Matalikilo 11 - Baibo Busansulushi Bwa Libuku Ili

Caanda cilaamfu ca Babiloni

¹ Pakutaanguna bantu boonse bamucishi bakalinga kucitebo mulaka womwi alimwi bakalinga kusebenseshabo maswi a mulaka weenka uyo.

² Ono mukweendaanaendaana kwicwe bakashika kucinyika ca Babiloniya akwikala kweenka uko.

³ Mpeeke boonse bakaamba ayi, “Kamwisa tuume ncelwa akushitenta kabotu.” Bakasebensesha ncelwa kuteshi mabwe, bakalinga kuyakisha manenekela.

⁴ Lyalo bakaamba ayi, “Ono atuyake ndabala inene acaanda cilaamfu cishika kwiculu, kwaamba ayi tupange liina, akwaamba ayi tutapalanganini mucishi ca panshi.”

⁵ Mpeeke Mwaami Lesa wakesa panshi mukubona ndabala inene acaanda cilaamfu ico cakayaka bantu abo,

⁶ akwaamba ayi, “Ono aba bantu boonse mbamushobo womwi alimwi balaamba mulaka womwi. Aya ngamatalikilo aceeco nceshi banoocita. Onoono bantu aba bananookonsha kucita cili coonse ncebasuni!

⁷ Atuye panshi tuye tufulunganye mulaka wabo kwaamba ayi banoobula kunyumfwana womwi awomwi.”

⁸ Aboobo Mwaami Lesa wakabapalanganishisha kumbasu shoonse sha cishi ca panshi, lyalo bakacileka kuyaka ndabala inene iyo.

⁹ Ndabala inene iyo yakeetwa ayi Babiloni ceebo uko Mwaami Lesa wakafulunganya mulaka wa bantu boonse, alimwi nkuswa kooko nkwaakapalanganishisha bantu kuya mumbasu shoonse sha cishi ca panshi.

Bamulunyungu lwakwe Shemu

¹⁰ Bamulunyungu lwakwe Shemu mbaaba. Ndipakeenda myaaka yobilo muyoba ndiwakamana, Shemu ndyaakakwanisha myaaka ili 100, wakashala mwaana musankwa, Afakisadi.

¹¹ Kuswawaawo wakekala aimwi myaaka ili 500 alimwi wakashala baana abamwi basankwa abanakashi.

¹² Afakisadi ndyaakakwanisha myaaka ili 35, wakashala mwaana musankwa, Shela.

¹³ Kuswawaawo wakekala aimwi myaaka ili 403 alimwi wakashala baana abamwi.

¹⁴ Shela ndyaakaba amyaaka ili 30, wakashala mwaana musankwa, Eba.

¹⁵ Kuswawaawo wakekala aimwi myaaka ili 403 alimwi wakashala baana abamwi.

¹⁶ Eba ndyaakaba amyaaka ili 34, wakashala mwaana musankwa, Pelegi.

¹⁷ Kuswawaawo wakekala aimwi myaaka ili 430 alimwi wakaba abaana basankwa abanakashi.

¹⁸ Pelegi ndyaakaba amyaaka ili 30, wakashala mwaana musankwa, Leu.

¹⁹ Kuswawaawo wakekala aimwi myaaka ili 209 alimwi wakashala baana abamwi.

²⁰ Leu ndyaakaba amyaaka ili 32, wakashala mwaana musankwa, Selagi.

²¹ Kuswawaawo wakekala aimwi myaaka ili 207 alimwi wakashala baana abamwi.

²² Selagi ndyaakaba amyaaka ili 30, wakashala mwaana musankwa, Nawoli.

²³ Kuswawaawo wakekala aimwi myaaka ili 200 alimwi wakashala baana abamwi.

²⁴ Nawoli ndyaakaba amyaaka ili 29, wakashala mwaana musankwa, Tela.

²⁵ Kuswawaawo wakekala aimwi myaaka ili 119 alimwi wakashala baana abamwi.

²⁶ Tela ndyaakaba amyaaka ili 70, wakashala baana basankwa, Abulamu, Nawoli, alimwi aAlani.

Bamulunyungu lwakwe Tela

²⁷ Bamulunyungu lwakwe Tela mbaaba. Tela wakalinga ishi Abulamu, Nawoli alimwi aAlani. Alani ngowakashala Loti,

²⁸ alimwi wakafwita mundabala ine mishaabo yakalinga kwiitwa ayi Ulu ili muBabiloniya, baishi kabacili boomi.

²⁹ Abulamu wakeeba Salai, alakwe Nawoli wakeeba Milika mwanaakwe Alani mwanakashi. Alani wakalinga ishi Milika alimwi aIsika.

³⁰ Salai taakalinga kushala.

³¹ Tela wakanyamuka amwanaakwe musankwa Abulamu, Loti mushikulu wakwe uyo wakalinga mwanaakwe Alani, Salai mulokashi wakwe uyo wakalinga muka Abulamu, akuya kuKenani kuswa mundabala inene ya Ulu mucishi ca Babiloniya. Bakaya amukushika kuAlani uko nkobakaya mukwikala.

³² Tela wakafwa kaacite myaaka ili 250.