Maako 7 - Baibo Busansulushi Bwa Libuku Ili

Kwiisha kwa bakulukulu

¹ Lyalo baFalisi abafundishi bamwi ba Milawo abo bakaswa kuJelusalemu, bakabungana pantu pomwi peenka pakalinga Jesu.

² Balo bakabona ayi bamwi bashikwiiya bakwe Jesu bakalinga kulya kabatana kusamba kumaansa. Nkokwaamba ayi tabana kusamba kweelana amulawo wa ciJuda.

³ (Mukwiinga baFalisi nabi baJuda boonse tabali na kabatana kusamba kumaansa munshila yeelete. Balacita boobo mukukonkela kwiisha kwa bakulukulu.

⁴ Na baswa kumushika, tabali kabatana kusamba kumaansa ayi balisalashe. Mpoili aimwi milawo yakabeeisha bakulukulu iyo njebakonkela, mbuli bwakusansha nkomeshi amipika alimwi ashintu shoonse sha mukuba shakubikamo sha maanshi.)

⁵ Mpomunyaawo baFalisi alimwi abafundishi ba Milawo abo bakeepusha Jesu ayi, “Ceebonshi bashikwiiya bako tabatookonkela mulawo wa bakulukulu, sombi balo balalya kabatana kusamba kumaansa?”

⁶ Jesu wakabakumbula ayi, “Anu Isaya wakaamba kabotu ndyaakalaluka shapali ndimwe, mwebo nobantu nomwaamba nshemutaciti, kweelana ambokulembetwe ayi, ‘Aba bantu balandemekabo pamulomo, sombi myoyo yabo ili kulaale anebo.

⁷ Kupaila nkobampaila, taaku mbokubete mukwiinga baleeisha milawo ipangabo bantu anga njemilawo yakwe Lesa!’ ”

⁸ Jesu alimwi wakabaambila ayi, “Mulashiya milawo yakwe Lesa akukonkela cankusu milawo ya bakulukulu.”

⁹ Jesu wakatolelela akubaambila ayi, “Mulicite nshila ya bucenjeshi iyo njemushiilaamo milawo yakwe Lesa, kwaamba ayi muyumye milawo yanu ya bakulukulu.

¹⁰ Mukwiinga Mose wakaamba ayi, ‘Lemeka baiso abanyoko,’ alimwi ayi, ‘Uyo woonse unyansha baishi nabi banyina, ncakwiila uyo ulyeelete kucaikwa.’

¹¹ Sombi mwebo mulaamba ayi na muntu waambila baishi nabi banyina ayi, ‘Lucafwo loonse ndondalinga kweelete kumupa nguKobani’ (nkokwaamba ayi shipekwa kuli Lesa),

¹² lyalo mwebo tamusuminishi muntu uyo kucafwa baishi nabi banyina.

¹³ Mukucita boobo, mulaubya maswi akwe Lesa ceebo ca milawo yanu ya bakulukulu njemushiilana. Ncakwiila nkoshili shintu shiinji shimwi sha mushobo uyu nshemucita.”

Shintu shibisha muntu

¹⁴ Lyalo Jesu wakeeta alimwi bantu abo akubalwiita ayi, “Amukutike sheesho nshentoomwaambila noonse alimwi munyumfwishishe.

¹⁵ Taaku cintu nabi comwi ciswa pansengwe, ico cinjila mumuntu, nceenga camubisha kweelana amilawo ya bakulukulu. Sombi isho shiswa mumoyo nsheshimubisha. [

¹⁶ Uyo ucite matwi, aanyumfwe!”]

¹⁷ Lyalo Jesu ndyaakashiya bantu abo akwinjila muŋanda, bashikwiiya bakwe bakamwiipusha shacikoshanyo ici.

¹⁸ Mpeeke Jesu wakabakumbula ayi, “Anu amwebo tamunyumfwishi? Sa tamutoonyumfwa ayi cintu coonse cinjila mumuntu inga tacimubishi?

¹⁹ Mukwiinga cakulya tacinjili mumoyo, sombi mumala. Aboobo cilaswa alimwi.” (Mukwaamba maswi aya, Jesu wakasalasha ayi shakulya shoonse shilyeelete kulikwa.)

