Matalikilo 3 - Baibo Busansulushi Bwa Libuku Ili

Kubisha kwa muntu

¹ Ono nsoka yakalinga kucenjete kwiinda banyama boonse bamuluundu abo Mwaami Lesa mbwaakalenga. Nsoka yakeepusha mwanakashi ayi, “Sa ncakwiila Lesa wakamukasha kulya shisepo sha cisamu cili coonse mumuunda muno?”

² Mwanakashi wakakumbula ayi, “Inga twalya shisepo sha cisamu cili coonse mumuunda,

³ sombi kukushakobo cisamu cili pakati ka muunda. Lesa wakatukasha kulyaako shisepo nabibo kucataako. Na twacita boobo, tulaakufwa.”

⁴ Lyalo nsoka yakakumbula ayi, “Tabushi mbocibete ubo, teshi mukafweewo sobwe!

⁵ Lesa ulishi kwaamba ayi na mwalyaako, meenso anu inga acaluka, alimwi ayi inga mwaba mbuli nguwe mukwishiba shibotu ashibiibi.”

⁶ Mwanakashi ndyaakabona cisamu ico mbocakalinga kuboneka kabotu, ashisepo mboshakalinga kuboneka kubota kulya, alimwi ndyaakayeeya ayi inga wacana busongo mukushilya, wakayapaako akulya. Mpeeke wakayapa shimwi akupaako ibaye, alakwe wakalya.

⁷ Ingayi bamanebo kulya, meenso abo akacaluka akubona ayi bali matakosha. Aboobo bakatunga matewu a mukuyu kwaamba ayi bafweke mibili yabo.

⁸ Bushiku bweenka ubo, macolesha, bakanyumfwa Mwaami Lesa kaaendeenda mumuunda, mpeeke bakamuyuba pakati ka shisamu.

⁹ Sombi Mwaami Lesa wakeeta Adamu ayi, “Uli kuli?”

¹⁰ Alakwe wakakumbula ayi, “Ndamunyumfwa kamweendeenda mumuunda. Ono ndaloonda akuyuba ceebo ndimatakosha.”

¹¹ Lesa wakeepusha ayi, “Ngani wakulwiita ayi uli matakosha? Sa walya shisepo nshindakamukasha kulya?”

¹² Musankwa wakakumbula ayi, “Mwanakashi ngomwakambikaakwe muno wampa cisepo, anebo ndalya.”

¹³ Mwaami Lesa wakeepusha mwanakashi ayi, “Ino wacitilanshi bobulya?” Alakwe wakakumbula ayi, “Ninsoka yambeca, lyalo ndalya.”

Lesa mbwaakabapa mulandu

¹⁴ Lyalo Mwaami Lesa wakaambila nsoka ayi, “Ntookushingana paceeci ncewacita. Pakati ka banyama boonse, lishingo ili lilisukemebo ndiwe weenka. Kuswa sunu unanokweendelabo kulifumo, alimwi ulyeelete kulya bulongo mubuumi bwako boonsebo.

¹⁵ Ono ntoolengesha webo amwanakashi kupatana. Lunyungu lwako alwa mwanakashi bananoolibo balwani lyoonse. Lakwe ulaakukulyata kumutwi awebo ulaakumuluma kukashindi.”

¹⁶ Mpeeke wakaambila mwanakashi ayi, “Ndaakulengesha ayi paciindi wakunooba pakati mapensho ako akafuule. Ulaakunoonyumfwa kucisa abuumbi pakutumbuka. Nacibi boobo unanoosunibo ibayo alimwi ngweshi anookweendelesha.”

¹⁷ Lyalo wakaambila Adamu ayi, “Wakakutika mukaako akulya cisepo ca cisamu ncendakamukasha. Paceebo ceeci bulongo butooshinganishikwa. Aboobo mubuumi bwako boonse ulaakunoosebensa cankusu, kwaamba ayi bukukushile shakulya nshooelete.

¹⁸ Alimwi mubulongo mulaakunoomena nsaku amyuumfwa. Webo ulaakunoolya shisepo sha muluundu.

¹⁹ Ulaakunoosebensa cankusu akuyuwa kwaamba ayi muswe shakulya mubulongo, kushikila ukaboolele kubulongo nkowakaswita. Mukwiinga wakalengwa kuswa kubulongo, alimwi ulaakuboolela kubulongo.”

²⁰ Mpeeke Adamu wakatumba liina mukaakwe ayi “Efa”, ceebo ngomushali mwanakashi wa bantu boonse.

²¹ Kuswawaawo Mwaami Lesa wakapangila Adamu amukaakwe shakufwala kuswa kushipaya sha banyama, akubafwalika.

Adamu aEfa mbobakatandwa mumuunda ulya

²² Lyalo Mwaami Lesa wakaamba ayi, “Ono muntu waba bweenka mbuli ndiswe, washiba bubotu abubi. Teelete kusuminishikwa kuyapa akulya cisepo ciswa kucisamu cipa buumi, kwaamba ayi anoolibo muumi lyoonse.”

²³ Aboobo Mwaami Lesa wakamukusha mumuunda wa Edeni akumulengesha ayi anoolima bulongo uko kweenka nkwaakaswita.

²⁴ Mpeeke kwicwe lya muunda wakabikaako shilengwalengwa shuumi shiitwa ayi bakelebu amupeeni wakalinga kunyaka mulilo, kwaamba ayi kubule ushika pafwaafwi acisamu cipa buumi.