Maako 6 - Baibo Busansulushi Bwa Libuku Ili

Jesu mbwaakakakwa kuNasaleti

¹ Jesu wakaswaako uko nkwaakalinga akuya kumushi kumishaabo. Abalo bashikwiiya bakwe bakayaakwe.

² Ndibwakashika bushiku bwakookesha bwa Cibelu, wakatalika kwiisha mucoonde ca baJuda. Bantu baanji bakanyumfwa kwiisha kwakwe bakakankamana akutalika kwiipushanya ayi, “Ino uyu muntu wakakusha kuli ishi shoonse? Mbusongonshi ubu mbwaacite? Ulacikonsha buyani kucita shaankamiko sha mushobo uyu?

³ Sa uyu teshi ngomubeseshi mwanaakwe Maliya? Sa teshi ngomukwabo Jemusi, Jose, Judasi alimwi aSimoni? Sa te banankashi shakwe te tuli abo kweenka kuno?” Aboobo bakamusuula.

⁴ Lyalo Jesu wakabaambila ayi, “Mulaluki ulalemekwa kuli koonse, kukushakobo kumishaabo, pakati ka mukowa wakwe alimwi akuŋanda yakwe mwiine.”

⁵ Aboobo uko, taakwe kukonsha kucita shaankamiko shiinji, sombibo kubika maansaakwe pabantu balwashi akubashilika.

⁶ Jesu wakakankamana ndyaakabona kubula lushomo kwa bantu aba. Lyalo wakaya mumishi yoonse yakalinga kushingulukite, kuya bwiisha bantu.

Jesu mbwaakatuma bashikwiiya bakwe bali likumi abobilo

⁷ Jesu wakabunganya bashikwiiya bakwe bali likumi abobilo, wabatuma bobilo bobilo akubapa nkusu shakukusha bashikaswa.

⁸ Wakabalwiita ayi, “Mutanyamuni cintu nabi comwi mulweendo, sombibo nkoli yeenka. Mutanyamuni shinkwa, coola nabi maali mumpotomona.

⁹ Mufwalebo nkwabilo, kutanyamuna cakufwala ca peculu acimwi.”

¹⁰ Wakabalwiita alimwi ayi, “Na mwashika mundabala mulyeelete kwikala mweenka muŋanda umo mobamutambula kabotu kushikila bushiku bwakuswa mundabala umo.

¹¹ Na mwashika mundabala imwi bantu bakaka kumutambula akunyumfwa makani anu, mukalipaampe lusuko kushimpanta pakuswa mundabala umo. Ici cilaakuba citondesho cakwaamba ayi balicite mulandu.”

¹² Ncakwiila bashikwiiya bakaya cishimikila ayi bantu balyeelete kusanduka kuswa kushibiibi shabo.

¹³ Bakakusha bashikaswa baanji alimwi bakananika mafuta bantu balwashi baanji akubashilika.

Lufu lwakwe Joni Mubombeki

¹⁴ Mwaami Elodi wakanyumfwa mpuwo ya makani akwe Jesu ayo akanyumfwika koonse koonse. Bamwi bantu bakalinga kwaamba ayi, “Joni Mubombeki wabuka kuswa kubafu, nceceeco ncaakonshela kucita shaankamiko ishi.”

¹⁵ Sombi bamwi bakalinga kwaamba ayi, “NguElija.” Abalo bamwi ayi, “Ngumulaluki womwi wa baabo balaluki bakulukulu.”

¹⁶ Ndyaakanyumfwa makani aya Elodi, wakaamba ayi, “NguJoni Mubombeki ngondakatumina bantu ayi bamusutule mutwi, wabuka kuswa kubafu.”

¹⁷ Mwaami Elodi ngowakatuma bantu ayi bacate Joni akumwaanga kumubika muntolongo. Wakacita shoonse ishi ceebo cakwe Elodyasi uyo ngwaakeeba nabi wakalinga muka Filipo mukwabo.

¹⁸ Mukwiinga Joni Mubombeki wakalinga kwaambila Elodi ayi, “Mulawo tausuminishi ayi webo weebe mukamukwanu.”