²⁰ Paceebo ceeco, Jesu wakabalwiita ayi, “Isho shiswa mumoyo wa muntu, nsheshimubisha.

²¹ Ceebo mumyoyo ya bantu momuswa miyeeyo ibiibi, ya bufuule, bwiipi, bucayi,

²² bulale, lunkumbwa, bubi, bubeshi, kutalilemeka, munyono, bufuyishi, kulisumpula alimwi abuluya.

²³ Ncakwiila shibiibi shoonse ishi shilaswa mumoyo wa muntu, alimwi nsheshimubisha.”

Lushomo lwa mwanakashi

²⁴ Lyalo Jesu ndyaakaswaako uko, wakaya kunyinsa ya mandabala anene a Taya aSidoni. Wakenjila muŋanda imwi umo mwaakalinga kusuni kwaamba ayi ekale cakuteshiba bantu. Nakubi boobo bantu bakeshiba ayi mwaali muŋanda.

²⁵ Ciindi ceenka ico, mwanakashi umwi wakalinga kucite mwaana mwanakashi wakalinga kucite shikaswa, ndyaakanyumfwa ayi Jesu mwaali muŋanda, wakesa mukufukama kunembo lyakwe.

²⁶ Uyu mwanakashi taakalinga muJuda, sombi wakalinga muswamashi wakunsengwe, uyo wakashalilwa mundabala ya Fonisha mucishi ca Silya. Wakasenga Jesu kwaamba ayi akushe shikaswa mumwanaakwe.

²⁷ Sombi Jesu wakamukumbula ayi, “Atutaangune kupa baana cakulya kwaamba ayi bakute mukwiinga teshi cibotu kubanyaya cakulya akusanina bakabwa.”

²⁸ Mpomunyaawo mwanakashi uyu wakakumbula ayi, “Mbocibete Nkambo, sombi abalo bakabwa balabweselela bunsebunse bulokeela panshi pakulya baana.”

²⁹ Lyalo Jesu wakamwaambila ayi, “Ceebo ca maswi abotu aya ngowakumbula, koya kuŋanda yako, shikaswa waswaamo mumwanaako.”

³⁰ Ndushinisho, mwanakashi uyo wakaya kuŋanda yakwe akucana ayi mwaana ulilete pabulo, shikaswa kaali waswaamo.

Jesu mbwaakashilika cibuulu

³¹ Jesu ndyaakaswaako kucishi ca Taya akuboolela kuLweenge lwa Galili, wakeenda mundabala inene ya Sidoni akuya mukwiinda mucishi ca Mandabala ali Likumi.

³² Mpeeke bantu bamwi bakaleta muntu wakalinga kushinkite matwi, wakalinga kubulubushabo kwaamba. Bantu aba bakasenga Jesu ayi abikeewo maansaakwe pamuntu uyu.

³³ Mpomunyaawo Jesu wakamukusha pabantu abo akumutola kulubasu. Wakenjisha minwe yakwe yobilo mumatwi a muntu uyu, alimwi akushipa mate akukumya mulaka wakwe.

³⁴ Lyalo Jesu wakalanga kwiculu, wayoyela mubulaamfu akumulwiita ayi, “Efufata”, nkokwaamba ayi, “Shinkuka!”

³⁵ Mpomunyaawo matwi a muntu uyu akashinkuka awalo mulaka wakwe wakaanguluka. Lyalo wakatalika kwaamba kabotu.

³⁶ Mpeeke Jesu wakalwiita bantu bakamuleta ayi, batalwiiti muntu nabi womwi pacikani ici. Nakubi kwaamba ayi Jesu wakabakonkomesha boobo, balo bakalinga kuyabo cilwiita bantu.

³⁷ Bantu boonse bakanyumfwa cikani ici, bakakankamana abuumbi akwaamba ayi, “Shoonse shintu lakwe ulashicita kabotu. Boonse bakalinga kushinkite matwi ulabashinkula. Nabi bacibuulu boonse balatalika kwaamba!”