Matalikilo 19 - Baibo Busansulushi Bwa Libuku Ili

Shibiibi sha bamuSodoma

¹ Baanjelo bobilo ndibakesa muSodoma macolesha, Loti wakalinga kushiite pamwinjililo wa ndabala inene iyo. Ingayi ababonebo wakanyamuka waya mukubaansha. Wakafukama akushisha ciwa panshi kunembo lyabo

² akwaamba ayi, “Nobamaami bangu, nebo ndiwaano kwaamba ayi mucaafwe. Ndasengesha ayi tushike kuŋanda yangu. Inga mwasambaako kushimpanta alimwi akoona kwaamba ayi ciilo mukafumebo kunooya palweendo lwanu.” Sombi bakakumbula ayi, “Ne, tutokoona pansengwe mweenka muno mundabala inene.”

³ Loti wakatolelela kubasenga, lyalo kumamanino bakasumina kuyaakwe kuŋanda. Mpeeke Loti wakapanga cimaande akubambila beensu cakulya cibotu. Ndicakabambwa bakalya.

⁴ Beensu abo kabatana kuya mukoona basankwa ba muSodoma bakashinguluka ŋanda iyo. Basankwa boonse bamundabala, banene abanike bakalingaawo apo.

⁵ Bakoolobesha kuli Loti ayi, “Bali kuli basankwa besa mukoona kokuno sunu? Bakushe utupe kuno!” Basankwa bene Sodoma abo bakalinga kusuni kukumanaabo.

⁶ Loti wakaya pansengwe akushiya wacalaako kumulyango.

⁷ Mpeeke wakabaambila ayi, “Nobeensuma, ndamusenga kwaamba ayi mutaciti cintu citonda ca mushobo uyu!

⁸ Nebo ndicite baana bamyooye bobilo batana kukumanaawo amusankwa. Amuleke mukushile, alimwi inga mwacitaabo cili coonse ncemusuni. Ono mutaciti nabi comwi abasankwa aba. Beensu aba bali muŋanda yangu, aboobo ndyeelete kubeemikanina.”

⁹ Sombi bakaamba ayi, “Swaako webo omuswamashi! Ndiwaani webo kutulwiita ncetweelete kucita? Swaako twiinde, na utoocita shitaala, nsheshi tucite kuli ndiwe, shitokwiinda nshitwalinga kusuni kucita pabasankwa abo.” Mpeeke bakashindika Loti akwisa ayi banyonyoole cisasa.

¹⁰ Sombi basankwa bobilo abo bakalinga muŋanda bakwelela Loti mukati akucala kumulyango.

¹¹ Lyalo bakalengesha basankwa boonse bakalinga pansengwe kuba boofu kwaamba ayi batakonshi kubona cisasa.

Loti mbwaakaswa muSodoma

¹² Mpomunyaawo basankwa bobilo abo bakaambila Loti ayi, “Na ulicitewo baana basankwa, banakashi, bakwe basankwa nabibo beshikamukowa bamwi bekala mundabala inene iyi, ubakusheemo

¹³ ceebo tutoonyonyoola musena uno. Mwaami Lesa wanyumfwa milandu iyoosha ya bantu aba, alimwi watutuma ayi tunyonyoole Sodoma.”

¹⁴ Lyalo Loti wakaya kubasankwa bakalinga bamamikila bana bakwe banakashi akubalwiita ayi, “Amweendeshe musweemo muno. Mwaami Lesa utoonyonyoola musena uno.” Sombi balo bakayeeya ayi utoosekanabo.

¹⁵ Kumuyamaca baanjelo bakatalika kwaambila Loti ayi, “Endesha bwesa mukaako abana bako banakashi musweemo muno kwaamba ayi mutafwiti kuntu komwi. Mwaami Lesa utoonyonyoola musena uno.”

¹⁶ Loti wakatonshatonsha. Nacibi boobo Mwaami Lesa wakamufwita nkumbu. Aboobo basankwa balya bakacata Loti, mukaakwe, abana bakwe banakashi pamaansa akubakusha mundabala iyo.

¹⁷ Mpeeke munjelo womwi wakaamba ayi, “Amucice mupuluke! Kutalanga kwisule alimwi kuteemikana muliwesa. Amucicile kutulundu kwaamba ayi mutacaikwi.”

