Maako 4 - Baibo Busansulushi Bwa Libuku Ili

Cikoshanyo ca mushangi

¹ Jesu wakatalika alimwi kwiisha kulubasu lwa Lweenge lwa Galili. Likoto lyakabungana lyakakomena bunene cakwaamba ayi Jesu wakenjila mubwaato wekala. Bwaato bwakalinga pamaanshi, lyalo likoto kalili petala muloombe lwa lweenge.

² Jesu wakabeeisha shintu shiinji mushikoshanyo, kaabaambila ayi,

³ “Amuleke mulwiiteewo! Kwakalinga muntu umwi wakaya mukushanga mbuto.

⁴ Ono ndyaakalinga kuminsa, mbuto shimwi shakalokela munshila, abalo bayuni bakesa bashilya.

⁵ Shimwi shakalokela pabulongo bwa mabwe. Imbuto ishi shakafwambaana kumena ceebo bulongo bwakalingabo peculu.

⁶ Sombi lumwi ndilwakabala, busonga boonse bwakapya akuyuma ceebo miyanda taikwe kuya bunene panshi.

⁷ Imbuto shimwi shakalokela pamyuumfwa, ayalo myuumfwa ndiyakakula yakashitilisha misonga, aboobo taikwe kukula kwaamba ayi icate.

⁸ Sombi mbuto shimwi shakalokela pabulongo bubotu, shakamena, shakula alimwi akucata shakacata. Shimwi shakacata nseke makumi otatwe, shimwi makumi osanwe alyomwi, ashimwi mwaanda.”

⁹ Lyalo Jesu wakamanisha akwaamba ayi, “Uyo ucite matwi, aanyumfwe!”

Ceebo cinene ca shikoshanyo

¹⁰ Bantu ndibakamwaika, bashikwiiya bakwe bali likumi abobilo abantu bamwi bakacaala, bakamusenga ayi asansulule shikoshanyo.

¹¹ Jesu wakabakumbula ayi, “Mwebo mwakapekwa lushibo lwa shintu shishisitwe sha Bweene bwakwe Lesa. Sombi bamwi abo batana kwishiba, balanyumfwa shintu shoonse mushikoshanyo

¹² kwaamba ayi, ‘Balangishishe, sombi bataboneshi, bakutikishe, sombi batanyumfwishishi, mukwiinga inga basandukila kuli Lesa alakwe inga wabalekelela.’ ”

Jesu mbwaakapandulula cikoshanyo ca mushangi

¹³ Lyalo Jesu wakabeepusha ayi, “Sa tamukwe kucinyumfwa cikoshanyo ici? Ino mulaakucikonsha buyani kunyumfwa shikoshanyo shimwi shoonse?

¹⁴ Mushangi ulashanga maswi akwe Lesa.

¹⁵ Bantu bamwi bali anga nimbuto isho shakalokela munshila. Bamanabo kunyumfwa maswi akwe Lesa, Satana ulesa waakushaamo.

¹⁶ Bamwi bali anga nimbuto isho shakalokela pabulongo bwa mabwe. Banyumfwabo maswi akwe Lesa, baleendililabo kwaatambula cakusangalala.

¹⁷ Sombi maswi taanjili cankusu mumyoyo yabo, aboobo taakaali ciindi. Makatasho nabi mapensho na abapolela ceebo ca maswi akwe Lesa, balatentuka kufwambaana.

¹⁸ Bamwi bali anga nimbuto yakashangwa mumyuumfwa. Aba mbobaabo banyumfwa maswi akwe Lesa,

¹⁹ sombi shintu sha mucishi ca panshi, kusuna bubile alimwi ashintu shimwi shakulikondelesha, shilafulunganya maswi akwe Lesa, aboobo tabacati shisepo.

²⁰ Sombi bantu bamwi bali anga nimbuto yakashangwa mubulongo bubotu. Balanyumfwa maswi akwe Lesa, baatambula, baashoma alimwi akucata shisepo. Bamwi balacata shili makumi otatwe, bamwi makumi osanwe alyomwi alimwi bamwi mwaanda.”

