaki taakalinga anebo, naakwiinga mwakambooshaamo kale amaansabo. Sombi Lesa wabona mapensho angu anciito nshendakacita, aboobo mashiku ainda aya wamubonesha ayi taakondetweewo.”

Jakobo mbwaakapangana aLabani

⁴³ Mpomunyaawo Labani wakakumbula Jakobo ayi, “Bamakaako mbana bangu, bana babo mbaangu, mbelele ampongo ishi nshaangu, alimwi ŋambebo ayi shintu shoonse nshoobwene apa nshaangu. Sombi mukwiinga taaku nceenga ndaciita kwaamba ayi bana bangu abashikulu bangu bacaale,

⁴⁴ ndilibambite kupanga cipangano awebo ayi cibe anga ngukamboni pakati kesu.”

⁴⁵ Aboobo Jakobo wakabwesa libwe waliimika ayi cibe ciibalusho.

⁴⁶ Mpeeke wakalwiita bantu bakwe ayi babunganye mabwe akwailinkanya. Lyalo bakalya cakulya kulubasu lwa mulwi wa mabwe.

⁴⁷ Labani wakautumba ayi Jega Saaduta, lakwe Jakobo wakautumba ayi Galidi.

⁴⁸ Labani wakaambila Jakobo ayi, “Mulwi uyu utooba anga ngukamboni pali ndiswe sobilo.” Nceceeco musena ulya ncebawiitila ayi Galidi.

⁴⁹ Labani alakwe wakaamba alimwi ayi, “Mwaami Lesa kaatubona soonse sobilo ciindi nditutabete pantu pomwi.” Paceebo ceeco musena ulya wakatumbwa alimwi liina lya Misipa.

⁵⁰ Labani wakatolelela akwaamba ayi, “Na ukalele bana bangu aba calunkutwe, nabi kweeba abamwi banakashi, nakubi kwaamba ayi ndabula kwiishiba mbowacita, ibaluka ayi Lesa ulitubwene.

⁵¹ Ngooyu mulwi wa mabwe ngondapanga pakati kangu awebo amwaandami wa ciibalusho awalo ngooyu.

⁵² Mulwi wa mabwe amwaandami wa ciibalusho shoonse shobilo nshiibalusho. Teshi nkasotokeewo mulwi uyu ayi nkalwaane awebo, alimwi awebo tooelete kusotokaawo libwe lya ciibalusho ili kwaamba ayi undwaane.

⁵³ Lesa wakwe Abulaamu alimwi aNawoli ulaakoombolosha pakati kesu.” Lyalo muliina lyakwe Lesa uyo Isaki, ishi ngwaakalinga kulambila, Jakobo wakashomesha cakulumbila ayi ulaakulama cipangano ici.

⁵⁴ Wakacaya munyama uyo ngwakabenga ayi ngumulambu pakalundu akwiita bantu bakwe kwaamba ayi balye. Ndyebakamana kulya, bakoona pakalundu.

⁵⁵ Macuunsacuunsa bushiku bwakaboolaawo, Labani wakafyonta bashikulu abana bakwe akubalasha. Mpeeke wakanyamuka kuboolela kumishaabo.