Malilo 3 - Baibo Busansulushi Bwa Libuku Ili

Kupekwa Mulandu, Kusanduka Kuswa Kushibiibi Alimwi Akulangila

¹ Nebo ndi muntu wakabona mapensho kwiinda mukuumwa amusako wa bukali bwakwe.

² Wakantandaanya akunengesha kweenda mumunshinshe kuteshi mumumuni.

³ Ndushinisho wakanguma lyobilo lyobilo. Ee, wakanguma cakubula kunyumfwila nkumbu.

⁴ Wakalengesha cikanda amubili wangu kuboneka kucembela, akuntyoloola mafuwa.

⁵ Wakanshinkila akunshingulusha mfundilishi alimwi amapensho.

⁶ Wakanengesha kunookala mumunshinshe, ee, kwikala mumunshinshe anga mbantu bakafwabo kalekale.

⁷ Wakancalila cakwaamba ayi inga nshikoonshi akuloboka, ncakwiila wakaŋangilila ncetani.

⁸ Nabi njite nabi kulila ayi ancaafwe, Lesa taankutikiiwo, sobwe.

⁹ Wakashinka nshila yangu alubumbu lwa mabwe, akunengesha kwiinda nshila ipetookapetooka.

¹⁰ Bweenka mbuli beya wayubilila muntu, ee, mbuli nkalamu itoobelamina muntu,

¹¹ mbweeke ubo alakwe mbwaakankweelaanya kuswa munshila, wankwamoona akunshiya cakubula lucafwo.

¹² Wakabwesa buta amifwi yakwe akunengesha kuba cintu cakwiilawo lweela.

¹³ Wakayasa moyo wangu amifwi ya mucipokolo cakwe.

¹⁴ Ndakaba shikusekwa kubantu boonse. Balacelebula munyimbo lilaya mukupila.

¹⁵ Wasusha mubili wangu abucisa bulula akunshimbilisha ndulwe.

¹⁶ Wakatyoloola meeno angu kumabwe alimwi akundyatoola mulusuko.

¹⁷ Wakankasha kuba aluumuno, ndakaluba akusangalala mbokubete.

¹⁸ Aboobo ndaamba ayi, “Bulemu bwangu bwamana alimwi ashintu shoonse nshendakalinga kulangila kuMwaami Lesa.”

¹⁹ Nciyeeya mapensho angu akwiingaila kwangu, ee, mapensho alulabo anga nindulwe.

²⁰ Ndyaaingashite kabotu kabotu cakwaamba ayi moyo wangu ulyuungumene.

²¹ Nakubi boobo ndeebaluka cintu comwi alimwi cintu ico cilankalika moyo.

²² Ceebo ca lusuno lwa Mwaami Lesa lutamaani, teshi tukalobeewo mukwiinga lakwe lusuno lwakwe ndwamuyayaya.

²³ Lwalo lulaba lupya bwaca abwaca. Kushomeka kwakwe nkunene abuumbi.

²⁴ Aboobo ndalyaamboosha ayi, “Mwaami Lesa mbobuboni bwangu. Paceebo ceeco ndaakunoolangila kuli nguwe.”

²⁵ Mwaami Lesa ngumubotu kuli baabo balangila kuli nguwe. Ncakwiila ngumubotu kuli wooyo uyandoola lucafwo kuli nguwe.

²⁶ Ncibotu kulindilila kooumwitebo, ee, pakulangila lupulusho lwa Mwaami Lesa.

²⁷ Ncibotu kwiiya kulindilila boobo koocili mwanike.

²⁸ Muntu anoopenga, ekale eenka kaaumwite ceebo Mwaami Lesa ngowamunyamwisha lijoko ilyo.

²⁹ Ashishe ciwa cakwe mulusuko ceebo mukucita boobo mpashi inga wacana lulangilo.

³⁰ Aasumine kuumwa nabi kucobolwa, ee, aasumine kusebaanishikwa.

³¹ Mwaami Lesa ngushinkumbu, taabakakili limwi bantu bakwe.

³² Nakubi kwaamba ayi waleta mapensho, pesule ulaakufwa nkumbu ceebo lusuno lwakwe lutamaani ndunene.