Lilampi lifweketwe nongo

²¹ Jesu wakatolelela akubeepusha ayi, “Sa kuli muntu weenga wanyansha lilampi akulifweka nongo nabi kulibika munshaabulo? Sa inga taalibiki peculu

²² Cili coonse cishisitwe, cilaakuyubululwa patuba alimwi cili coonse citashibikitwe, cilaakushibikwa.

²³ Uyo ucite matwi, aanyumfwe!”

²⁴ Wakabaambila alimwi ayi, “Amucenjele, mutabecekwi! Milawo njemusebensesha pakoombolosha bamwi alakwe Lesa njeshi akasebenseshe pali ndimwe, lyalo akwiindaawo.

²⁵ Uyo ucite kale ulaakubikilwaawo, sombi ucite kaniini ulaakunyaikwa nabi kaako koonse nkaacite.”

Cikoshanyo ca mbuto itoomena akukula

²⁶ Jesu wakatolelela kaamba ayi, “Bweene bwakwe Lesa buli bobulya. Muntu ulashanga mbuto mumuunda wakwe.

²⁷ Uloona mashiku alimwi akubuka macuunsa na bwaca, sombi coonse ciindi ici imbuto shitoomena akuya cikula, kaateshi ambocicitika.

²⁸ Bulongo bwiine mbobukulisha mumeno akuulengesha kwaamba ayi ucate. Citaanguna ncibuba, kuboolaawo njimifuko, pesule mifuko ndyeiba anseeke.

²⁹ Na shapya, muntu uyo ulatalika kucesa mukwiinga ciindi cakutebula cashikila.”

Cikoshanyo ca mbuto ya masitadi

³⁰ Jesu wakabeepusha ayi, “Ino Bweene bwakwe Lesa inga twabukoshanisha anshi? Nabi inga twasebensesha cikoshanyonshi kubupandulula?

³¹ Bulikoshenye aluseke lwa masitadi ulo luniini kwiinda nseke shoonse sha pacishi ca panshi. Na muntu walushanga,

³² lulakomena kwiinda mbewu shoonse akuba amisampi inene cakwaamba ayi bayuni balesa mukupanga shiinswa mumisampi ya ncico ceebo ca cimfule cibotu.”

³³ Jesu wakashimikila bantu maswi akwe mushikoshanyo shiinji sha mbuli sheeshi kweelana akunyumfwa kwabo.

³⁴ Taakwe kubalwiitaawo maswi akwe Lesa kwakubula shikoshanyo, sombi wakalinga kusansulwita bashikwiiya bakwe shoonse na bacaala beenka.

Jesu mbwaakoomusha cipuupu

³⁵ Macolesha bushiku bweenka ubo, Jesu wakaambila bashikwiiya bakwe ayi, “Atusubukile kwitala.”

³⁶ Mpeeke bakashiya likoto lya bantu. Bashikwiiya bakenjila mubwaato mweenka mwakalinga Jesu akuyaakwe. Maato amwi akalingaawo ngobakeetaawo pantu pomwi.

³⁷ Mpomunyaawo kwakaba cipuupu cinene pamaanshi, maaba akatalika kuuma kubwaato, lyalo bwakatalika kuya cisula.

³⁸ Paciindi ici Jesu waalinga kulete kuunshi mubwaato kaataamite pamutaamino. Bashikwiiya bakwe bakamubusha akwaamba ayi, “Bafundishi, sa tamutoolisukama kwaamba ayi tutooyanda kufwa?”

³⁹ Jesu wakabuka akukalalila cipuupu amaaba ayi, “Umuna! Cileke kupuupa!” Muuwo wakacileka kupuupa, lyalo kwakaboolabo tontolo.

⁴⁰ Mpeeke wakaambila bashikwiiya bakwe ayi, “Nciinshi ncemutoloonda? Sa tamucite lushomo?”

⁴¹ Sombi boonse bakalinga kuloondete abuumbi akuliipusha beene ayi, “Ino uyu ngumuntu uli buyani cakwaamba ayi cipuupu amaaba shoonse shilamunyumfwila?”