Matalikilo 20 - Baibo Busansulushi Bwa Libuku Ili

Abulaamu aAbimeleki

¹ Abulaamu wakalonga kuMamule kuya kumalenge a Kenani akwikala pakati ka Kadeshi aSheli. Mukuya kwanshiku ndyaakalinga kwikala muGela,

² uko wakaamba ayi Saala mukaakwe, ngunankashi yakwe. Aboobo Abimeleki mwaami wa Gela wakatuma bantu ayi balete Saala kuli nguwe.

³ Bumwi bushiku mashiku Lesa wakaboneka kuli nguwe muciloto akwaamba ayi “Utoofwa mukwiinga wabwesa mwanakashi uyu weebetwe kale.”

⁴ Sombi Abimeleki ciindi ico kaatana kumushika pamubili, mpeeke wakaamba ayi, “Ono nebo Nkambo nshicite mulandu! Ono sa muncaaye abantu bangu?

⁵ Abulaamu mwiine wakandwiita ayi ngunankashi yakwe alakwe mwiine Saala wakasuminisha. Ici ndakacicita amiyeeyo iluleme alimwi taaku cibiibi ncendacita.”

⁶ Lyalo Lesa wakamwaambila muciloto ayi, “Ee ndishi kwaamba ayi ici wakacicita amiyeeyo iluleme. Aboobo ndakulama kwaamba ayi utabishi pameenso angu kwiinda mukumushika pamubili.

⁷ Ono mubooshe mwanakashi uyu kuli ibaye, mukwiinga ngumulaluki alimwi utookupaililaako kwaamba ayi utafwi. Ono na ubule kumuboosha ntookucenjesha kwaamba ayi webo abantu bako boonse mutoofwa.”

⁸ Macuunsacuunsa bushiku bwakaboolaawo, Abimeleki wakeeta boonse bacinenenene akubalwiita shoonse shakacitika. Mpeeke bakaloonda abuumbi.

⁹ Lyalo Abimeleki wakeeta Abulaamu akumwiipusha ayi, “Nciinshi ncewacita kuli ndiswe? Ncibiibinshi ncendacita kuli ndiwe calengesha kwaamba ayi ulete malwesa pali ndime abulelo bwangu boonse? Kutabi muntu nabi womwi weshi akaciboosheewo ncewacita kuli ndime.”

¹⁰ Lyalo Abimeleki wakeepusha Abulaamu ayi, “Ino wakalinga kuyeeyanshi pakucita cintu ici?”

¹¹ Abulaamu wakakumbula ayi, “Ndakayeeya kwaamba ayi taaku muntu muno nabi womwi uloonda akulemeka Lesa alimwi batooncaya kwaamba ayi babwese mukaangu.

¹² Ncakwiila ngunankashi yangu ceebo ngumwanaabo bata, sombi kuteshi bama, ono alimwi ndakamweeba.

¹³ Aboobo Lesa ndyaakantuma kuya kushishi sha bweensu kuswa pali bata, ndakamulwiita ayi, ‘Kutondesha kwaamba ayi ulinsuni, kuli koonse nkweshi tukaye, ulyeelete kulwiita muntu uli woonse ayi ndinandumi yako.’ ”

¹⁴ Mpeeke Abimeleki wakaboosha Saala kuli Abulaamu. Paciindi ceenka ico wakamupa mbelele, ŋombe alimwi abasha.

¹⁵ Lyalo wakaambila Abulaamu ayi, “Cishi cangu ulicibwene coonse mbocibete. Inga wekala pali poonse mpoosuni.”

¹⁶ Mpeeke wakaambila Saala ayi, “Ntoopa nandumi yako maali a silifa ali cuulu kwaamba ayi boonse mboli abo beshibe ayi tookwe kucitaawo cibiibi. Alimwi muntu uli woonse ulaakwishiba ayi mbweeke ubo.”

¹⁷ Lyalo Abulaamu wakapaila kuli Lesa. Mpomunyaawo alakwe wakashilika Abimeleki. Wakashilika amukaakwe alimwi abasha banakashi ayi bakonshe kushala.

¹⁸ Ceebo cakwe Saala muka Abulaamu, Mwaami Lesa wakalengesha ayi banakashi boonse ba kuŋanda yakwe Abimeleki babule nshalo.