Matalikilo 21 - Baibo Busansulushi Bwa Libuku Ili

Kushalwa kwakwe Isaki

¹ Mwaami Lesa wakapa coolwe Saala kweelana ambwaakalinga walasha.

² Wakamita akushala mwaana musankwa wakwe Abulaamu kubucembele. Wakashalwa paciindi peenka Lesa mpaakalinga walasha.

³ Abulaamu wakamutumba ayi Isaki.

⁴ Isaki ndyaakaba anshiiku shosanwe ashotatwe, Abulaamu wakapalula mwaana uyo kweelana aLesa mbwaakalasha.

⁵ Abulaamu wakalinga kucite myaaka ili 100 Isaki ndyaakashalwa.

⁶ Saala wakaamba ayi, “Lesa wanengesha nseko. Boonse beshi bakanyumfwe cikani ici balaakuseka anebo.”

⁷ Lyalo wakeelikaawo ayi, “Anu ngani walinga kuyeeyawo ayi nebo inga ndashala mwaana. Sombi ndashala mwaana wakwe Abulaamu kubucembele bwakwe.”

⁸ Mwaana wakakula, lyalo pabushiku ndyaakaleshekwa, Abulaamu wakabamba kusekelela kunene abuumbi.

Aga aIshimaeli mbobakatandaanishikwa

⁹ Bumwi bushiku Ishimaeli uyo mwaana musankwa Abulaamu ngwaakashalila muli Aga wa kuIjipiti, wakalinga kupensha Isaki mwanaakwe Saala.

¹⁰ Saala wakababona akwaambila Abulaamu ayi, “Amutande mwanakashi musha uyu amwanaakwe musankwa. Mwaana wa mwanakashi uyu taeelete kubwesaako buboni ubo mwanaangu mbwaaelete kubwesa.”

¹¹ Ici Abulaamu cakamushupa abuumbi mukwiinga Ishimaeli wakalinga ngumwanaakwe alakwe.

¹² Sombi Lesa wakaambila Abulaamu ayi, “Utalisukami pamwaana uyu amusha wako Aga. Cita coonse nceshi akwaambile Saala mukwiinga nkwiinda muli Isaki mweshi nkakupete bamulunyungu lwako abo mbondakakulasha.

¹³ Mwaana wa mwanakashi musha alakwe ndaakumupa baana baanji kwaamba ayi bakabe mushobo, mukwiinga alakwe ngumwanaako.”

¹⁴ Ndibwakaca, Abulaamu wakapa Aga shakulya ankomwi ya cipaya keeswite maanshi. Mpeeke wakabwesa mwaana wamubelekesha akumwaambila ayi anooya. Aga wakanyamuka kaaya ceendaanabo muluyanga lwa Biyasheba.

¹⁵ Ono maanshi ndyaakamumanina, wakashiya mwaana mucikupu

¹⁶ akwikala palaamfuuko bulya, mpashi mushinso wa ntaamwa mwaanda. Wakalyaamboosha ayi, “Nshikoonshi kubona patoofwita mwanaangu.” Mpomunyaawo wakatalika kulila apo mpwaakalinga kushiite.

¹⁷ Lesa wakanyumfwa kulila kwa mwaana uyo. Lyalo kuswa kwiculu munjelo wakwe wakaambila Aga ayi, “Nciinshi cakupensha Aga? Utaloondi, Lesa wanyumfwa kulila kwa mwanaako.

¹⁸ Nyamuka, koya umubwese umuumushe. Ndaakupanga mushobo unene abuumbi pabamulunyungu lwakwe.”

¹⁹ Mpeeke Lesa wakamucalula meenso, lyalo wakabona mukalo wa maanshi. Mpomunyaawo wakaya wasusha nkomwe ya cipaya maanshi akupawo mwaana amwi.

²⁰ Lesa wakalinga amwaana uyo mukukula kwakwe. Mwaana uyo wakakulila muluyanga lwa Palani akuba shikufwima ucibwene.

²¹ Banyina bakamweebela mwanakashi mwine Ijipiti.

Abulaamu aAbimeleki mbobakapangana

²² Paciindi ico Abimeleki wakaya aFiko, munene wa bashilumamba bakwe, akulwiita Abulaamu ayi, “Lesa uli amwebo mushintu shoonse nshemucita.

²³ Ono amushomeshe cakulumbila kuli Lesa kwaamba ayi teshi mukacenjeekeewo ndime, bana bangu, nabi bamulunyungu lwangu. Ndashomeka kuli ndimwe, amwebo amushomeshe ayi munanooshomeka kuli ndime alimwi akucishi cino umo momutekwikala.”

²⁴ Abulaamu wakaamba ayi, “Ndashomesha.”

²⁵ Mpeeke Abulaamu wakatongookela Abimeleki shamukalo uyo basebenshi bakwe Abimeleki ngobakalinga baalisha.

²⁶ Abimeleki wakaamba ayi, “Nshimwishi wakacita boobo. Tamuna kundwiitaawo cikani ici, alimwi kwaba nkokwiiya kucinyumfwa.”

²⁷ Lyalo Abulaamu wakapa Abimeleki mbelele aŋombe, mpomunyaawo abo bobilo bakapanga cipangano.

²⁸ Abulaamu wakapatula twana twa mbelele twanakashi tuli tosanwe atobilo kuswa mulitanga lyakwe.

²⁹ Mpeeke Abimeleki wakamwiipusha ayi, “Ino mwacitilanshi bobulya?”

³⁰ Abulaamu wakakumbula ayi, “Amutambule twana twa mbelele utu. Mukucita boobo mutoosuminisha ayi mukalo uyu ndime ndakaukaba.”

³¹ Aboobo musena uyo wakatumbwa ayi Biyasheba, ceebo mpobakapangila cipangano abo bobilo.

³² Ndibakamana kupanga cipangano ici paBiyasheba, Abimeleki aFiko bakaboolela kuFilisitiya.

³³ Lyalo Abulaamu wakashanga mubanga muBiyasheba akulambila Mwaami Lesa wamuyayaya.

³⁴ Abulaamu wakekala muFilisitiya kwa ciindi cilaamfu.