¹⁸ Sombi Loti wakakumbula ayi, “Sobwe nkambo, mutatulengeshi kucita boobo.

¹⁹ Mwanyumfwila kale nkumbu alimwi mwapulusha buumi bwangu. Ono kutulundu kwalaampisha kucicilaako. Kunyonyoolwa uku kutooncanikisha akuncaya kaantana kushika kutulundu.

²⁰ Sa mwaibona ndabala iniini ilya? Ili pafwaafwi nkweenga ndacicila. Amusuminishe ncicile nkuko. Sa te njiniini abuumbi? Ncakwiila buumi bwaangu butoopulushikwa uko.”

²¹ Lakwe munjelo wakaamba ayi, “Ncibotu, ndasumina alimwi teshi nyonyoole ndabala ilya.

²² Kweendesha! Cica! Nshikoonshi kucita cintu nabi comwi kootana kushika kulya.” Ono mukwiinga Loti wakaamba ayi ndabala ilya njiniini, yakeetikwa ayi Sowa.

Kunyonyooka kwa Sodoma aGomola

²³ Loti wakashika kuSowa lisuba kaliswa.

²⁴ Mpomunyaawo Lesa wakalosha mulilo wa salufa paSodoma aGomola

²⁵ wanyonyoola mandabala ayo alimwi aliwesa pantu pomwi abantu boonse bakalingaamo alimwi asheesho shoonse shakalinga kumeneteemo.

²⁶ Sombi muka Loti wakalanga kwisule, mpeeke wakaaluka libwe lya mwiinyo.

²⁷ Macuunsacuunsa, bushiku bwakaboolaawo Abulaamu wakaya waawo mpwaakalinga kwiimfwi pameenso aMwaami Lesa.

²⁸ Wakalangilisha Sodoma aGomola aliwesa lyoonse. Mpeeke wakabona bwiishi kabusunta anga butooswa mumunyumbi unene.

²⁹ Sombi Mwaami Lesa ndyaakanyonyoola mandabala a muliwesa umo mwakalinga kwikala Loti, wakalinga kwiingashite kusenga kwakwe Abulaamu aboobo wakasuminisha Loti kuswaamo akuloboka.

Loti abana bakwe banakashi

³⁰ Ono ceebo cakwaamba ayi Loti wakalinga kuloondete kwikala muSowa. Lakwe abana bakwe bobilo banakashi bakalongela mutulundu akwikala mucimfwengo.

³¹ Bumwi bushiku mwaana munenebantu wakaambila mwanikebantu ayi, “Bata batooya cicembela ono taaku musankwa pafwaafwi kuno ngweenga watweeba ayi tushale baana kweelana ambocicitika mucishi ca panshi coonse.

³² Atukoleshe bata waini, lyalo tukumanaabo kwaamba ayi tulame mukowa kwiinda muli mbabo.”

³³ Mashiku ayo bakapa waini ishiwabo, mpeeke munenebantu wakakumanaabo. Ono bakakolwa cakwaamba ayi tabakwe kwishiba acakacitika.

³⁴ Bushiku bwakaboolaawo mwaana mwanakashi munenebantu wakaambila mwanikebantu ayi, “Ciilo mashiku ndakakumana abata. Tubanwishe waini alimwi mashiku awebo uye ukumanaabo kwaamba ayi tulame mukowa kwiinda muli mbabo.”

³⁵ Aboobo bakanwisha waini ishiwabo mashiku ayo aalo. Mpeeke alakwe mwanikebantu wakaya wakumanaabo. Alimwi tabakwe kwishiba cakacitika.

³⁶ Munshila iyi bana bakwe Loti bobilo banakashi mbobakamita kwiinda muli ishiwabo.

³⁷ Munenebantu wakashala mwaana musankwa uyo ngwaakatumba ayi Moabu. Wakalinga ngomushali mukulukulu wa baabo beetwa ayi bene Moabu shino nshiku.

³⁸ Mwanikebantu alakwe wakashala mwaana musankwa akumutumba ayi Benami. Wakalinga ngomushali mukulukulu wa baabo beetwa ayi bene Amoni shino nshiku.