Malilo 2 - Baibo Busansulushi Bwa Libuku Ili

Mwaami Lesa Mbwaakapa Mulandu Ndabala Inene Ya Jelusalemu

¹ Mwaami Lesa wakafwekelesha ndabala ya Siyoni alikumbi lya bukali bwakwe! Wakaceesha ndabala iyo yakalinga bulemu bwa bene Isilaeli. Mubukali bwakwe wakaluba aŊanda yakwe.

² Cakutafwawo nkumbu, Mwaami Lesa wakanyonyoola mishi ya bamulunyungu lwakwe Jakobo yoonse. Mubukali bwakwe buyoosha wakawisha shiyubilo sha bamulunyungu lwakwe Juda. Wakawisha bwaami bwabo abaleli ba mumo mukubasebaanya.

³ Mubukali bwakwe buyoosha wakanyaya Isilaeli nkusu shoonse. Wakakaka kubacafwa balwani babo ndibakesa. Wakanyaka kubamulunyungu lwakwe Jakobo, bweenka bubilima mulilo utenta shintu shoonse shili pafwaafwi.

⁴ Weeleka buta bwakwe bweenka mbuli mulwani. Ncakwiila lyaansa lyakwe lyalulyo lyalibambila. Wakamana kucaya bantu boonse balinga kutukonda bweenka bucita mulwani. Wakapukula bukali bwakwe anga ngumulilo pandabala inene ya Siyoni.

⁵ Mwaami Lesa wakanyonyoola Isilaeli bweenka mbuli mulwani. Ee, wakamana kunyonyoola maanda a bwaami ashiyubilo sha mumo shoonse. Ncakwiila wakanungilako kulila akuungumana mucishi ca Juda.

⁶ Wakamwaya Ŋanda yakwe ayi ibe anga ngumuunda, ee, kunyonyoola Ŋanda umo motwakalinga kumulambilila. Mwaami Lesa walengesha Siyoni kuluba nshiku shakusekelela ashakookesha sha Cibelu. Mwaami amupailishi boonse bakanyumfwa nkusu sha bukali bwakwe.

⁷ Mwaami Lesa wakakaka cipaililo cakwe akushiya musena wakwe usalalite. Waaba lubumbu lwa maanda a bwaami kubalwani, abalo bakacita ciyobeyobe cakukoma muŊanda ya Mwaami Lesa anga mpabushiku bwakusekelela busalitwe.

⁸ Mwaami Lesa wakashinisha kumwayoola lubumbu lwa ndabala ya Siyoni. Wakafungulula lutambo lwa kulupimishaako. Wakalupima kwaamba ayi alunyonyoole cakumaninina. Maanda alaamfu alubumbu shoonse shakanyonyokela pomwi.

⁹ Minjililo yakwe yakamana kupila panshi, mpingilo wakashityoloola akushinyonyoola. Mwaami wa njiyo abamatanjilili ba njiyo bakatolwa busha pakati ka mishobo imwi. Milawo yakwe Lesa yakacileka kwiishikwa. Abalo balaluki bakacileka kubona shili anga nshiloto shiswa kuMwaami Lesa.

¹⁰ Bamaloba ba muSiyoni balishiitebo panshi cakutaamba. Balitukweeta alusuko pamitwi yabo akufwala masaka. Bamyooye ba muJelusalemu bakotamina panshi.

¹¹ Meenso angu acileka kulasha kabotu ceebo cakulila, ndapeenga abuumbi mucaamba. Ndakopoka kubuumba ceebo ca bantu bangu banyonyoolwa, ee, ceebo banike abakateta bamana kuwisooka mumikwakwa ya ndabala inene.

¹² Batoolilila bamanyinawabo ayi, “Ino shinkwa awaini shili kuli?” Batoowisookabo anga mbantu bayaswa mipeeni mumikwakwa ya ndabala inene. Ee, batootula myoyo mumaansa a bamanyinawabo.

¹³ Anu ŋambe ayinshi pali ndiwe? Anu nkweelanyewo anshi webo ondabala inene ya Jelusalemu? Ino nkucite buyani kwaamba ayi nkuumbulushe, webo ondabala ya Siyoni? Cilonda cako ncinene bweenka mbuli lweenge. Ino ngani weenga wacishilika?

¹⁴ Shili anga nshiloto shakalinga kubona balaluki banu shakalinga shabubeshi shitacite ncito. Ee, bulaluki bwabo tebwakalinga kuyubulula shibiibi shako ayi ukabule kucatwa busha. Ncakwiila bakakulengesha kuyeeya ayi kusanduka kuswa kushibiibi shako taciyandiki.

¹⁵ Bantu boonse beenda kufwaafwi andiwe balakukankamuka. Balakuseka akupukumuna mitwi yabo akwaamba ayi, “Sa iyi njendabala inene ilya yakalinga kwiindaawo kubota? Sa njendabala iyo yakalinga kusangalasha cishi coonse?”

¹⁶ Balwani bako boonse batookucelebula akukulangilisha cakukupata. Batookushibuluka akulumanya meeno akwaamba ayi, “Tweelobya. Ubu mbobushiku mbotwakalinga kulindilila. Ndushinisho twakalinga kubulangila ayi tukabuboone.”

¹⁷ Mwaami Lesa wakacita kweelana ambwaakapinga. Wakacita kweela amaswi akwe ngwaakashomesha kalekale ayi ulaakwaacita. Wakakoma kwakubula kukunyumfwila nkumbu. Ncakwiila wakaleka balwani kukusamwina mukukukoma. Wakapa nkusu shiinji kubalwani bako.

¹⁸ Myoyo ya bantu yakalilila Mwaami Lesa. Webo olubumbu lwa Siyoni, minsonshi yako aikunke anga nkalonga kakunka malumwi amashiku. Utookeshi, ee, utacileeki kulila akuungumana.

¹⁹ Nyamuka ulile mashiku, ulile ciindi beshikulindilila mashiku ndibatalika kusebensa. Lilila Mwaami Lesa amoyo wako woonse. Ee, umulilile akumukombelela ayi bana bako abo batoowisooka kunsala kweela mikwakwa yoonse bapuluke.

²⁰ NoBaami baLesa, amubone akuyeeya. Anu ngani ngomwakapenshawo kale camushobo uyu? Sa ncibotu banakashi kulya bana babo? Sa ncibotu kulya baana abo mbobakalela? Sa bapailishi abalaluki balyeelete kucailwa muŊanda yanu isalalite?

²¹ Banike abacembele boonse balikungubetebo mumikwakwa. Bacikula bwangu abamyooye bamana kucaikwa kumupeeni. Ndushinisho mwakabacaya mubushiku bwanu bwa bukali. Mwakabacaya cakutabafwitawo nkumbu.

²² Bweenka mbuli mbomutamba bantu pabushiku bwakusekelela, mbweeke ubo mbomwakantambila balwani kwisa mukunoondesha kuswa kumbasu shoonse shoonse. Mubushiku bwa bukali bwanu, taaku nabi womwi wakaloboka nabi kupuluka. Abo mbondakalela akulama balwani bangu babanyonyoola.