Malilo 5 - Baibo Busansulushi Bwa Libuku Ili

Mupailo Wakusenga Nkumbu

¹ NoBaami baLesa, amwiibaluke ico cacitika kuli ndiswe. Amulangilishe mbotwasebaana.

² Buboni bwesu babutola baswamashi, ee, maandeesu abwesekwa abaswamashi.

³ Twaba bamucaala batacite bamaishiwabo, bamanyinawesu bacaala bumukalubinje.

⁴ Maanshi akunwa tuloola akuula. Ashalo nkuni kushibona nkuula.

⁵ Abo batoosa citutandaanya batweensha. Twalema, sombi kookesha ncikumbo.

⁶ Twakalyaababo mumaansa a bene Ijipiti abene Asilya kwaamba ayi tucane cakulya.

⁷ Bamashali besu bakulukulu bakabisha akuloba. Ono bulya swebo twafwita calya nkanga.

⁸ Abo batootulela balyeeletebo kuba basha. Taaku nabi womwi ukonsha kutufuna mumaansaabo.

⁹ Tuleensha buumi mumaanseesu pakuyandoola cakulya mukwiinga muluyanga muli bacayi.

¹⁰ Cikanda cesu citoolungula anga mumunyumbi. Ncakwiila nsala yalengesha mibili yesu kupya.

¹¹ Bamakeesu batookumanishikwa cakubakakatisha paKalundu ka Siyoni. Abalo bamyooye mumandabala oonse a mucishi ca Juda cililo cankumo ncimwi.

¹² Banaamwaami baangilila kumaansaabo akubaleleesha. Abalo bamaloba tabatoolemekwaawo, sobwe.

¹³ Bacikula bwangu basankwa batoopenga kupelela busu. Abalo banike basankwa balaya citalantanta ceebo cakulemenwa mile ya nkuni.

¹⁴ Bamaloba bamana kuswaako kuminjililo ya ndabala. Abalo bacikula bwangu bacileka kwiimba nyimbo.

¹⁵ Kusangalala kwamana kumyoyo yesu akwalo kushana kwaba nkulila.

¹⁶ Shintu nshetwakalinga kulisumpwitaawo shamana. Mapensho kuli ndiswe mukwiinga twakabisha.

¹⁷ Myoyo yesu yalefuka, meenso esu tatoolasha kabotu

¹⁸ ceebo Kalundu ka Siyoni kacaalabo mumatongo, ncakwiila bamwaaba batokwiindaanabo mumatongo a nkako.

¹⁹ NoBaami baLesa, ndimwe mulela kwalyoonse alyoonse, cuuna canu cabulemu cilalela kuswa kulishalane lyomwi kushikila akulimwi.

²⁰ NoBaLesa ino ceebonshi mulatuluba lyoonse? Ino mwatulekelela buyani kwaciindi cilaamfu?

²¹ NoBaami baLesa amutubooshe kuli ndimwe atupilukile kuli ndimwe. Amulengeshe nshiku shesu shibe shabulemu mbuli shikulukulu.

²² NoBaami baLesa, sa mwatukaka kwamuyayaya? Sa bukali bwanu buyoosha teshi bukamaane?