Matalikilo 27 - Baibo Busansulushi Bwa Libuku Ili

Isaki mbwaakapa Jakobo coolwe

¹ Isaki ono wakacembela akupofola. Wakatuma nkombe kuli Esau mwanaakwe munenebantu ayi ese. Mpeeke wakamwaambila ayi, “Omwanaangu!” Lakwe wakakumbula ayi, “Ee nkambo.”

² Isaki wakaamba ayi, “Waboona kwaamba ayi ndakuula alimwi inga ndafwa coonoono.

³ Bwesa buta bwako amifwi uye muluundu uncaileewo munyama.

⁴ Utelekeewo cakulya cilya cibotu ico ncensuni, undetele. Ndamana kulya ntookupa coolwe cakweelaako kaantana kufwa.”

⁵ Isaki ndyaakalinga kubandika aEsau, Labeka wakalinga kukutika. Lyalo Esau ndyaakaya mukufwima,

⁶ Labeka wakaambila Jakobo ayi, “Ndalinga kukutika baiso kabaambila Esau ayi,

⁷ ‘Undetele nyama akumambila cakulya cilya cibotu. Ndamana kulya ntookupa coolwe pameenso aMwaami Lesa kaantana kufwa.’ ”

⁸ Labeka wakatolelela akwaamba ayi, “Ono omwanaangu, ukutike akucita nceshi ŋambe.

⁹ Koya kulitanga lya mpongo usale tupongo twaana tobilo twiinite kwaamba ayi nteleke akubamba cakulya cilya ncebasuni bunene baiso.

¹⁰ Lyalo ubatolele kwaamba ayi balye, mpeeke batookupa coolwe kabatana kufwa.”

¹¹ Sombi Jakobo wakaambila banyina ayi, “Mulishi kwaamba ayi Esau ulicite booya, sombi nebo nditeshimitebo.

¹² Cimwi ciindi bata bancaatecate akwishiba ayi ntoobabecabo. Ono ubo te inga ndaliletela lishingo kuleka coolwe kuswa kuli mbabo?”

¹³ Banyina bakakumbula ayi, “Omwanaangu, lishingo lili lyoonse alise pali ndime. Citabo mbondakwaambila, uye undetele tupongo.”

¹⁴ Aboobo wakaya waleta tupongo kuli mbabo, mpeeke bakateleka cakulya cibotu ceenka baishi ncebasunishi.

¹⁵ Lyalo wakabwesa shakufwala shiindaawo kubota shakwe Esau mwanaakwe musankwa munenebantu, isho nshaakalinga kusungite muŋanda, akufwalika Jakobo mwanikebantu.

¹⁶ Wakabwesa tupaya twa mpongo akutubika pamikono yakwe apalubasu lwa nshingo apo mpwaakalinga kutacite booya lakwe.

¹⁷ Mpomunyaawo wakamupa cakulya cibotu cilya pantu pomwi ashinkwa ngobakapanga.

¹⁸ Lyalo Jakobo wakaya kuli baishi akwaamba ayi, “Ta!” Wakakumbula ayi, “Woo, anu ndiwe mwanaangu uli?”

¹⁹ Mpeeke Jakobo wakaambila baishi ayi, “Ndimwanaanu munenebantu, Esau. Ndaciita kweelana ambomwandwiita. Amubuke mulye nyama njindamuletela kwaamba ayi mumpe coolwe canu.”

²⁰ Isaki wakeepusha ayi, “Ino waicana buyani bwaangu, omwanaangu?” Jakobo wakakumbula ayi, “Mwaami Lesa, Lesa wanu wancafwa kwaamba ayi njicaane bwaangu.”

²¹ Mpomunyaawo Isaki wakaambila Jakobo ayi, “Sena pafwaafwi nkucaatecate na ncakwiila ndiwe Esau?”

²² Jakobo wakasena kuli baishi abalo bakamucatacata akwaamba ayi, “Liswi litoonyumfwika anga nguJakobo sombi mikono anga nguEsau.”

²³ Taakwe kumwishiba Jakobo mukwiinga mikono yakwe yakalinga kunyumfwika booya anga njimikono yakwe Esau. Isaki wakalinga wayanda kale kumupa coolwe.

²⁴ Ono wakeepusha alimwi ayi, “Sa ncakwiila ndiwe Esau?” Alakwe wakakumbula ayi, “Ee ndime.”

²⁵ Isaki wakaamba ayi, “Ndetele nyama imwi iniini. Ndamana kulya ntookupa coolwe.” Jakobo wakamuletela alimwi wakaleta awaini ayi anwe Isaki.

²⁶ Lyalo baishi bakaamba ayi, “Sena pafwaafwi umfyoonte omwanaangu.”

