Matalikilo 22 - Baibo Busansulushi Bwa Libuku Ili

Lesa mbwaakaambila Abulaamu kubenga Isaki

¹ Mukuya kwanshiku Lesa wakeelesha lushomo lwakwe Abulaamu. Wakamwiita ayi, “Abulaamu!” Alakwe wakakumbula ayi, “Nkambo!”

² Lesa wakaamba ayi, “Bwesa mwanaako musankwa, mwaana eenkabo ngoocite, uyo ngoosuni abuumbi, uye kucishi ca Moliya. Uko ntookutondesha kalundu mpweshi umubengele ayi ngumulambu kuli ndime.”

³ Macuunsacuunsa bushiku bwakaboolaawo wakatimbula nkuni shakutentesha mulambu, watantika pambongolo yakwe akunyamuna Isaki pantu pomwi abasebenshi bobilo. Bakanyamuka akuya kumusena Lesa ngwaakamulwiita.

⁴ Pabushiku bwatatu, Abulaamu wakaubona musena uyo palaale.

⁵ Mpeeke wakaambila basebenshi bakwe ayi, “Amucaale pano ambongolo. Nebo amwanaangu tutooyookulya mukulambila, tutooboola alimwi.”

⁶ Abulaamu wakaambila Isaki ayi anyamune nkuni shakutentesha mulambu, lakwe mwiine wakanyamuna cibeshi amulilo wa makalangasha. Ndyebakalinga kuya ceenda pantu pomwi,

⁷ Isaki wakaamba ayi, “Ta,” Alakwe wakakumbula ayi, “Mbuyani omwanaangu?” Isaki wakaamba ayi, “Mulilo ankuuni shalo mwanyamuna, ono mwanaambelele wakubenga uli kuli?”

⁸ Abulaamu wakakumbula ayi, “Lesa mwiine ulatupa.” Mpeeke kabayabo.

⁹ Ndibakashika apo Lesa mpaakamulwiita, Abulaamu wakayaka cipaililo akubambaawo nkuni. Wakaanga mwanaakwe akumubika pacipaililo, peculu lya nkuni.

¹⁰ Mpomunyaawo wakabwesa cibeshi ayi amucaaye.

¹¹ Sombi munjelo wa Mwaami Lesa wakamwiita kuswa kwiculu ayi, “Abulaamu, Abulaamu!” Alakwe wakakumbula ayi, “Nkambo.”

¹² Munjelo wakaamba ayi, “Utaciisi nabi kucita cili coonse kumwanike uyo. Ono ndeshiiba kwaamba ayi ulalemeka akunyumfwila Lesa ceebo tookwe kumamatisha mwanaako eenkabo kwaamba ayi utamubengi kuli nguwe.”

¹³ Abulaamu ndyaakacebooka wakabona mbelele isankwa keecatitwe meeca mutusamu. Wakaya waibwesa akwiibenga mbuli mulambu wakutenta kuleka mwanaakwe.

¹⁴ Musena uyo Abulaamu wakautumba ayi, “Lesa ulapa.” Abobulya bantu balaamba ayi, “PaKalundu ka Mwaami Lesa upa.”

¹⁵ Munjelo wa Mwaami Lesa wakeeta kuswa kwiculu alimwi akwaamba ayi,

¹⁶ “Mwaami Lesa waamba ayi, ‘Ndashomesha akulumbila ayi paliina lyangu ndaakukupa shoolwe shiinji abuumbi mukwiinga wacita ceeci alimwi kumamatisha mwaana eenkabo kwaamba ayi utamubengi kuli ndime.

¹⁷ Ndashomesha ayi ndaakukupa bamulunyungu lwako baanji anga ninyenyeenshi mwiculu nabi museese wa muloombe lwa lweenge. Bamulunyungu lwako balaakukoma beshinkondonyinaabo.

¹⁸ Ndaakupa coolwe mishobo yoonse ya pacishi ca panshi kwiinda mubamulunyungu lwako mukwiinga wakanyumfwila nsheeŋamba.’ ”

¹⁹ Abulaamu wakaboolela kwakalinga basebenshi bakwe, lyalo bakaya boonse kuBiyasheba uko nkwaakaya mukwikala.

Bamulunyungu lwakwe Nawoli

²⁰ Bumwi bushiku kunembo Abulaamu wakesa weshiba ayi Milika mulamu wakwe wakashala baana bali bosanwe abotatwe kuli Nawoli.

²¹ Usi nguwakalinga mwaana wakwiiya, mwanike wakwe wakalinga Buse. Kwakalinga aKemuwelo ishi Alamu,

²² Kesedi, Aso, Piludashi, Jidilafu aBetiwelo.

²³ Betiwelo ngowakalinga ishi Labeka. Milika ngowakashala baana aba bali bosanwe abotatwe kuli Nawoli mukwabo Abulaamu.

²⁴ Leuma, kasuwa wakwe Nawoli, wakashala Teba, Gaamu, Taashi alimwi aMaaka.