Matalikilo 2 - Baibo Busansulushi Bwa Libuku Ili

¹ Munshila iyo liculu acishi ca panshi alimwi ashintu shoonse shiliimo shakamana kulengwa.

² Pabushiku bwasanu ashobilo Lesa wakalinga kumanishite kale shoonse nshaakalinga kucita. Pabushiku ubo wakookesha.

³ Bushiku ubu wakabupa coolwe akubusalasha, mukwiinga mbobushiku mbwaakookesha kuswa kumulimo woonse wakulenga ngwaakacita.

⁴ Ono mboboobo liculu acishi ca panshi mboshakalengwa. Mwaami Lesa ndyaakalenga liculu acishi ca panshi coonse,

Muntu mbwaakabisha

⁵ Tekwakalingawo shishango pacishi ca panshi alimwi nseke shoonse kashitana kumena, mukwiinga ciindi ico Mwaami Lesa kaatana kuloshawo mfula. Alimwi tekwakalinga muntu shikulima.

⁶ Nacibi boobo maanshi akalinga kuswa panshi, aboobo bulongo bwakalinga kutontola kumaanshi ayo.

⁷ Lyalo Mwaami Lesa wakabwesa bulongo panshi akubumbaamo muntu. Mpeeke wakamuyoyela muuya upa buumi mumashono, mpomunyaawo muntu uyo wakaba abuumi.

⁸ Kuswawaawo Lesa wakalima muunda muEdeni kwicwe, umo mwaakabika musankwa uyo ngwaakabumba.

⁹ Mpeeke wakalengesha ayi mumene shisamu shibotu akucata shisepo shibotu. Sombi pakati ka muunda pakalinga kwiimfwi cisamu cipa buumi, acisamu cipa lushibo lwa bubotu abubi.

¹⁰ Ono kwakalinga mulonga wakalinga kukunka kuswa muEdeni akutontosha muunda uyo. Lyalo kunembo wakalinga kubaanikamo yone.

¹¹ Utaanshi uleetwa ayi Pishoni alimwi ulakunka kushinguluka cishi coonse ca Afila.

¹² Kulya kulacanika Golodi ubotu, mafuta anunkila kabotu ayo atacanikicaniki alimwi amabwe amakwebo.

¹³ Wabili uleetwa ayi Gioni alimwi ulakunka kushinguluka cishi coonse ca Kushi.

¹⁴ Watatu uleetwa ayi Tigilisi, walo ulakunka kwicwe lya cishi ca Asilya. Wane nguYufuletisi.

¹⁵ Lyalo Mwaami Lesa wakabika muntu uyo mumuunda wa Edeni kwaamba ayi anooulima akuulama.

¹⁶ Ono wakaambila muntu ayi, “Inga walya cisepo ca cisamu cili coonse mumuunda,

¹⁷ sombi kutalya shisepo sha cisamu cipa lushibo lwa bubotu abubi. Mukwiinga waakulyabo, ncakwiila ulaakufwa.”

¹⁸ Ono Mwaami Lesa wakaamba ayi, “Tacibete kabotu musankwa kwikala eenka. Ntoomupangila shikumucafwa umweelete.”

¹⁹ Aboobo wakabwesa bulongo akubumba banyama abayuni boonse. Lyalo wakabaleta kumusankwa uyo ayi abape meena. Ono njenshila iyo boonse mobakabeta ameena.

²⁰ Mpeeke musankwa uyo wakapa meena banyama bafubwa, bayuni abanyama bamuluundu boonse, sombi taaku nabi womwi pali mbabo boonse wakacanika ayi ngushikumucafwa umweelete.

²¹ Lyalo Mwaami Lesa wakalengesha musankwa uyo koona cakufwa. Kaacilete, Lesa wakakusha lipinga lyomwi akuboosheshaawo munyefu pamusena wa ndilyo.

²² Mpomunyaawo wakapanga mwanakashi kuswa kulipinga ilyo akumupa kumusankwa.

²³ Mpeeke musankwa wakaamba ayi, “Ono uyu ncecifuwa ca shifuwa shangu, munyefu wa munyefu wangu. Ulaakunookwiitwa ayi, ‘Mwanakashi,’ ceebo waswa kumusankwa.”

²⁴ Paceebo ceeci musankwa ulaakushiya baishi abanyina akupaankana amukaakwe, lyalo balaba munyefu yomwi.

²⁵ Musankwa amukaakwe bakalinga matakosha, sombi tebakalinga kufwa nsoni.