²⁷ Ndyaakalinga kwisa cisena, Isaki wakanunsha shakufwala, aboobo wakamupa coolwe. Wakaamba ayi, “Bweema bubotu bwa mwanaangu buli anga mbweema bwa muunda uyo Mwaami Lesa ngwaapa coolwe.

²⁸ Lesa aakupe mume kuswa kwiculu akulengesha myuunda yako kuba amboleshi! Aakupe shili anga ngamaila shiinji awaini uunji.

²⁹ Mishobo amishobo aikakusebensele abantu bapusenepusene bakakufukamine. Buleli bwa beshikamukowa bako abukabe kuli ndiwe, alimwi bamulunyungu lwa banyoko abakakufukamine. Aakashinganwe uyo woonse weshi akakushingane. Aakapekwe coolwe uyo woonse weshi akakupe coolwe.”

Esau mbwaakasenga coolwe

³⁰ Isaki ndyaakamanisha kumupa coolwe, Jakobo wakacita ingayi asweekobo kuli baishi, alakwe Esau nkupola kuswa mukufwima.

³¹ Alakwe wakateleka cakulya cilya cibotu akutola kuli baishi. Mpeeke wakabaambila ayi, “Ta, amubuke mulyeeko nyama ya muluundu kwaamba ayi mumpe coolwe canu.”

³² Isaki wakeepusha ayi, “Ndiwaani?” Wakakumbula ayi, “Ndime Esau, mwanaanu wakwiiya.”

³³ Lyalo Isaki wakatalika kututuma abuumbi. Mpeeke wakeepusha ayi, “Ono ngani wacaya nyama muluundu akwiileta kuli ndime? Ndiwapola apa ndindamanishabo kwiilya. Ndamupa coolwe cangu cakweelaako alimwi ncakwiila unanoolibo aco lyoonse alyoonse.”

³⁴ Esau ndyaakanyumfwa boobo wakalila abuumbi cakooloma akwaamba ayi, “Anebo amumpe coolwe ta!”

³⁵ Isaki wakakumbula ayi, “Mukwanu nkwaalinga kuno akunyinda kumaano. Aboobo wabwesa coolwe cako.”

³⁶ Esau wakaamba ayi, “Ulu ndwabili kunyinda kumaano. Anu nceceeco liina lyakwe ncelyakabeta ayi Jakobo. Wakanyaya bunenebantu bwangu alimwi bulya wabwesa acoolwe cangu. Sa tamukwe kunshiilaawo coolwe nabi comwi nebo?”

³⁷ Isaki wakakumbula Esau ayi, “Ndalengesha kale ayi abe mwaami wako, alimwi ayi boonse beshikamukowa bakwe babe basha bakwe. Ndamupa shili anga ngamaila awaini. Ono taaku cacaala nceshi nkupe, omwanaangu!”

³⁸ Esau wakatolelela kukombelela baishi ayi, “Sa mulicitebo coolwe comwi ta? Anebo ta amumpeewo coolwe!” Mpeeke wakatalika kulila.

³⁹ Lyalo Isaki wakamwaambila ayi, “Webo teshi ukatambuleewo mume kuswa kwiculu, alimwi teshi ukabeewo amyuunda icite mboleshi.

⁴⁰ Ulaakunoocana buumi kwiinda mukusebensesha mupeeni, alimwi ulaakuba musha wa mukwanu. Sombi waakwaashuka, ulaakupatuka kuswa mubweendeleshi bwakwe.”

⁴¹ Esau wakapata Jakobo ceebo baishi bakapa nguwe coolwe. Wakayeeya ayi, “Bata bali pafwaafwi kufwa, ono na cikeende cililo, Jakobo ndaakumucaya.”

⁴² Ono Labeka ndyaakalwiitikwa shamuyeeyo wakwe Esau wakatuma nkombe ayi Jakobo ese. Mpeeke wakamwaambila ayi, “Nyumfwa, mukwanu utoyeeya kukucaya kwaamba ayi cili kumoyo cisutuke.

⁴³ Ono omwanaangu ucite nceshi nkwaambile. Unyamuke bulya uye kuli nandumi yangu Labani kuAlani.

⁴⁴ Lyalo ukekaale anguwe kushikila mukwanu akabooshemo moyo,

⁴⁵ akuluba ncewacita kuli nguwe. Lyalo ndaakutuma muntu kwisa mukukubwesa uko. Nshikwe kunyonyookelwa baana basankwa bobilo paciindi comwi.”

Isaki mbwaakatuma Jakobo kuya kuli Labani

⁴⁶ Labeka wakaambila Isaki ayi, “Bamakaakwe Esau baswamashi bandemya. Na Jakobo alakwe akeebe womwi pakati ka banakashi bene Iti, anu anebo ncibotu kufwabo.”