Malilo 4 - Baibo Busansulushi Bwa Libuku Ili

Jelusalemu Pakumana Kukomwa

¹ Ino golodi wabica buyani? Golodi wiine wiine wacileka buyani kubekabeka? Mabwe amakwebo a Ŋanda yakwe Lesa apalanganina mumikwakwa ya ndabala yoonse.

² Amubone basankwa bacikula bwangu bene Siyoni abo bakalinga kusunikwi anga ngugolodi kuli ndiswe kalekale bulya bababo anga ninongo, ee, mulimo wa maansa a mubumbi.

³ Nabi bamwaaba balayamwisha bana babo, sombi bantu bangu baba amyoyo ibiibi anga nintibatiba muluyanga.

⁴ Mukwiinga wa nyotwa milaka ya bakateta babo yacatilila kwiculu lya milomo yabo. Baana balasenga shinkwa, sombi taaku nabi womwi ubapaawo.

⁵ Bantu abo bakalinga kulya shibotu, batalika kufwa nsala mumikwakwa. Bantu bakalinga kufwala shakufwala shamakwebo, sunu baloonabo mumilota kuntantaala.

⁶ Mulandu wakapekwa bantu bangu wakeenda wooyo wakapekwa Sodoma, ndabala iyo yakanyonyoolwa cakufwambaana, ncakwiila kwakubula awiifunaako.

⁷ Banaamwaami babo bakalinga tuu anga ninkobokobo, ncakwiila kutuba kwiinda mukupa. Ayalo mibili yabo yakalinga ibotu kwiinda mabwe amakwebo eetwa ayi lubi. Ndushinisho bakalinga kuboneka anga ngamabwe eetwa ayi Safaya.

⁸ Ono bulya bashiya kwiinda mashimbi. Ncakwiila bulya tabashibikiiwo mumikwakwa. Cikanda cabo calamatila kushifuwa shabo. Ee, shaboolabo nta anga nkasamu kayumu.

⁹ Abo bakacaikwa munkondo bali kabotu kwiinda baabo bafwa kunsala. Abo bafwa kunsala balanyanga mukubula cakubika pamulomo ciswa kumyuunda.

¹⁰ Banakashi beshinkumbu bakateleka bana babo amaansaabo beene ayi cibe cakulya cabo. Bakacita boobo bantu bangu ndibakanyonyoolwa.

¹¹ Mwaami Lesa wakusha bukali bwakwe boonse, ee, wapoomona bukali bwakwe buyoosha. Wakanyansha mulilo mundabala ya Siyoni uyo wakeetenta cakushika akulwiimbi lwa njiyo.

¹² Bamaami ba pacishi ca panshi tabakwe kushoma, kubikaawo abantubo bamwi kwaamba ayi balwani babo inga benjila paminjililo ya ndabala ya Jelusalemu.

¹³ Sombi cakacitika mukwiinga wa shibiibi sha balaluki babo amicito ibiibi ya bapailishi abo bakatila bulowa bwa bantu baluleme.

¹⁴ Bulya batooya cipampanshila kwakuya anga mboofu. Balisombelete abuumbi kubulowa mbobakatila. Aboobo taaku muntu nabi womwi weenga wabakumya.

¹⁵ Bantu baloolobesha ayi, “Kamuya kooko! Tamusalalite! Kamuya kooko! Kamuya kooko! Mutatucaati!” Na baya ciingaila bantu ba mumishobo balacaala kabaamba ayi, “Tabakoonshi kutolelela kwikala aswebo kuno!”

¹⁶ Mwaami Lesa mwiine ngowakabapalanganya, taababikiiko amaano, sobwe. Bapailishi taabapiwo bulemu, abalo bamaloba babo taabanyumfwiliwo nkumbu.

¹⁷ Meenso esu akalema kulangila lucafwo, sombi talukwe kuboneka. Kuswa kumaanda alaamfu twakalindila mushobo umwi wa bantu abo batakalinga kukonsha kutupulusha.

¹⁸ Ncakwiila bantu bakalinga kutukonkela ciindi coonsebo. Tetwakalinga kukonsha kweenda mumikwakwa yesu. Nshiku shesu shakalinga kuya cimana. Ndushinisho lufu lwakalingabo pamulyango ceebo ciindi ca meelelesho esu cakalinga cashikila.

¹⁹ Abo bantu bakalinga kututandaanya bakalinga kucabeene kwiinda bamumbankwashi mwiculu. Bakatutandaanya kuya mukwiinda mutulundu akutubelamina muluyanga.

²⁰ Bakacata wooyo wakalinga kutabilila buumi bwesu, ee, mwaami wesu uyo wakasalwa aMwaami Lesa. Bakacata wooyo ngotwakalinga kushomete kwaamba ayi inga watufuna kubalwani besu boonse.

²¹ Bulya amusekelele akukondwa mwebo nobene Edomu, mwebo nomwikala mucishi ca Usi. Amwebo mulaakupekwa nkomeshi ya mapensho. Mulaakukolwa akufuulwa shakufwala.

²² Nobene Siyoni, mulandu wanu wamana. Mwaami Lesa teshi akamulekele mubusha. Sombi mwebo nobene Edomu utoomupa mulandu. Ncakwiila micito yanu ibiibi ulaakwiibika patuba.