Matalikilo 26 - Baibo Busansulushi Bwa Libuku Ili

Isaki mbwaakekala kuGela

¹ Kwakaba aimwi nsala mucishi ico kuleka imwi yakataanguna muciindi cakwe Abulaamu. Isaki wakaya kuli Abimeleki, mwaami wa bene Filisiti, kuGela.

² Mwaami Lesa wakaboneka kuli Isaki akwaamba ayi, “Utayi kuIjipiti, ukale mucishi muno mondakakwaambila.

³ Kala muno, alimwi ndanooli awebo akukupa coolwe. Ndaakupa cishi coonse ici kuli ndiwe abamulunyungu lwako. Ndaakucita kweelana ambondakalasha iso Abulaamu.

⁴ Ndaakukupa bamulunyungu lwako baanji bweenka mboobona nyenyeenshi mwiculu, alimwi ndaakubapa cishi coonse ici. Ndaakupa coolwe mishobo yoonse pacishi ca panshi kwiinda mubamulunyungu lwako

⁵ mukwiinga Abulaamu wakanyumfwila akukonkela milawo yangu yoonse anshindakamulwiita ayi acite.”

⁶ Aboobo Isaki wakekala kuGela.

⁷ Ono basankwa bakooko na bamwiipusha pamukaakwe, wakalinga kubaambila ayi ngunankashi yakwe. Taakalinga kusumina ayi ngumukaakwe kuloonda ayi inga bamucaya mukuyanda kubwesa Labeka uyo wakalinga mubotu abuumbi.

⁸ Isaki ndyaakekalaako ciindi cilaamfuuko uko, bumwi bushiku Abimeleki ndyaakalangilisha pambwelyo, wakabona Isaki batoolyana nkwela aLabeka.

⁹ Abimeleki wakatuma nkombe ayi ese. Lyalo wakamwaambila ayi, “Anu ngumukaako! Ino wakaambilanshi ayi ngunankashi yako?” Isaki wakakumbula ayi, “Ndakayeeya ayi ntoocaikwa na ŋambe ayi ngumukaangu.”

¹⁰ Abimeleki wakaamba ayi, “Ono nceciinshi ici ncewacita kuli ndiswe? Calinga cuubu womwi pabasankwa bangu koona amukaako ono naakwiinga ndiwe walengesha kwaamba ayi tube amulandu.”

¹¹ Mpeeke Abimeleki wakacenjesha bantu boonse ayi, “Uyo woonse eshi akatakooshe musankwa uyu nabi mukaakwe ulaakucaikwa.”

¹² Isaki wakalima mucishi ico alimwi mwaaka uyo wakatebula shili mwaanda kwiinda pasheesho nshaakashanga, mukwiinga Mwaami Lesa wakamupa coolwe.

¹³ Wakatolelela kumusumpula kushikila wabila abuumbi.

¹⁴ Ono ceebo cakwaamba ayi wakalinga kucite mbelele aŋombe shiinji alimwi abasebenshi baanji, bene Filisiti bakamufwita munyono.

¹⁵ Mpeeke mikalo yoonse yakalinga yakaba basebenshi bakwe Abulaamu kaacili muumi, bakeefukila.

¹⁶ Lyalo Abimeleki wakaambila Isaki ayi, “Swa mucishi cesu. Webo waba ankusu kwiinda ndiswe.”

¹⁷ Aboobo Isaki wakanyamuka waya wayaka misumba muliwesa lya Gela umo mwaakekala ciindi ciniini.

¹⁸ Wakakalula mikalo yeenka yakalinga yakabwa muciindi cakwe Abulaamu, iyo bene Filisiti njebakalinga bafukila Abulaamu ndyaakafwa. Isaki wakapa meena mikalo eenka ishi ngwaakalinga weepa.

¹⁹ Basebenshi bakwe Isaki bakakaba mukalo mucinyika akucana maanshi.

²⁰ Bumwi bushiku beembeshi ba muGela bakaambana abeembeshi bakwe Isaki akwaamba ayi, “Maanshi aya ngesu.” Paceebo ceeco Isaki wakatumba mukalo uyo ayi, “Eseki” nkokwaamba ayi, “Kwaambana.”

²¹ Basebenshi bakwe Isaki bakakaba aumwi mukalo sombi awalo pakaba shakwaambana. Paceebo ceeco wakautumba ayi, “Sitina” nkokwaamba ayi, “Kupatwa.”

²² Wakalonga apo akukaba aumwi mukalo. Sombi pa wooyu tapakwe kubaawo shakwaambana. Aboobo mukalo uyu wakautumba ayi, “Lewoboti” nkokwaamba ayi, “Lwaanguluko.” paceebo ceeci wakaamba ayi, “Ono Mwaami Lesa watupa lwaanguluko kwikala mucishi muno akunsumpula.”

²³ Isaki wakanyamuka waya kuBiyasheba.

²⁴ Mashiku ayo Mwaami wakaboneka kuli nguwe akwaamba ayi, “Ndime Lesa wakwe iso Abulaamu. Utaloondi, ndi awebo. Ndaakukupa coolwe abamulunyungu lwako ceebo ca kulasha nkondakalasha musebenshi wangu Abulaamu.”

²⁵ Isaki wakayaka cipaililo apo akulambila Mwaami Lesa. Lyalo wakayaka musumba apo, mpeeke basebenshi bakwe bakakaba aumwi mukalo.

Isaki mbwaakapangana aAbimeleki

²⁶ Abimeleki wakesa kuswa kuGela aAusati shikumulwiitaako, pantu pomwi aPiko munene wa bashilumamba, mukubona Isaki.

²⁷ Mpeeke Isaki wakabeepusha ayi, “Ceebonshi sunu mwesa mukumbona kakuli mwakancita anga ngumulwani akuntanda mucishi canu?”

²⁸ Bakakumbula ayi, “Ono tweshiiba ayi Mwaami Lesa uli awebo. Aboobo twayeeya ayi pakati kesu awebo pabe cipangano cakulumbila. Tulisuni kwaamba ayi ushomeshe

²⁹ ayi teshi ukatuciteewo cibiibi bweenka swebo mbotutakwe kukucitilaawo cibiibi. Twakalinga kweendabo kabotu awebo, alimwi twakakukusha mucishi cesu muluumuno. Ono caboneka patuba kwaamba ayi Mwaami Lesa wakupa coolwe.”

³⁰ Isaki wakabamba shakulya kwaamba ayi basekelele, lyalo bakalya akunwa.

³¹ Macuunsacuunsa bushiku bwakaboolaawo, womwi awomwi wakashomesha cakulumbila. Lyalo Isaki wakabashindikila, mpeeke bakapansaana kabali beshicibusa.

³² Pabushiku ubo basebenshi bakesa balwiita Isaki shamukalo ngobakakaba. Bakaamba ayi, “Twaacana maanshi.”

³³ Mukalo uyo wakautumba ayi, “Sheba” nkokwaamba ayi, “Kushomesha cakulumbila.” Ubo mboboobo ndabala inene ya Biyasheba mboyakapekwa liina.

Bamakaakwe Esau baswamashi

³⁴ Esau ndyaakaba amyaaka ili 40, wakeeba banakashi bene Iti bobilo, Judisi mwanaakwe Biyeli aBesimati mwanaakwe Eloni.

³⁵ Aba bantu bakalengesha bwikaalo bwakwe Isaki aLabeka kuyuma.