Maako 2 - Baibo Busansulushi Bwa Libuku Ili

Jesu mbwaakashilika musankwa wakalinga kuyuminite mubili

¹ Ndipakeenda nshiku shiniini, Jesu wakaboolela muKapenaumu alimwi bantu bakanyumfwa ayi nkwaali kuŋanda.

² Bantu baanji bakayoboloka cakwaamba ayi kwakabula amusena wakacaala, apamulyango poonse pakesula. Lyalo Jesu wakabashimikila maswi akwe Lesa.

³ Kaaciisha, bantu bamwi bakashika. Ono bone bakalinga kuyumwite musankwa wakalinga kuyuminite mubili.

⁴ Muceebo bakaalilwa kumwiinsha kumutola kuli Jesu, mulandu wa kufula kwa bantu, bakatanta paciluli ca ŋanda akupanga bulyango kupimabo peenka pakalinga Jesu. Bakamwiinsha akumuleleesha pamacila kushikila panshi.

⁵ Jesu ndyaakabona lushomo lwabo, wakaambila wakalinga kuyuminite mubili ayi, “Ndaba, shibiibi shako shalekelelwa.”

⁶ Lyalo bafundishi ba Milawo bakalingaawo, bakatalika kuyeeya mumyoyo yabo ayi,

⁷ “Ino uyu muntu utokwaambilanshi bobulya? Nkucobola Lesa uku! Ngani weenga walekelela shibiibi? Sa te nguLesa eenkabo?”

⁸ Mpomunyaawo Jesu wakeshiba nshibakalinga kuyeeya mumyoyo yabo. Lyalo wakabaambila ayi, “Ino mutooyeeyelanshi shintu sha mushobo uyu mumyoyo yanu?

⁹ Ncili cuubu kwaambila muntu uyu ayi, ‘Shibiibi shako shalekelelwa’, nabi kwaamba ayi, ‘Nyamuka, bwesa macila ako unooya’?

¹⁰ Sombi ntooyanda kwaamba ayi mwishibe ayi MwanaaMuntu ulicite bulemu ankusu shakulekelela shibiibi pacishi ca panshi.” Mpomunyaawo wakaambila uyuminite mubili ayi,

¹¹ “Ntookwaambila, nyamuka, bwesa macila ako, uye kumishaanu.”

¹² Bantu boonse kabamubwene, wakabuka, wabwesa macila akwe, kaaya. Boonse bakakankamana akulumbaisha Lesa akwaamba ayi, “Tatuna kucibonaawo camushobo uyu!”

Jesu mbwaakeeta Lefi

¹³ Jesu wakaboolela alimwi kulubasu lwa Lweenge lwa Galili. Bantu baanji bakesa kuli nguwe, lyalo wakatalika kubeeisha.

¹⁴ Ndyaakalinga kuya bweenda, wakabona Lefi mwanaakwe Alufeyasi, kaashite mukaanda ka musonko. Mpeeke Jesu wakamwaambila ayi, “Nkonkele!” Alakwe wakanyamuka akumukonkela.

¹⁵ Ono Jesu wakalinga kulya muŋanda yakwe Lefi. Beshikusonkesha abantu batakonkeli Milawo yakwe Mose bakalya anguwe abashikwiiya bakwe mukwiinga bantu baanji ba mushobo uyo bakamukonkela.

¹⁶ Lyalo bafundishi ba Milawo, baFalisi, ndibakabona ayi utoolya abantu aba, bakeepusha bashikwiiya bakwe ayi, “Ino utoolitanshi abeshikusonkesha alimwi abantu batakonkeli Milawo yakwe Mose?”

¹⁷ Ndyaakanyumfwa mwiipusho wabo, Jesu wakabaambila ayi, “Teshi bantu bayumu balangoola mushiliki, sombi balwashi beenka. Nshikwe kwisa mukwiita baluleme, sombi bamucita shibi.”

Mwiipusho wa pakulikasha kulya

¹⁸ Bumwi bushiku bashikwiiya bakwe Joni Mubombeki alimwi abashikwiiya ba baFalisi, bakalinga paciindi ca kulikasha kulya. Bantu bamwi bakesa kuli Jesu akwiipusha ayi, “Nceebonshi bashikwiiya bakwe Joni aba baFalisi balaba aciindi ca kulikasha kulya, sombi bashikwiiya bako tabalikaashi?”

¹⁹ Jesu wakabakumbula ayi, “Sa inga babye shibwiinga bafwa nsala shibwiinga kaacili abo? Sobwe! Kulilabo shibwiinga kaali abo, inga tabakoonshi kufwa nsala.

²⁰ Sombi ciindi cilaakushika shibwiinga ndyeshi akakushikweewo pali mbabo. Paciindi ico ndyeshi bakalikashe kulya.

²¹ “Taaku muntu utunga cimami ca nsalu ipya pacakufwala cikulukulu. Ceebo cimami cipya mukukokonyana, nsalu ikulukulu ilakwamuka mweenka mwakeela cimami. Aboobo cilyango cilakomenenaako.

²² Mbweeke ubo taaku muntu weenga wabika waini upya munkomwe sha shipaya shikulukulu. Mukwiinga na wabikaamo, nkomwe shilapasuka, waini ankomwe shoonse shilanyonyooka. Waini upya ulabikwa munkomwe sha shipaya shipya.”

Mwiipusho wa pabushiku bwakookesha bwa Cibelu

²³ Bumwi bushiku Jesu abashikwiiya bakwe bakalinga kwiinda mumyuunda ya witi pabushiku bwakookesha bwa Cibelu. Ndibakalinga kuya ceenda, bashikwiiya bakwe bakatalika kuyapa mitwi ya witi.

²⁴ Paceebo ceeco baFalisi bakeepusha Jesu ayi, “Bona, batoocitilanshi cintu citasuminishikwi aMilawo pabushiku bwakookesha bwa Cibelu?”

²⁵ Jesu wakabakumbula ayi, “Sa tamuna kubelengaawo cakacita Defedi ciindi lakwe ababye ndibakanyumfwa nsala kabatacite cakulya?

²⁶ Nshiku isho Abyata ndyaakalinga mupailishi munene, Defedi wakenjila muŊanda yakwe Lesa akulya cimaande cisalalite. Wakalya cimaande ico cakalinga kulyabo bapailishi kweelana aMilawo akupaako babye.”

²⁷ Lyalo Jesu wakabaambila ayi, “Bushiku bwakookesha bwa Cibelu bwakapangilwa muntu, kuteshi muntu kupangilwa Cibelu.

²⁸ Nkokwaamba ayi, MwanaaMuntu ngoMwaami wa shoonse abushiku bwakookesha bwa Cibelu.”