³³ Mwaami Lesa taakoondwi kuleta buumba, nabi kulengesha bantu kupenga amyoyo.

³⁴ Mwaami Lesa taakoondwi kulyatilila baangitwe boonse mucishi.

³⁵ Lesa Wiindaawo wakwiculu taakoondwi kulita muntu masuku pamutwi pameenso akwe.

³⁶ Na woomboloshekwa cakunyengelelwa, Mwaami Lesa ulabona shintu sha mushobo uyo shoonse.

³⁷ Anu ngani weenga waamba makani akucitika acitika? Ee, ngani ukonsha kucita cintu ico Mwaami Lesa ncaatakwe kusuminisha?

³⁸ Sa te nguLesa Wiindaawo wakwiculu ulengesha mapensho ashintu shibotu kucitika.

³⁹ Ino ono ceebonshi muntu ulatongooka na wapekwa mulandu pashibiibi shakwe?

⁴⁰ Atubone nshila shesu mboshibete, ee, atulicenceete akupilukila kuMwaami Lesa.

⁴¹ Atulilile Mwaami Lesa uli kwiculu amyoyo yesu yoonse ayi,

⁴² “Twakamubishisha akumwaashukila alimwi mwebo noBaami baLesa tamuna kutulekelela.

⁴³ “Mwakakalala abuumbi akututandaanya, ee, kututandaanya akutucaya kwakutatufwitawo nkumbu.

⁴⁴ Mwakalifwekelesha likumbi kwaamba ayi mutanoonyumfwa mipailo yesu.

⁴⁵ Mwatusandula kuba mulwi wa matombe, ndushinisho twaba matombe pakati ka mishobo imwi.

⁴⁶ “Balwani besu boonse batootutukana akutucelebula.

⁴⁷ Twapeenga kwiinda mumapensho, mukunyonyoolwa ee, kwiinda mushintu shicaya alimwi shiloondesha.”

⁴⁸ Mumeenso angu mutookunkabo minsonshi, ceebo bene misheesu bamana kunyonyoolwa.

⁴⁹ Minsonshi yangu iliciteekobo kukunka. Ndushinisho inanookunkabo cakutacilekaawo

⁵⁰ kushikila Mwaami Lesa akalange panshi kuswa kwiculu akutucafwa.

⁵¹ Nsheembona shilalengesha moyo wangu kuungumana pakubona shakacitika kubanakashi ba mundabala ine misheesu.

⁵² Balwani bangu bakampatabo pataapu amulandu. Ndushinisho bakalinga kumfwimabo anga nkayuni.

⁵³ Bantu aba bakangwaala mucilindi kaanciyoya akungwaala mabwe ayi mfwite mumo.

⁵⁴ Maanshi akamfwekelesha, lyalo ndakayeeya ayi ono ndolufu lwangu.

⁵⁵ Ndakeeta liina lyanu noBaami baLesa kuswa panshi peene pacilindi.

⁵⁶ Mwakanyumfwa kusenga kwangu kwakwaamba ayi, “Mutanooshinka matwi anu na ndasenga lucafwo.”

⁵⁷ Mwakasena pafwaafwi ndindakamwiita akunkumbula ayi, “Utaloondi!”

⁵⁸ NoBaami baLesa mwakanjimikanina mumulandu wangu. Ndushinisho mwakalubula buumi bwangu.

⁵⁹ Mwebo mulibwene mbobatoombishisha, anu amumfuneeko mumulandu wangu uyu.

⁶⁰ Mulishi balwani bangu mbobampatite alimwi ambobapingite kucita pali ndime.

⁶¹ NoBaami baLesa mwakanyumfwa matushi abo alimwi ambobapingite kucita pali ndime.

⁶² Mwakanyumfwa makani ngobatepeteshanya akuŋuŋuna pali ndime bushiku boonse.

⁶³ Amubaboone! Bushiite nabi bwiimfwi balancelebula munyimbo shabo.

⁶⁴ NoBaami baLesa, amubaboosheshe cishole kweelana ambobeelete, ncakwiila kweelana anshebakacita.

⁶⁵ Amubashinganye akubalengesha kuba abuumba bunene.

⁶⁶ Amubatandaanye mubukali bwanu akubanyonyoola. Ee, amubaloobye kuswa mucishi ca panshi.