Matalikilo 13 - Baibo Busansulushi Bwa Libuku Ili

Abulamu aLoti mbobakapansaana

¹ Abulamu wakaya kumatwa ndyaakaswa muIjipiti wakaya kucipansha ca kumalenge ca Kenani pantu pomwi amukaakwe alimwi ashintu shakwe shoonse. Loti alakwe wakayaakwe.

² Abulamu wakalinga mubile abuumbi mubanyama bafubwa alimwi asilifa agolodi.

³ Mpeeke wakanyamuka apo, kaaya cituntulukabo musena amusena kuya kuBetelo. Wakashika kumusena uyo uli pakati ka Betelo aAyi apo pakalinga misumba yakwe kataanshi,

⁴ alimwi apo mpwaakalinga wayaka cipaililo. Apo Abulamu wakalambila Mwaami Lesa.

⁵ Loti alakwe wakalinga kucite mbelele, mpongo aŋombe, alimwi abamuŋanda yakwe kubikaawo abasebenshi.

⁶ Aboobo tepakalinga musena unene wakwaamba ayi bekale bobilo pantu pomwi, ceebo bakalinga kufubite abuumbi.

⁷ Alimwi kwaambana kwakatalika pakati ka beembeshi bakwe Abulamu abakwe Loti. Paciindi ico bene Kenani abene Pelisi abalo bakalinga kunoocikala mucishi ceenka ico.

⁸ Aboobo Abulamu wakaambila Loti ayi, “Patabi kwaambana pakati kako anebo, nabi pakati ka beembeshi bako abaangu ceebo tuli bamukowa.

⁹ Ono atupansaane. Usale musena uli woonse ngoosuni. Nkokwaamba ayi webo uye kulubasu lumwi anebo luumbi.”

¹⁰ Loti wakalangalanga akubona kwaamba ayi cinyika coonse ca Joodani, kuyabo akuSowa, cakalinga kucite maanshi abuumbi, anga ngumuunda wa Mwaami Lesa nabi cishi ca Ijipiti. Ici cakalinga nciindi Mwaami Lesa kaatana kunyonyoola mandabala anene a Sodoma a Gomola.

¹¹ Mpeeke Loti wakasala cinyika ca Joodani akusenaako kwicwe. Ubo mbobakapansaana bobilo abo.

¹² Abulamu wakekala muKenani alakwe Loti wakekala pakati ka mandabala anene akalinga munyika ya Joodani. Misumba yakwe wakaiyakila pafwaafwi aSodoma

¹³ umo mwakalinga bantu beshikubisha alimwi bakalinga kubisha abuumbi pameenso aMwaami Lesa.

Abulamu mbwaakaya kuEbuloni

¹⁴ Loti ndyaakaya, Mwaami Lesa wakaambila Abulamu ayi, “Kuswawaawo mpoobete, langishisha kabotu kumatwa akumalenge, kwicwe akumbo.

¹⁵ Cishi coonse ici ncewabona ntookupa abamulunyungu lwako, alimwi cilaakunoolibo caako muyayaya.

¹⁶ Ndaakukupa baana baanji cakwaamba ayi taaku eshi akakonshe kubabelenga. Nkokwaamba ayi na muntu wakonsha kubelenga museese, inga wakonsha kubelenga abamulunyungu lwako.

¹⁷ Ono koya ucishinguluke cishi coonse ici mukwiinga ntookupa coonse.”

¹⁸ Mpeeke Abulamu wakalonga akuyaka misumba yakwe pafwaafwi amibanga ya kuMamule muEbuloni. Uko nkwaakayakila Mwaami Lesa cipaililo.