Matalikilo 15 - Baibo Busansulushi Bwa Libuku Ili

Cipangano lesa ncaakapanga aAbulamu

¹ Kuswawaawo Abulamu wakanyumfwa Mwaami Lesa kaamba kuli nguwe anga muciloto ayi, “Utaloondi Abulamu, ntookulama kucintu cili coonse ceenga canyonyoola buumi bwako akukupa cilambu cinene abuumbi.”

² Sombi Abulamu wakakumbula ayi, “NoBaami Beshinkusu shoonse, nebo nshiciteewo mwaana, ino cilambu canu cilicite mpindunshi kuli ndime? Eliyasa eenkabo wa kuDamasikasi njempyani yangu.

³ Tamukwe nkupaawo baana, aboobo womwi pabasha bangu ulaakubwesa buboni bwangu ndaakufwa.”

⁴ Lyalo wakanyumfwa Mwaami Lesa kaamba alimwi kuli nguwe ayi, “Musha uyu Eliyasa, teshi ngweshi akabwese buboni bwako waakufwa. Mwaana musankwa wakushala omwiine ngweshi akabwese buboni bwako.”

⁵ Mwaami Lesa wakatola Abulamu pansengwe akwaamba ayi, “Langilisha mwiculu alimwi weeleshe kubelenga nyenyeenshi. Ncakwiila ulaakuba abamulunyungu lwako baanji anga ninyenyeenshi.”

⁶ Abulamu wakashoma Mwaami Lesa, aboobo Lesa wakamwaamba ayi uliluleme.

⁷ Lyalo Mwaami Lesa wakamwaambila ayi, “Ndime Mwaami wakakukusha mundabala ya Ulu mucishi ca Babiloniya kwaamba ayi nkupe cishi cino ayi ncaako.”

⁸ Sombi Abulamu wakeepusha ayi, “NoBaami Beshinkusu shoonse, ino inga ndeshiba buyani ayi ncaangu?”

⁹ Mwaami wakamwaambila ayi, “Ndetele mpwishi yomwi, mpongo, ambelele isankwa. Shoonse ishi shilyeelete kuba amyaaka yotatwe. Undetele ankulimba yomwi alimwi ampolobe.”

¹⁰ Abulamu wakaleta banyama abo, wakabatimbula pakati akubika shipimpita shilya lubamba mumindando yobilo. Nakubi boobo bayuni taakwe kubatimbula.

¹¹ Makubi akesa pabanyama abo, sombi Abulamu wakaatandaawo.

¹² Lisuba ndilyakalinga kuya cipila, Abulamu wakoona mutulo. Mpeeke munshinshe ulemu alimwi uyoosha wakesa pali nguwe.

¹³ Lyalo Mwaami Lesa wakamwaambila ayi, “Bamulunyungu lwako balaakuba beensu mucishi citeshi cabo. Balaakuba basha uko akweendeleshekwa calunkutwe kwamyaaka ili 400.

¹⁴ Sombi ndaakutondesha bukali kucishi ico ceshi cikabatole busha. Pakuswaako kucishi uko balaakubwesa buboni buunji abuumbi.

¹⁵ Webo omwiine ulaakwikala buumi buswite kushika kubucembele, ulaakufwa muluumuno akubikwa.

¹⁶ Palaakwiinda myaaka ili 400 kwaamba ayi bamulunyungu lwako bese mucishi cino, ceebo bene Amoli teshi nkabatandeemo kabatana kuba bamucita shibi beelete kutondeshekwa bukali.”

¹⁷ Lisuba ndilyakapila, lyalo pashiya, mupika wa mulilo wakalinga kusunta, acimunimweenge ca mulilo cakalinga kunyaka shakaboneka cakufwambaana akwiinda pakati ka mindando ya shipimpita sha banyama.

¹⁸ Lyalo apo peenka Mwaami Lesa wakapanga cipangano aAbulamu wakaamba ayi, “Ndashomesha kupa bamulunyungu lwako cishi coonse ici kuswa kumanyinsa aIjipiti kushika akuMulonga wa Yufuletisi,

¹⁹ kubikaako acishi ca bene Keni, bene Kenisi, bene Kadimoni,

²⁰ bene Iti, bene Pelisi, bene Lefayi,

²¹ bene Amoli, bene Kenani, bene Gegashi alimwi abene Jebusi.”