¹⁹ Paceebo ceeco, Elodyasi wakaba amfundilishi kuli Joni. Aboobo wakalinga kuyanda kwaamba ayi acaikwe. Sombi wakaalilwa

²⁰ ceebo Elodi wakalinga kulemeka Joni camaansa obilo. Wakalinga kwishi kwaamba ayi ngumuntu ululeme alimwi usalalite, aboobo wakamulama. Nakubi kwaamba ayi Elodi wakalinga kupenshekwa mumoyo na wanyumfwa Joni kaamba, wakalinga kusuni kumukutika.

²¹ Sombi bushiku bumwi ndibakalinga kusekelela bushiku bwa kushalwa kwakwe Elodi, Elodyasi wakamulya coolwe Joni. Pabushiku ubo, Elodi wakatamba bamanene mubweendeleshi bwakwe, bamatanjilili ba bashilumamba alimwi abamaloba babile ba kuGalili.

²² Mpomunyaawo mwanaakwe Elodyasi mwanakashi wakashika akwinjila muŋanda mwakalinga baabo bakatambwa akutalika kushana. Bantu boonse bakakondwa mbuli mbwaakashana. Lyalo mwaami Elodi wakaambila mulindu uyu ayi, “Amba ncoosuni. Coonse nceshi unseenge, nebo ntookupa.”

²³ Wakamwaambila lyabili akuyumya maswi akwe ayi, “Ndalumbila, ntookupa coonse nceshi unseenge, nabi kukutimbwitako musa wa cishi cangu.”

²⁴ Mulindu uyu wakaswita pansengwe kuya mukwiipusha kuli banyina ayi, “Ino nsengenshi?” Mpeeke banyina bakamukumbula ayi, “Koya usenge mutwi wakwe Joni Mubombeki.”

²⁵ Lyalo mulindu uyo wakaboolela bwangu kumwaami, akumulwiita ayi, “Ndisuni kwaamba ayi bulya bweenka mumpe mutwi wakwe Joni Mubombeki pambale iselebete.”

²⁶ Mpeeke mwaami wakacatwa buumba. Nakubi boobo ceebo cakulumbila nkwaakalumbila pameenso abaabo boonse bakalingaawo, cakamwaalila kukaka.

²⁷ Mpomunyaawo mwaami wakatuma shilumamba akumulwiita ayi aye akalete mutwi wakwe Joni Mubombeki. Ncakwiila shilumamba wakaya kuntolongo mukumutimbula

²⁸ akuletela mulindu mutwi wakwe pambale. Alakwe wakaupa banyina.

²⁹ Bashikwiiya bakwe Joni Mubombeki ndibakanyumfwa cikani ici, bakaya mukubwesa mutuntu wakwe, akuya mukuufukila.

Jesu mbwaakapa cakulya bantu bali shuulu shosanwe

³⁰ Ndibakaboolela batumwi mbwaakalinga atuma, bakakumana pantu pomwi alimwi aJesu, bamulwiita shoonse nshebakacita alimwi akwiisha.

³¹ Bantu baanji baanji bakalinga kucitabo, bamwi besa abamwi kabaya. Aboobo Jesu abatumwi bakabula aciindi cakulya. Lyalo Jesu wakabaambila ayi, “Atuye kumwi kulubasu nkweshi tubebo sweenka kwaamba ayi tukookesheeko paniini.”

³² Mpeeke bakenjila mubwaato beenka akusubukila kumusena kwatakalinga kwikala bantu.

³³ Nakubi boobo bantu baanji bakababona kabaya, akubeshiba ayi nguJesu abashikwiiya bakwe. Lyalo bakatalika kuya bucica kwitala kuswa mumandabala oonse. Balo bakafwambaana kushika Jesu abashikwiiya bakwe kabatana.

³⁴ Jesu ndyaakasubuka, wakabona bantu baanji kababungene. Lyalo wakabanyumfwila nkumbu mukwiinga bakalinga anga nimbelele shitacite mweembeshi. Lyalo wakatalika kubeeisha shintu shiinji.

³⁵ Lisuba ndilyakookama, bashikwiiya bakwe bakesa kuli Jesu akumwaambila ayi, “Amubone, kuno nkuluundu alimwi lisuba lyepila kale.

