Matalikilo 17 - Baibo Busansulushi Bwa Libuku Ili

Kupalula ncitondesho ca cipangano

¹ Abulamu ndyaakaba amyaaka ili 99, Mwaami Lesa wakaboneka kuli nguwe akwaamba ayi, “Ndime Lesa Shinkusu shoonse. Nyumfwile alimwi kocita shiluleme lyoonse.

² Ndaakupanga cipangano cangu andiwe akukupa bamulunyungu lwako baanji.”

³ Abulamu wakafukama akushisha ciwa panshi, lyalo Lesa wakaamba ayi,

⁴ “Cipangano cangu nceeci. Ndashomesha kwaamba ayi ulaakuba mushali mukulukulu wa mishobo iinji.

⁵ Liina lyako teshi linoocili ayi Abulamu sombi ayi Abulaamu. Ceebo ntookulengesha ayi ube mushali mukulukulu wa mishobo iinji.

⁶ Ndaakukupa bamulunyungu lwako baanji cakwaamba ayi bamwi balaakuba bamaami. Bamulunyungu lwako balaakufula cakuba mishobo iinji.

⁷ “Ndaakucita mbondashomesha kuli ndiwe akubamulunyungu lwako mumyaaka iinji itoosa kweelana ambocili ncipangano camuyayaya. Ndaakuba Lesa wako awa bamulunyungu lwako.

⁸ Ndaakukupa cishi ici umo bulya mooli mweensu. Cishi ici ca Kenani coonse cilaakuba ca bamulunyungu lwako kwamuyayaya alimwi ndaakuba Lesa wabo.”

⁹ Lesa wakaambila Abulaamu ayi, “Awebo ulyeelete kusumina ayi ulaakulama cipangano cangu, pantu pomwi abamulunyungu lwako abo beshi bakabeeko kunembo.

¹⁰ Webo abamulunyungu lwako mulyeelete kusumina kupalula basankwa boonse pakati kanu.

¹¹ Kuswa sunu mulyeelete kupalulwa kwaamba ayi cibe citondesho ca cipangano pakati kanu anebo.

¹² Kulilabo mwaana musankwa na wakwanisha nshiku shosanwe ashotatwe kubikaako abasha bashalilwa mumaanda anu alimwi abaabo boolwa kubaswamashi balyeelete kupalulwa mbomunya ubo.

¹³ Womwi awomwi ulyeelete kupalulwa, alimwi ici cilaakuba citondesho ciboneka pamibili yanu kwaamba ayi cipangano cangu ncamuyayaya.

¹⁴ Musankwa uli woonse utana kupalulwa teshi anoociyeeyelwa kuba mulikoto lya bantu bangu, ceebo taakwe kulama cipangano cangu.”

¹⁵ Lesa wakaambila Abulaamu ayi, “Ucileeke ono kwiita mukaako ayi Salai, kuswa sunu liina lyakwe nguSaala.

¹⁶ Ndaakumupa coolwe alimwi ndaakukupa mwaana kwiinda muli nguwe. Ndaakumupa coolwe, alimwi ulaakuba mushali mwanakashi wa mishobo iinji. Pakati ka bamulunyungu lwakwe palaakuba abamaami.”

¹⁷ Abulaamu wakafukama akushisha ciwa panshi, sombi wakatalika kuseka ndyaakayeeya ayi, “Sa musankwa ulakonsha kuba amwaana na waba amyaaka ili 100? Sa Saala inga washala mwaana bulya mbwaashisha myaaka ili 90?”

¹⁸ Mpeeke wakeepusha Lesa ayi, “Ino kulekabo Ishimaeli waba njempyani ya buboni bwangu?”

¹⁹ Sombi Lesa wakaamba ayi, “Sobwe taakoonshi. Saala mukaako ulaakukushalila mwaana musankwa alimwi ulaakumutumba ayi Isaki. Ndaakulama cipangano cangu anguwe pantu pomwi abamulunyungu lwakwe lyoonse alyoonse. Cipangano ici ncamuyayaya.

²⁰ Ndanyuumfwa kusenga kwako pali Ishimaeli, aboobo ntoomupa coolwe cakuba abaana alimwi abamulunyungu lwakwe baanji. Ulaakuba mushali wa baleli bali likumi abobilo alimwi ndaakulengesha ayi bamulunyungu lwakwe babe mushobo unene.

²¹ Sombi cipangano cangu ndaakucilama amwanaako musankwa Isaki, uyo Saala ngweshi akashale paciindi ceenka cino mwakali.”

²² Lesa ndyaakamanisha kwaamba aAbulaamu, wakamushiya.

²³ Pabushiku bweenka ubo Abulaamu wakacita bwakamulwiita Lesa akupalula mwanaakwe Ishimaeli alimwi abasankwa bamwi boonse bamuŋanda yakwe, pantu pomwi abasha boonse bakashalilwa muŋanda yakwe alimwi abaabo mbaakoolabo.

²⁴ Abulaamu wakalinga kucite myaaka ili 99 ndyaakapalulwa.

²⁵ Ishimaeli mwanaakwe lakwe wakalinga kucite myaaka ili 13.

²⁶ Boonse bobilo bakapalulwa bushiku bomwi,

²⁷ pantu pomwi abasha bakwe Abulaamu boonse.