Matalikilo 29 - Baibo Busansulushi Bwa Libuku Ili

Jakobo mbwaakashika kumishaabo Labani

¹ Jakobo wakatolelela lweendo lwakwe akuya kucishi cakalinga kwicwe.

² Cakuteengashila wakashika pamukalo wakalinga mumuunda. Pakalinga amatanga otatwe a mbelele kashilete kushinguluka mukalo. Matanga aya akalinga kunwita pamukalo uyo weenka. Pamulomo wa mukalo uyo pakalinga libwe linene abuumbi.

³ Beembeshi bakalinga kucita na matanga a mbelele oonse abungana, balikunkulushaawo libwe ilyo akutekelela mbelele. Kumana boobo balipilimwitaawo alimwi.

⁴ Mpeeke Jakobo wakeepusha beembeshi ayi, “Mwaswa kuli?” Bakakumbula ayi, “KuAlani.”

⁵ Lyalo wakeepusha ayi, “Sa baLabani bana babo baNawoli mulibeshi?” Bakakumbula ayi, “Ee, tulibeshi.”

⁶ Wakeepusha alimwi ayi, “Sa mbayumu?” Bakakumbula ayi, “Ee mbayumubo. ALakelo mwanaabo mwanakashi ngulya waashika alitanga lya mbelele shabo.”

⁷ Lyalo Jakobo wakaamba ayi, “Ono bulya mbolicilibo malumwi alimwi ciindi cakushinjisha tacina kushikila, tamutooshitekelelanshi maanshi kwaamba ayi mushibooshe shikalye?”

⁸ Abalo bakakumbula ayi, “Tatukoonshi kucita boobo matanga oonse kaatana kwisa alimwi alibwe kalitana kupilimunwaawo.”

⁹ Jakobo kaacaambaabo, Lakelo wakashika alitanga lya mbelele.

¹⁰ Jakobo ndyaakabona Lakelo ambelele shakwe Labani shimishaabo, wakaya wakunkulushaawo libwe pamukalo akutekelela mbelele isho.

¹¹ Kuswawaawo wakafyonta Lakelo akutalika kulila ceebo cakusangalala.

¹² Mpeeke wakamulwiita ayi, “Nebo ndishikamukowa wa baiso. Ndimwanaabo baLabeka.” Lakelo wakacica waya walwiita baishi.

¹³ Ndibakanyumfwa shamwiicwa wabo, Jakobo, bakacica kwaamba ayi baye bamwaanshe. Mpeeke bakamukumbata, bamufyonta akuya mukumwinjisha muŋanda. Jakobo ndyaakalwiita Labani shoonse shakacitika,

¹⁴ Labani wakaamba ayi, “Ee ncakwiila, uli bulowa bwangu.” Jakobo wakekalaako uko mweenshi wakabumbulu.

Jakobo mbwaakasebensela Labani ceebo cakwe Lakelo aLeya

¹⁵ Labani wakaambila Jakobo ayi, “Tooelete kunoonsebenselabo kwakubula kufola ayi mukwiinga uli shikamukowa wangu. Ulisuni kwaamba ayi nookufolesha shongaye?”

¹⁶ Ono Labani wakalinga kucite baana banakashi bobilo. Munenebantu wakalinga kwiitwa ayi Leya, mwanikebantu kaali Lakelo.

¹⁷ Leya wakalinga kucite meenso atakalinga kukondelesha, sombi Lakelo wakalinga kwiimfwi kabotu alimwi kaali mubotu.

¹⁸ Jakobo wakalinga kusunishi Lakelo, aboobo wakaamba ayi, “Na mwansuminisha kweeba Lakelo inga ndamusebensela myaaka yosanwe ayobilo.”

¹⁹ Labani wakakumbula ayi, “Ee, webo inga ndakusuminisha kuleka umwi uli woonse. Anu katwikala soonse.”

²⁰ Jakobo wakasebensa myaaka yosanwe ayobilo kwaamba ayi eebe Lakelo. Myaaka iyo kuli nguwe yakabonekabo anga ninshiku shiniinibo ceebo wakalinga kusuni Lakelo abuumbi.

²¹ Lyalo Jakobo wakaamba ayi, “Ciindi cakwana amumpe mwanaanu njebe.”

²² Aboobo Labani wakabamba bwiinga akwiita bantu boonse.

²³ Sombi mashiku ayo, mumusena wakwe Lakelo, Labani wakatola Leya kuli Jakobo alimwi Jakobo wakakumanaakwe.

²⁴ Labani wakapa Leya musha wakwe mwanakashi wiitwa ayi Silipa ayi abe mulandakashi wakwe.

²⁵ Lyalo macuunsa Jakobo wakacana ayi nguLeya. Mpeeke wakaya kuli Labani akumwaambila ayi, “Ino mwancitilanshi bobulya? Nebo ndakasebensela Lakelo. Ino mwancenjeekelanshi?”

²⁶ Labani wakakumbula ayi, “Cilatonda kuno kweebesha mwanikebantu, munenebantu kaatana kweebwa.

²⁷ Lindila nsondo yakusekelela bwiinga buno imane, ndaakukupa Lakelo na ulaakunsebensela aimwi myaaka yosanwe ayobilo.”

²⁸ Jakobo wakasumina alimwi ndiyakamana nsondo yakusekelela bwiinga, Labani wakamupa Lakelo mwanaakwe ayi eebe.

²⁹ Labani wakapa Lakelo musha wakwe mwanakashi wiitwa ayi Biluya ayi abe mulandakashi wakwe.

³⁰ Jakobo wakakumanaakwe Lakelo alakwe alimwi wakalinga kumusuni kwiinda Leya. Lyalo wakasebensela Labani myaaka aimwi ili yosanwe ayobilo.

Bana bakwe Jakobo

³¹ Mwaami Lesa ndyaakabona kwaamba ayi Leya taakalinga kusunikwi bwakalinga kusunikwi Lakelo, wakalengesha ayi lakwe akonshe kuba abaana, sombi Lakelo awomuubo.

³² Leya wakamita akutumbuka mwaana musankwa. Mpeeke wakaamba ayi, “Lesa wabona mapensho angu ono bulya beebaangu batoonsuna.” Paceebo ceeco wakamutumba ayi Lubeni.

³³ Wakamita alimwi akutumbuka musankwa aumwi. Lyalo wakaamba ayi, “Mwaami Lesa wampa mwaana musankwa uyu alakwe, ceebo wakanyumfwa kwaamba ayi nshindalinga kusunikwi.” Paceebo ceeco wakamutumba ayi Simyoni.

³⁴ Ono alimwi wakamita akutumbuka mwaana musankwa aumwi. Mpeeke wakaamba ayi, “Ono beebaangu lusuno lwabo lutokwiindawobo pali ndime, ceebo ndabashalila baana basankwa botatwe.” Paceebo ceeco wakamutumba ayi Lefi.

³⁵ Lyalo wakamita alimwi, akutumbuka mwaana musankwa aumwi. Mpeeke wakaamba ayi, “Bulya ono ntoolumbaisha Mwaami Lesa.” Paceebo ceeco wakamutumba ayi Juda. Mpomunyaawo lushalo lwakamana akumana.