³⁶ Amubaambile bantu baye mumishi ili pafwaafwi mukuula cakulya balye.”

³⁷ Sombi lakwe wakabaambila ayi, “Mwebo nweenka amubape cakulya.” Bashikwiiya bakwe bakamwiipusha ayi, “Sa mulisuni kwaamba ayi tuye mumishi mukuula shinkwa wa maali ali myaanda yobilo twise tubape cakulya?”

³⁸ Jesu wakabeepusha ayi, “Anu mulicite shinkwa wongaye? Amuye mukabone.” Ndibakabona, bakamulwiita ayi, “Palibo shinkwa wosanwe alimwi answi shobilo.”

³⁹ Mpomunyaawo Jesu wakaambila bashikwiiya bakwe ayi bakalike bantu mumakotomakoto pamweemfu.

⁴⁰ Ncakwiila bakekala panshi mumakoto makoto, bamwi mumyaanda myaanda alimwi abalo bamwi makumi osanwe osanwe.

⁴¹ Jesu wakabwesa shinkwa wosanwe alimwi answi shobilo, walanga kwiculu akulumba Lesa. Ndyaakamanisha, wakakomoona shinkwa akupa bashikwiiya bakwe ayi baabile bantu. Ashalo nswi shobilo isho, Jesu wakashaabila abo boonse bakalingaawo.

⁴² Bantu boonse bakalingaawo bakalya akukuta.

⁴³ Mpomunyaawo bashikwiiya bakesusha tutundu likumi atobilo, twa sheesho shakacaala kuswa kushinkwa answi.

⁴⁴ Ono basankwa bakalyaako bakalinga shuulu shosanwe.

Jesu mbwaakeenda pamaanshi

⁴⁵ Mpomunyaawo Jesu wakaambila bashikwiiya bakwe ayi benjile mubwaato, batanjile kuya kwitala lya lweenge kuBetisaida, lakwe kaacaambila bantu ayi banooya kumishaabo.

⁴⁶ Ndyaakamana kubalasha, wakatanta pakalundu mukupaila kuli Lesa.

⁴⁷ Ndipakashiyashiyabo, bwaato bwakalinga kutene pakati ka Lweenge lwa Galili, sombi lakwe Jesu wakalingabo eenka kwitala.

⁴⁸ Wakabona ayi bashikwiiya bakwe bapenga kutapa bwaato ceebo ca cipuupu cakalingaako. Ingayi kumuyamaca, Jesu wakesa kubashikwiiya bakwe kaaenda pamaanshi, wakacita anga utooyanda kubeendilila.

⁴⁹ Bashikwiiya bakwe ndibakamubona kaaenda pamaanshi, bakooloma mukwiinga bakayeeya ayi ncipuku.

⁵⁰ Aboobo boonse bakaloonda abuumbi. Sombi paciindi ceenka ico Jesu wakabaambila ayi, “Amukalike myoyo! Mutaloondi, ndime.”

⁵¹ Lyalo wakenjila mubwaato mobakalinga, acalo cipuupu cakoomuna. Mpeeke bashikwiiya bakwe bakakankamana abuumbi

⁵² mukwiinga tabakwe kunyumfwishisha kabotu mbuli bantu baanji mbobakakuta shinkwa wosanwe ceebo bakalinga bayumu mitwi.

Jesu mbwaakashilika balwashi kuGenesaleti

⁵³ Lyalo ndibakasubuka lweenge, bakashika mucishi ca Genesaleti akwaangilila bwaato mweela maanshi.

⁵⁴ Ndibakaswabo mubwaato, bantu baanji bakeendililabo kwishiba Jesu.

⁵⁵ Mpeeke bantu ba mucishi coonse ico bakatalika kucica, kuya buleta balwashi pamacila akubatola kuli koonse nkweenga banyumfwa ayi Jesu nkwaabete.

⁵⁶ Ncakwiila, kuli koonse nkweenga weendila na washika mumishi, mumandabala anene nabi mumitala, bantu bakalinga kutola balwashi kumisena yakalinga kucanika bantu baanji. Lyalo bakamusenga ayi asuminishe balwashi kukumyabo cakufwala cakwe. Lyalo boonse bakakumyaako, bakaba kabotu.