Matalikilo 18 - Baibo Busansulushi Bwa Libuku Ili

Kushalwa kwakwe Isaki mbokwakashomeshekwa alimwi

¹ Mwaami Lesa wakaboneka kuli Abulaamu pamibanga ya kuMamule. Abulaamu ndyaakalinga kushiite pamulyango wa tente yakwe muciindi ca malumwi ndikupya bunene,

² wakeenamuka akubona bantu botatwe kabeemfwi pafwaafwi bulya. Ndyaakababonabo wakabacicilila kwaamba ayi abaanshe. Wakafukama akushisha ciwa panshi,

³ lyalo wakaamba ayi, “Nkambo, muteendilibo paŋanda yangu cakuteemikana. Ndiwaano kwaamba ayi mucaafwe.

⁴ Amuleke kuletwewo tumaanshi musambe kushimpanta. Amookeshe mucisamu umu.

⁵ Ntooletaawo atwakulya tweshi tumupeeko nkusu shakutolelela lweendo lwanu. Mwampa bulemu kwisa paŋanda yangu, ono amuleke mutebete.” Mpeeke bakakumbula ayi, “Twalumba, amucite mbomwaamba.”

⁶ Abulaamu wakeenda cakufwambaana wenjila mutente akwaambila Saala ayi, “Endesha nyamuna fulaulo wako wiindaawo kubota upange shinkwa.”

⁷ Mpeeke wakacicila kulitanga lya ŋombe, waya wasalawo moombe wacimoofu alimwi wiinite akupa musebenshi alakwe weendesha wamubamba.

⁸ Abulaamu wakabwesa bwaanda, mukupa, anyama ilya ya moombe akubambila beensu abo. Ciindi ndibakalinga kulya alakwe wakalinga pafwaafwi mucisamu mweenka umo.

⁹ Lyalo beensu abo bakeepusha Abulaamu ayi, “Ino mukaako Saala uli kuli?” Wakakumbula ayi, “Mwaali mulya mutente.”

¹⁰ Lyalo Mwaami Lesa wakaamba ayi, “Ncakwiila ndaakwisa kuli ndiwe paciindi ceenka cino mwakali, alimwi Saala mukaako ulaakushala mwaana musankwa.” Ico ciindi Saala kaalibo kwisule lyakwe pamulyaango wa tente alimwi kaakutika.

¹¹ Abulaamu aSaala bakalinga bacembela abuumbi alimwi Saala kaacilekete kale akukubala.

¹² Aboobo Saala wakaseka mwiine eenka akwaamba ayi, “Ono bulya mbondacembela akumana nkusu sa inga kukumana abamaandaangu kwankonda? Alimwi abalo bamaandaangu bakula.”

¹³ Lyalo Mwaami Lesa wakeepusha Abulaamu ayi, “Ino Saala wasekelanshi akwaamba ayi, ‘Sa ncakwiila inga ndaba amwaana bulya mbondacembela?’

¹⁴ Sa kuliiwo ciyumu kuMwaami Lesa? Ono bweenka mbondaambaawo kale ayi ndaakwisa kuli ndiwe paciindi ceelete mwakali alimwi Saala ulaakushala mwaana musankwa.”

¹⁵ Ono mukwiinga Saala wakaloonda, wakakaka ayi, “Nshikwe kusekaawo nebo.” Sombi lakwe wakakumbula ayi, “Ee waseka, utakaki.”

Abulaamu mbwaakasengelaako bene Sodoma cankusu

¹⁶ Mpeeke basankwa abo bakaya pamusena apo ndabala ya Sodoma mpoyakalinga kukonsha kuboneka. Abulaamu alakwe wakayaabo kwaamba ayi abashindikishe mulweendo lwabo.

¹⁷ Mwaami Lesa wakalyaamboosha ayi, “Teshi mushiise Abulaamu ncentooyanda kucita.

¹⁸ Bamulunyungu lwakwe balaakuba mushobo unene wiindaawo, alimwi nkwiinda muli nguwe mweshi nkapete coolwe mishobo yoonse.

¹⁹ Ndamusala kwaamba ayi aambile bana bakwe abamulunyungu lwakwe ayi banyumfwile akucita shiluleme. Mukucita boobo, ndaakumucitila shoonse nshindakamulasha.”

²⁰ Lyalo Mwaami Lesa wakaambila Abulaamu ayi, “Kuli milandu iyoosha pali Sodoma aGomola, alimwi kubisha kwabo nkunene abuumbi.

²¹ Ndyeelete kuyaako kwaamba ayi nkaboneshe na ncakwiila milandu njendakanyumfwa njancinencine.”

²² Mpeeke basankwa bobilo abo bakanyamuka baya kuSodoma, sombi Mwaami Lesa wakacaala aAbulaamu.

²³ Lyalo Abulaamu wakasena kuMwaami Lesa akwiipusha ayi, “Sa mutoonyonyoola cancinencine bacite milandu abatacite?

²⁴ Ino na muli bali makumi osanwe batacite milandu, sa mutoonyonyoola ndabala yoonse? Sa teshi mukailekelele kwaamba ayi mupulushe baabo bali makumi osanwe?

²⁵ Ndushinisho teshi mucaye batacite milandu pantu pomwi abacite milandu. Tamukoonshi kucita boobo, ceebo na mwacita boobo, nkokwaamba ayi batacite milandu batootondeshekwa bukali pantu pomwi abacite milandu. Ono ico tacicitiki. Moomboloshi wa cishi coonse ulyeelete kucita shintu cabululami.”

²⁶ Mwaami Lesa wakakumbula ayi, “Na ncane bantu bali makumi osanwe batacite milandu, teshi nyonyoole ndabala yoonse ceebo cabo.”

²⁷ Abulaamu wakabooshaawo alimwi ayi, “NoBaami baLesa, ndaseenga mundekelele kutolelela kwaamba amwebo. Nebo ndibo anga ndusuko nabi milota alimwi nshicite nkusu shakwaamba cili coonse.

²⁸ Cimwi ciindi inga kamulibo bali makumi one abosanwe batacite milandu kuteshi bali makumi osanwe. Sa mutoonyonyoola ndabala ceebo ca bosanwe babulila?” Mwaami Lesa wakakumbula ayi, “Teshi nyonyoole ndabala na ncaneemo bali makumi one abosanwe batacite milandu.”

²⁹ Abulaamu wakabooshaawo alimwi ayi, “Ino na kucanikebo bali makumi one?” Mwaami Lesa wakakumbula ayi, “Teshi njinyonyoole na ncaneemo bali makumi one.”

³⁰ Abulaamu wakaamba ayi, “NoBaami baLesa, mutakalali, ndisuni kwiipusha alimwi. Ino ono na kulibo bali makumi otatwe?” Lakwe wakakumbula ayi, “Teshi njinyonyoole na ncaneemo bali makumi otatwe.”

³¹ Abulaamu wakaamba ayi, “NoBaami baLesa, ndasengesha mundekelele kuyanda kwiipushisha. Ino na mwacanaakobo bali makumi obilo?” Wakakumbula ayi, “Teshi njinyonyoole ndabala na ncaneeko bali makumi obilo.”

³² Abulaamu wakaamba ayi, “NoBaami baLesa ndaseenga mutakalali njipushe cakweelaako. Ino na kucanikebo bali likumi?” Wakakumbula ayi, “Teshi njinyonyoole na kucanike bali likumi.”

³³ Mwaami Lesa ndyaakamanisha kwaamba aAbulaamu wakaya, alakwe Abulaamu wakaboolela kumishaabo.