Matalikilo 14 - Baibo Busansulushi Bwa Libuku Ili

Abulamu mbwaakafuna Loti

¹ Paciindi ici Amulafelo mwaami wa cishi ca Babiloniya, Alioki mwaami wa Elasa, Cedalaoma mwaami wa Elamu, aTidali mwaami wa Goiimu,

² bakaya mukulwana aBela mwaami wa Sodoma, Belisha mwaami wa Gomola, Shinabu mwaami wa Adima, Shemeba mwaami wa Seboyimu alimwi amwaami wa Bela nkokwaamba ayi Sowa.

³ Aba bali bosanwe bacaalila bakabungana pantu pomwi akupanga likoto lyomwi lya bashilumamba mucinyika ca Sidimu ico bulya ciitwa ayi Lweenge lwa Mwiinyo.

⁴ Kwa myaaka ili likumi ayobilo bakalinga kweendeleshekwa aCedolaoma, sombi mumwaaka wa likumi ayotatwe bakamubukila.

⁵ Mumwaaka wa likumi ayone Cedalaoma abaabo mbwaakalinga kucatenaabo pantu pomwi bakaya mukulwana akukoma bene Lefayi muAshitaloti Kanaimu, baSusimu muAmu, baEmi muliwesa lya Kilyataimu,

⁶ abene Oli mutulundu twa Edomu, kubakonkela kushika akuElipalani kweela lya luyanga.

⁷ Lyalo bapiluluka akuboola kuKadeshi iyo yakalinga kwiitwa ayi Eni Mishipati. Bakakoma cishi ca bene Amaleki abene Amoli abo bakalinga kwikala muAsasoni Tamala.

⁸ Mpeeke mwaami wa muSodoma, Gomola, Adima, Seboyimu alimwi awa muBela bakabunganya bashilumamba babo kwaamba ayi baye kunkondo mucinyika ca Sidimu akulwana

⁹ bamaami ba Elamu, Goiimu, Babiloniya alimwi aElasa. Bamaami bosanwe kulwana bali bone.

¹⁰ Cinyika cilya cakalinga kuswitebo shikaanda mwakalinga kuswa manenekela. Aboobo mwaami wa muSodoma awa muGomola na beelesha kucica nkondo bakalinga kuwita mushikaanda isho, sombi bamaami bamwi botatwe bakacicila kutulundu.

¹¹ Lyalo bamaami bone balya bakabwesa shintu shoonse muSodoma aGomola kubikaako ashakulya, mpeeke baya.

¹² Ono Loti, mwiicwa wakwe Abulamu, wakalinga kwikala muSodoma, aboobo bakamutola ashintu shakwe shoonse.

¹³ Mpomunyaawo musankwa wakaloboka akuya mukuluula shoonse ishi kuli Abulamu muEbulu. Abulamu uyo wakalinga kwikala pafwaafwi amibanga yakwe Mamule mwine Amoli, mukwabo Eshikoli alimwi aAneli. Bamukowa aba boonse Abulamu mbwaakalingaabo pantu pomwi.

¹⁴ Abulamu ndyaakanyumfwa kwaamba ayi mwiicwa wakwe watolwa busha, wakabunganya basankwa beshikulwana pamisumba yakwe abo bakalinga kushika 318 boonse pantu pomwi. Mpeeke bakakonkela bamaami abo kuya mukushika akuDani.

¹⁵ Kulya wakapansaanya bantu bakwe mutukototukoto, bakalwana beshinkondonyinaabo mashiku akubakoma. Wakabatandaanya akubashisha kuOba kumatwa a Damasikasi.

¹⁶ Shintu shoonse shakalinga shatolwa wakashiboosha. Loti mwiicwa wakwe alakwe wakamupilusha ashintu shakwe shoonse, balutundu alimwi abamwi bantu bakaangilwa pantu pomwi.

Melikisedeki mbwaakapa coolwe Abulamu

¹⁷ Abulamu ndyaakaboola kuswa mukukoma Cedalaoma abamaami mbwaakalinga kucafwanaabo, mwaami wa Sodoma wakesa mukumwaansha mucinyika ca Shafe, nkokwaamba ayi cinyika ca mwaami.

¹⁸ Lyalo Melikisedeki mwaami wa Salemu wakaleta shinkwa awaini. Melikisedeki wakalinga mupailishi munene wakwe Lesa wakwiculu Wiindaawo.

¹⁹ Wakapa coolwe Abulamu akwaamba ayi, “Lesa wakwiculu Wiindaawo, uyo wakalenga liculu acishi ca panshi, ape coolwe Abulamu.

²⁰ Aalumbwe Lesa wakwiculu Wiindaawo, uyo wakakupa nkusu shakukoma beshinkondonyoko.” Mpeeke Abulamu wakapa Melikisedeki calikumi pashintu shoonse nshaakapilusha.

²¹ Lyalo mwaami wa Sodoma wakaambila Abulamu ayi, “Shintu shoonse nshiwapilusha nshaako, sombi nebo umpekobo bantu bangu.”

²² Abulamu wakakumbula ayi, “Ndashinisha pameenso aMwaami Lesa wakwiculu Wiindaawo, mulengi wa liculu acishi ca panshi,

²³ ayi teshi ncaaleewo acintu cili coonse caanu, busalu nabi intambo ya kunsapato. Mukwiinga ubo ndyeshi mukabule kwaambaawo ayi, ‘Ndime ndakalengesha Abulamu kubila.’

²⁴ Taaku nceshi mbweseewo ayi ncaangu. Ntootambulabo isho bantu bangu nshibasebensesha. Nakubi boobo abo mbooncafwanaabo munkondo Aneli, Eshiko aMamule balo bapekwe shibeelete.”