Maako 3 - Baibo Busansulushi Bwa Libuku Ili

Musankwa wakalinga kuyuminite lyaansa

¹ Lyalo Jesu wakaboolela alimwi mucoonde ca baJuda, umo mwakalinga musankwa wakalinga kuyuminite lyaansa.

² Bamwi bantu bakalingaawo, bakalinga kusuni kucana cilubo muli Jesu. Bakalinga kumulangilisha ayi baboneshe na inga wamushilika pabushiku bwakookesha bwa Cibelu.

³ Jesu wakaambila musankwa uyo wakalinga kuyuminite lyaansa ayi, “Kosa kuno kunembo.”

⁴ Wakeepusha bantu ayi, “Ino Milawo ilatusuminisha kucitanshi pabushiku bwakookesha bwa Cibelu? Kucita cibotu nabi kucita cibiibi kumuntu? Kupulusha buumi bwa muntu nabi kubunyonyoola?” Sombi taaku ncebakaambaawo.

⁵ Jesu wakakalala ndyaakabalangilisha, sombi wakabafwita nkumbu ceebo cakuyuma kwa myoyo yabo akuluba. Mpeeke wakaambila musankwa uyo ayi, “Fungulula lyaansa lyako.” Wakalifungulula, mpomunyaawo lyakaba kabotu alimwi.

⁶ Lyalo baFalisi bakaswaamo, baya balifuyafuya pantu pomwi abantu bakwe Elodi bamwi kwaamba ayi bacane nshila yakumucailaamo.

Bantu baanji kuLweenge lwa Galili

⁷ Jesu abashikwiiya bakwe bakaya kuLweenge lwa Galili alimwi bantu baanji bakamukonkela. Bakaswa kucishi ca Galili, Judeya,

⁸ Jelusalemu, Idumeya alimwi akwicwe lya Joodani. Bamwi bakaswa kulubasu lwa mandabala anene a Taya aSidoni. Boonse aba bantu bakaya kuli Jesu mukwiinga bakanyumfwa shintu shoonse isho nshaakalinga kucita.

⁹ Likoto lyakakomenesha abuumbi. Paceebo ceeco Jesu wakaambila bashikwiiya bakwe ayi bamuletele bwaato, kuloonda kumushaankanya.

¹⁰ Mukwiinga bakanyumfwa ayi Jesu wakashilika baanji, boonse balwashi bakalinga kuya cilimbana kuli nguwe kwaamba ayi mpashi inga bamukumya akuba kabotu.

¹¹ Bantu bakalinga kucite bashikaswa kulilabo na bamubona, bakalinga kuwa panshi muliimfwa lyakwe akoolobesha ayi, “Uli Mwanaakwe Lesa!”

¹² Jesu wakakonkomesha bashikaswa ayi batalwiiti nabi womwi ayi nguMwanaakwe Lesa.

Jesu mbwaakasala batumwi bali likumi abobilo

¹³ Lyalo Jesu wakaya kukalundu akwiita baabo mbwaakalinga kuyandoola. Abalo bakaya kuli nguwe.

¹⁴ Mpeeke wakasala bali likumi abobilo abo mbwaakatumba ayi batumwi. Wakabalwiita ayi, “Ndamusala ayi munooli anebo, alimwi ndaakumutuma mukushimikila.

¹⁵ Aboobo mulaakuba ankusu shakukusha bashikaswa.”

¹⁶ Aya ngomeena abantu bali likumi abobilo mbwaakasala. Simoni uyo ngwaakapa liina lya Pita,

¹⁷ Jemusi aJoni mwanike wakwe, bana bakwe Sebedi (Jesu wakabapa liina lya Bonajesi, lipandulula ayi, “Baana baloondesha anga nkalumba”),

¹⁸ Andulu, Filipo, Batolomeyo, Mateyo, Tomasi, Jemusi mwanaakwe Alufeyasi, Tadeyasi, Simoni shikulwanina lwaanguluko

¹⁹ alimwi aJudasi Isikalyoti uyo wakaaba Jesu.

Jesu aBilusebulu

²⁰ Lyalo Jesu wakaya kuŋanda. Aboobo bantu baanji baanji bakabungana cakwaamba ayi Jesu abashikwiiya bakwe bakabula aciindi cakulya.

²¹ Bashikamukowa ndibakanyumfwa boobo, bakanyamuka ayi baye mukumukushaako, mukwiinga bantu bakalinga kwaamba ayi, “Wacinkuka!”

²² Bamwi bafundishi ba Milawo bakaswa kuJelusalemu bakalinga kwaamba ayi, “Ulicite Bilusebulu muli nguwe! Ngumwaami wa bashikaswa umupa nkusu shakubakusha.”

²³ Mpomunyaawo Jesu wakabeeta akubaambila mushikoshanyo ayi, “Ino Satana inga wakusha buyani Satananyina?

²⁴ Na cishi calyaabanya mushipansha akutalika kulwana shiine, cishi ico cilawa.

²⁵ Na bantu ba muŋanda yomwi balyaabanya mushipansha akutalika kulwana beene, iyo ŋanda ilawa.

²⁶ Aboobo na buleelo bwakwe Satana bwabaanika mushipansha, tabukoonshi kwiimikana, sombi bulawa akumaninina.

²⁷ “Taaku weenga wapwaya ŋanda ya muntu shinkusu akwiipa shintu shakwe, sombibo na wamwaanga. Lyalo ncalushinisho inga weepa sha muŋanda ya muntu uyo.

²⁸ “Ntoomulwiita calushinisho ayi bantu boonse inga balekelelwa shibiibi shabo shoonse alimwi abubi boonse mbweenga baamba.

²⁹ Sombi uyo woonse wacobola Mushimu Usalashi, Lesa teshi akamulekelele mukwiinga wacita cibiibi nceshi akekalaaco nshiku shoonse.”

³⁰ (Jesu wakabaambila boobo mukwiinga bamwi bantu bakalinga kwaamba ayi, “Ulicite shikaswa.”)

Banyina Jesu abamakwabo

³¹ Lyalo banyina Jesu abamakwabo bakashika beemikana pansengwe akutuma muntu ayi eete Jesu.

³² Bantu baanji bakalinga kushingulukite Jesu bakamwaambila ayi, “Amubone, banyinawanu abamakwabanu bali pansengwe, batoomuyandoola.”

³³ Jesu wakakumbula ayi, “Anu bama mbaani? Abamakwesu mbaani?”

³⁴ Wakalangilisha bantu bakalinga kumushingulukite akwaamba ayi, “Aba mbobama alimwi mbobamakwesu.

³⁵ Mukwiinga uyo woonse ucita buyanda Lesa ngunandumi yangu, ngunankashi yangu alimwi mbobama.”