Malilo 1 - Baibo Busansulushi Bwa Libuku Ili

Buumba Bwa Ndabala Inene Ya Jelusalemu

¹ Ndabala inene ya Jelusalemu yakalinga kuswite bantu. Ino ono ndabala iyo yacaala buyani cisuukila? Ndabala iyo yakalinga kulemekwa pakati ka mishobo. Ino ono yaba buyani anga ngumukalubinje? Ndushinisho yakalinga anga ngumwaami mwanakashi pakati ka shishi, sombi bulya yaba anga ngumusha.

² Mashiku ilalila cakulicaya, minsonshi ilakunka kumacili. Pakati ka basuniki ba njiyo, taaku uliiwo ayi ayuumbulushe Shibusa sha njiyo shoonse shayaaba, ncakwiila shoonse shaba balwani ba njiyo.

³ Mapensho amilimo iyumu ndishamana, bene Juda batolwa mubusha. Balekalabo pakati ka mishobo imwi, tabacani amusena wakookesheshaawo. Boonse babatandaanya balabeensha, ee, kubeensha mukati ka mapensho.

⁴ Mikwakwa iya kuSiyoni itoolila buumba, ceebo taaku nabi womwi uya kuŊanda yakwe Lesa mukusekelela panshiku shisalalite. Muminjililo yakwe yoonse taamu abantu baliimo. Bapailishi ba mumo batootongela, banakashi bakalinga kwiimbilaamo bapenga amyoyo. Paceebo ceeco ili mubuumba bunene abuumbi.

⁵ Balwani ba njiyo baba bamaami ba njiyo. Balwani ba njiyo ono mbobashiite cakuliiba. Mwaami Lesa weeletela buumba bunene ceebo ca shibiibi shakwe shiinji. Bana ba njiyo bamana kuya mubusha, ee, batolwa busha kubalwani babo.

⁶ Bulemu bwa ndabala ya Jelusalemu boonse mpalampala. Bamatanjilili ba mumo boonse bababo anga ninsefu shitacani mafulo. Ee, anga ninsefu shitacite nkusu shitoocica bafwimi abo batooshitandaanya.

⁷ Munshiku shakupenshekwa alimwi akwiingooka kwa njiyo, Ndabala ya Jelusalemu yayeeya abuboni boonse ubo mboyakalinga kucite kale kale. Bantu ba njiyo ndibakawita mumaansa a balwani ba njiyo, taaku muntu nabi womwi wakeecafwaako. Balwani ba njiyo bakeelangabo akwiiseka mboyakanyonyoolwa.

⁸ Ndabala ya Jelusalemu yakabisha abuumbi, aboobo teesalalite. Boonse abo bakalinga kwiilemeka, ono baleecobola ceebo yacaala matakosha. Ee, itootongelabo akulanga kulubasu ceebo ca nsoni.

⁹ Matombe a njiyo alibo patuba, sombi yalo teekwe kuyeeyawo shakunembo. Kuwa kwa njiyo kwakakankamanisha, alimwi tekwakalinga nabi womwi wakuyumbulusha. Lyalo yakalila ayi, “NoBaami baLesa, amubone mapensho angu ceebo balwani bangu bankoma.”

¹⁰ Balwani ba njiyo bakabwesa buboni bwa njiyo boonse. Lyalo yakabona mishobo ya bakunsengwe keenjila amuŊanda yakwe Lesa. Ee, bantu abo Mwaami Lesa mbwaakalinga kukasha kwisa mumabungano akwe.

¹¹ Bantu ba njiyo boonse batootongela pakuyandoola cakulya. Batooshinta buboni bwabo ashakulya kwaamba ayi babe abuumi. Ndabala iyo itokwaamba ayi, “Amubone, noBaami baLesa akutuyeeya ceebo twacoboka.”

¹² Itokoolobesha kumuntu woonse utokwiinda ayi, “Sa taaku ancemubwene mwebo noonse nomutokwiinda? Amucebuke taangunaansha mubone. Sa kuli wakapengawo kale mbondapenga nebo? Sa kuli wakabonawo kale mapensho mbuli aya andetela Mwaami Lesa mubushiku bwa bukali bwakwe buyoosha?

¹³ “Wakatuma mulilo kuswa kwiculu kwiine. Ee, wakatuma mulilo mumafuwa angu. Kuswawaawo wakanteya koose kumyeendo akungwishisha panshi. Wakanshiya kaampenga, ndushinisho kupenga cakunoowisookabo bushiku boonse.

¹⁴ “Wakabona shibiibi shangu shoonse, akushaangilila pantu pomwi. Ee, kushaangilila pantu pomwi akunkulikisha munshingo. Ncakwiila ndakakopoka ceebo cakulemenwa. Mwaami Lesa wakangaba mumaansa a balwani mbootakoonshi kukoma.

¹⁵ “Mwaami Lesa wakaseka bashilumamba bangu boonse bacibwene kulwana. Wakanjitila likoto lya bashilumamba ayi bese bandwaane akupwayoola bacikula bwangu bangu. Wakalyatooka bantu bangu bweenka butyanwa minyansa mucilindi.

¹⁶ “Makani aya ngaanengesha kulila. Meenso angu atookunkabo minsonshi. Taaku ooli pafwaafwi kwaamba ayi aŋumbulusheeko nabi kwisa mukunjuminishako. Bantu bangu bacaala maansabo ceebo balwani bangu bankoma.

¹⁷ “Nebo neSiyoni ndatambika maansaangu, sombi taaku nabi womwi usuni kuncafwa. Mwaami Lesa waanga mulasho wakwaamba ayi beshimukoboma babe balwani bangu. Nebo neJelusalemu ndaba musena utasalalite pakati kabo.

¹⁸ “Mwaami Lesa uliluleme nakubi kwaamba ayi ndakaashukila milawo yakwe. Amunyumfwe mwebo noonse nobantu. Amunaange, mubone mapensho angu. Bacikula bwangu abamyooye bangu batolwa mubusha.

¹⁹ “Ndakeeta mboocafwanaabo pakulwana, sombi balo bakangaba. Bapailishi abamaloba bangu bakalobela mundabala inene. Ncakwiila bakaloba ndibakalinga kuyandoola cakulya ayi babe abuumi.

²⁰ “NoBaami baLesa amubone mapensho angu! Muuya wangu wapenshekwa abuumbi. Ndapeenga abuumbi mumoyo ceebo ca bwaashu bwangu butalifulili. Pansengwe lya maanda mumikwakwa ya ndabala, mupeeni uliciteko kucaya, amwalo mukati mumaanda muliswitebo bafu.

²¹ “Bantu balinyumfwite kutongela kwangu, sombi taaku nabi womwi wakuŋumbulusha. Balwani bangu boonse balinyumfwite shamapensho angu alimwi batoosangalala pashintu isho nshemwancita. Ndamusenga kwaamba ayi mulete bushiku ubo mbomwakashomesha kwaamba ayi abalo bakapenge bweenka mbondapenga.

²² “Amubashinine pashibiibi shabo shoonse, Amubacite bweenka mbomwakancita ceebo ca shibiibi shangu shoonse. Ncakwiila kutongela kwangu kwakomena cakwaamba ayi moyo wangu utoowisookabo.”