Matalikilo 25 - Baibo Busansulushi Bwa Libuku Ili

Bamulunyungu lwakwe Abulaamu bamwi

¹ Abulaamu wakeeba aumwi mwanakashi uyo wakalinga kwiitwa ayi Ketula.

² Muli wooyo wakashalilaamo Simulani, Jokishani, Medani, Midyani, Ishibaki alimwi aShuwa.

³ Jokishani ngoishi Sheba aDedani. Bamulunyungu lwakwe Dedani bakalinga bene Ashuwa, bene Letushi, abene Leyumi.

⁴ Bana bakwe Midyani basankwa bakalinga Efa, Efeli, Anoki, Abida alimwi aEluda. Aba boonse bakalinga bamulunyungu lwakwe Ketula.

⁵ Ono Abulaamu wakashiya shoonse nshaakalinga kucite mumaansaakwe Isaki.

⁶ Nakubi boobo kaacili muumi baana ba bamakaakwe bamwi wakabapa shipo. Lyalo wakabatuma kucishi ca kwicwe kwaamba ayi bashiye Isaki mwanaakwe eenka,

Abulaamu mbwaakafwa akubikwa

⁷ Abulaamu wakekala myaaka ili 175.

⁸ Wakafwa kaali paciimo cakwiinga ayi wakalya weenkula, amyaaka imweelete.

⁹ Isaki aIshimaeli bana bakwe basankwa bakamubika mucimfwengo ca Makipela, mumuunda wakalinga kwicwe lya Mamule uyo wakalinga wakwe Efuloni mwanaakwe Sowa mwine Iti.

¹⁰ Uyo ngomuunda Abulaamu ngwaakoola kubene Iti. Boonse bobilo lakwe aSaala mukaakwe bakabikwa mweenka umo.

¹¹ Abulaamu ndyaakafwa, Lesa wakapa coolwe abuumbi Isaki mwanaakwe, uyo wakalinga kwikala pafwaafwi aMukalo wa Wooyo Muumi Umbona.

Bamulunyungu lwakwe Ishimaeli

¹² Ishimaeli uyo Abulaamu ngwaakashalila muli Aga, musha wakwe Saala, mwine Ijipiti,

¹³ wakashala baana basankwa bakonkelene kweelana ambobakashalwa. Nkokwaamba ayi Nebayoti, Keda, Adibilu, Mibisamu,

¹⁴ Mishima, Duma, Masa,

¹⁵ Adadi, Tema, Jetuli, Nafishi alimwi aKedema.

¹⁶ Aba bakalinga mbobashali bakulukulu ba mishobo ili likumi ayobilo iyo icite meena aya. Meena abo akalinga kutumbwa mishi yabo amobakalinga kuya ciyaka misumba.

¹⁷ Ishimaeli wakekala myaaka ili 137. Lyalo wakafwa.

¹⁸ Bamulunyungu lwakwe Ishimaeli bakalinga kwikala mucishi cakalinga pakati ka Afila aShuwa kwicwe lya Ijipiti na utooya kuAsilya. Bakapansaana kwikala abamulunyungu lwakwe Abulaamu bamwi mukwiinga bakalinga kupatene.

Kushalwa kwakwe Esau aJakobo

¹⁹ Ici ncikani ca pali Isaki mwanaakwe Abulaamu musankwa.

²⁰ Isaki wakalinga kucite myaaka ili 40 ndyaakeeba Labeka mwanaakwe Betiwelo uyo wakalinga mwine Alamiya kuswa kuMesopotamya, alimwi nankashi yakwe Labani.

²¹ Labeka taakalinga kukonsha kushala, aboobo Isaki wakamupaililaako kuMwaami Lesa. Lesa alakwe wakakumbula mupailo wakwe lyalo wakamita.

²² Wakamita bampundu, ono kabatana kushalwa bakalinga kulwishanya mumala. Mpeeke wakalyaamboosha ayi, “Ino cintu ca mushobo uyu inga cancitikila buyani?” Lyalo wakaya weepusha kuMwaami Lesa.

²³ Mwaami Lesa wakamwaambila ayi, “Mumala umo uliyumwite mishobo ya bantu yobilo Ulaakutumbuka bantu ba mishobo yobilo bapatene. Mushobo womwi ulaakunoocite nkusu kwiinda umwi, munenebantu ulaakunoosebensela mwanikebantu.”

²⁴ Ciindi ndicakashikila wakatumbuka baana bansankwa bobilo.

²⁵ Mutaanshi wakalinga musalala alimwi cikanda cakwe cakalinga anga ncakufwala ca peculu cabooyabooya. Paceebo ceeco wakatumbwa ayi Esau.

²⁶ Wabili wakashalwa kaacatite cankusu kukashindi kakwe Esau. Paceebo ceeco wakatumbwa ayi Jakobo. Isaki wakalinga kucite myaaka ili 60 ndibakashalwa.

Esau mbwaakakaka bunenebantu bwakwe

²⁷ Basankwa bobilo abo bakakula. Esau wakaba mufwimi ucibwene alimwi wakalinga kusunishi buumi bwakuya muluundu, sombi Jakobo wakalinga kuumwite abuumbi alimwi usuni kucanikabo paŋanda.

²⁸ Isaki wakalinga kusunishi Esau ceebo wakalinga kusuni kulya tunyama ntwaakalinga kucaya, sombi Labeka wakalinga kusunishi Jakobo.

²⁹ Bumwi bushiku Jakobo ndyaakalinga kuteleka musushi wa cileemba, Esau wakapola kuswa mukufwima kaafwite nsala.

³⁰ Aboobo wakaambila Jakobo ayi, “Endesha mpeewo musushi usalala uyo, ndafwa nsala.” Nceceeco ncaakalinga kwiitilwa ayi Edomu.

³¹ Jakobo wakakumbula ayi, “Ntookupa na umpe bunenebantu bwako.”

³² Esau wakaamba ayi, “Cilibo kabotu! Ntooyanda kufwa pano. Ono bunenebantu butooncafwanshi?”

³³ Jakobo wakakumbula ayi, “Taanguna shomesha cakulumbila ayi utoompa bunenebantu bwako.” Esau wakashomesha cakulumbila akupa Jakobo bunenebantu bwakwe.

³⁴ Lyalo Jakobo wakamupaawo shinkwa amusushi umwi. Wakalya, amanishe wakanyamuka, waya. Ubo Esau mbwaakakaka bunenebantu bwakwe.