Malaki 3 - Baibo Busansulushi Bwa Libuku Ili

¹ Mpomunyaawo Mwaami Lesa Shinkusu shoonse ulakumbula ayi, “Amubone ndaakutuma muntu wangu kunembo lyangu eshi akamambile nshila. Lyalo Mwaami ngomutooyandoola ulaakwisa muŊanda yakwe cakupulumukabo. Ncakwiila uyo ngomuntu wangu ngomutoolindilila eshi akese mukwaambilisha Cipangano cangu.”

² Ono ngani eshi akakonshe kwiimikana mubukali bwakwe pabushiku bwakwisa kwakwe? Ino ngani eshi akakonshe kuba muumi aakuboneka? Mukwiinga ulaakuba anga ngusoopo utubya abuumbi nabi anga ngumulilo usungulula sheela.

³ Ulaakusalasha bantu bweenka shikusungulula silifa mbwaaubotesha mumunyumbi. Nkokwaamba ayi bweenka shikupanga sheela mbwaabotesha silifa agolodi mumunyumbi, mbweeke ubo muntu wa Mwaami Lesa uyo mbweshi akasalashe bapailishi ayi bakanoobenga milambu yeelete kuMwaami Lesa.

⁴ Lyalo milambu bene Juda abene Jelusalemu njeshi bakanoobenga kuMwaami Lesa, ilaakunooba yeelete bweenka mboyakalinga kuba kataanshi.

⁵ Mwaami Lesa Shinkusu shoonse utokwaamba ayi, “Ndaakwisa pakati kanu cakutasowa ciindi mukoombolosha. Ndaakushinina beshimampelampela, beshibulale, beshikupa bukamboni bwakubeca, banyengelela beshincito pamaali ngobafola, abaabo banyengelela bamukalubinje banakashi, bana banshiwa alimwi abaswamashi. Nkokwaamba ayi ndaakushinina boonse batandemeki.

Shakupa calikumi

⁶ “Nebo ndi Mwaami Lesa alimwi nshipilooki. Aboobo mwebo nobamulunyungu lwakwe Jakobo tamuna kunyonyookelabo limwi.

⁷ Mwebo tamukonkeli milawo yangu, bweenka bwakalinga kucita bameeshiwanu bakulukulu. Amuboole kuli ndime, kwaamba ayi anebo mboole kuli ndimwe. Sombi muleepusha ayi, ‘Ino inga twaboola buyani kuli ndimwe?’

⁸ Anebo ntoomwiipusha ayi, ‘Sa ncibotu muntu kupamba Lesa?’ Ncakwiila teshi cibotu! Nakubi boobo mwebo mulampamba. Sombi muleepusha ayi, ‘Munshilanshi?’ Mulampamba mushalikumi ashipo.

⁹ Mushobo wanu woonse ulishinganishitwe ceebo mulampamba.

¹⁰ Amulete myeelo ikwene ya shalikumi muŊanda yangu kwaamba ayi mube shakulya. Amunjeleshe, mubone na inga nshimucalwiti mbwelyo sha kwiculu akumupuumwita shoolwe shiinji cakwaamba ayi mukabule apakushibika.

¹¹ Teshi nkasuminishe shilongolo kulya shishango shanu alimwi minyansa teshi ikapukumuke kushisamu sha njiyo.

¹² Lyalo mishobo yoonse ilaakunoomwiita ayi beshicoolwe mukwiinga cishi canu cilaakunooli cibotu abuumbi,” mbwaamba Mwaami Lesa Shinkusu shoonse.

Lesa mbwaakalasha nkumbu kubaluleme

¹³ Mwaami Lesa ulaamba ayi, “Mulaamba shintu shiyoosha pali ndime.” Sombi muleepusha ayi, “Anu nshiinshi nshetwaamba?”

¹⁴ Mwebo mulaamba ayi, “Taaku mbocibete kusebensela Lesa. Anu muli mpindunshi mukucita kuyanda kwakwe nabi kuliswangata ceebo ca sheesho nshetwakacita pameenso a Mwaami Lesa Shinkusu shoonse?

¹⁵ Ono cicitika ncakwaamba ayi balisumpula mbobacite shoolwe. Ndushinisho, bamucita shibi tabeelibo mukusumpuka, sombi balasunka kukomenya moyo kwakwe Lesa kwiinda mukucita shibiibi, nakubi boobo tabapekwi mulandu.”

¹⁶ Kuswawaawo bantu abo balemeka Mwaami Lesa bakalyaamboosha, mpeeke Mwaami wakakutika akunyumfwa kulila kwabo. Muliimfwa lyakwe mwakalinga libuku umo mwakalinga kulembetwe micito ya baabo bakalinga kuloonda akulemeka Mwaami Lesa.

¹⁷ Mwaami Lesa ulaamba ayi, “Balaakuba bantu bangu pabushiku ubo ndyeshi nkaciyeeye. Ncakwiila balaakuba bantu bangu nemwiine. Ndaakubanyumfwila nkumbu, bweenka mushali musankwa mbwaanyumfwila nkumbu mwanaakwe musankwa umusebensela.

¹⁸ Paciindi ico bantu alimwi balaakubona bupusano buli pakati ka bantu baluleme abataluleme, bansebensela alimwi abatansebenseli.”