Maako 14 - Baibo Busansulushi Bwa Libuku Ili

Mbobakapangana shakucaya Jesu

¹ Kwakacaalabo nshiku shobilo kwaamba ayi bushikile bushiku bwa Pasika bwakwiibaluka kusotokela alimwi abushiku bwakusekelela kwakulya Cimaande. Bamatanjilili ba bapailishi alimwi abafundishi ba Milawo bakalinga kuyandoola nshila yakucatilamo Jesu cabushishi kwaamba ayi bamucaaye.

² Bakalinga kwaamba ayi, “Tatweelete kumucata bushiku ubu bwakusekelela mukwiinga inga pacitika shimfulunganya pabantu beshi bakanooliiwo.”

Jesu mbwaakananikwa mafuta kuBetani

³ Jesu wakalinga kundabala ya Betani, muŋanda yakwe Simoni wiitwa ayi shimanata. Ndyaakalinga kulya, kwakesa mwanakashi umwi wakalinga kucite musaashi wakapangwa kulibwe lya alabasita, kauswite mafuta anunkila kabotu amakwebo eetwa ayi nadi. Mpomunyaawo mwanakashi uyo wakapwaya musaashi, akupuumwiita mafuta pamutwi wakwe Jesu.

⁴ Sombi mwakalinga bamwi bantu bakakalala, akutalika kutongooka ayi, “Nceebonshi kunyonyoola bobulya mafuta?

⁵ Mafuta aya naakwiinga aulishikwa maali ainda pamyaanda yotatwe akupa maali ayo kubakandu!” Aboobo bakamukalalila mwanakashi uyo.

⁶ Sombi lakwe Jesu wakabaambila ayi, “Amumuleeke mwiine, ino mutomupensheshanshi? Mwanakashi uyu wancitila cintu cibotu abuumbi.

⁷ Mukwiinga bakandu muli abo nshiku shoonse alimwi ciindi coonse na kamusuni kubacafwa, inga mwabacafwa. Sombi nebo teshi nooli anu lyoonse.

⁸ Mwanakashi uyu wacita cintu ncaakonsha kucita. Wananikilabo limwi mafuta mubili wangu kwaamba ayi unoolindilabo kufukilwa.

⁹ Ntoomulwiita calushinisho ayi kuli koonse bantu nkweshi bakanooshimika Makani Abotu mucishi coonse ca panshi, balaakunokwaamba acikani ici cacita mwanakashi uyu mukumwiibaluka.”

Judasi mbwaakaaba Jesu

¹⁰ Womwi wa bashikwiiya bakwe Jesu bali likumi abobilo wiitwa ayi Judasi Isikalyoti, wakaya kubamatanjilili ba bapailishi ayi akaabe Jesu kuli mbabo.

¹¹ Abalo ndibakanyumfwa makani aya, bakakondwa, akushomesha kwaamba ayi balaakumupa maali. Mpomunyaawo Judasi alakwe wakatalika kuyandoola ciindi ceelete cakumwaabilaawo.

Mbobakalya cakulya ca bushiku bwa Pasika

¹² Pabushiku butaanshi bwakusekelela kwakulya Cimaande, bushiku ubo ndibakalinga kucaya twana twa mbelele twa pabushiku bwa Pasika bwakwiibaluka kusotokela, bashikwiiya bakwe bakamwiipusha ayi, “Ino nkuli nkomusuni kwaamba ayi tuye tukamubambile kwakulita cakulya ca bushiku bwa Pasika?”

¹³ Lyalo Jesu wakatuma bashikwiiya bakwe bamwi bobilo, akubalwiita ayi, “Kamuya mundabala inene iyi. Mutookumanya musankwa uyumwite nongo ya maanshi, mumukonkele.

¹⁴ Muŋanda umo mweshi anjile, mukamwaambile mwine ŋanda ayi, ‘Bafundishi besu batokwiipusha ayi ino cili kuli cipinda mweshi ndite cakulya ca bushiku bwa Pasika abashikwiiya bangu?’

¹⁵ Lyalo utoomutondesha cipinda cinene ca peculu cibambitwe kale. Mweenkoomo mweshi mubambile cakulya.”

¹⁶ Bashikwiiya abo bakanyamuka akuya mundabala inene umo, akucana shintu shoonse bweenka mbuli mbwaakabaambila. Mpeeke bakabamba cakulya ca bushiku bwa Pasika bwakwiibaluka kusotokela.

¹⁷ Ndipakashiyashiyabo, Jesu wakesa abashikwiiya bakwe bali likumi abobilo.

¹⁸ Ndibakalinga kushiite kabalya, Jesu wakaamba ayi, “Ntoomulwiita calushinisho ayi umwi wa mulikoto lyanu ngoontoolyaakwe, utoongaba.”

¹⁹ Mpeeke bashikwiiya bakwe bakacatwa buumba, lyalo bakatalika kwiipusha Jesu womwi awomwi ayi, “Sa ndime?”

²⁰ Mpomunyaawo Jesu wakabakumbula ayi, “Ngomwi wa mulikoto lyanu mwebo nobashikwiiya likumi abobilo uyo ngoontobwengaakwe cimaande mumbale yomwi.

²¹ MwanaaMuntu utooya kulufu kweelana ambokulembetwe, sombi mapensho kuli wooyo muntu utoomwaaba! Naakwiinga cakabotabo akutashalwa muntu uyo.”

Mulalilo wa Mwaami

²² Ndibakalinga kulya, Jesu wakabwesa cimaande, walumba Lesa, wakomoona, wapa bashikwiiya akubalwiita ayi, “Amutambule, uyu ngumubili wangu.”

²³ Lyalo wakabwesa nkomeshi, walumba Lesa akubapa bashikwiiya bakwe, boonse banwaamo.

²⁴ Lyalo wakabaambila ayi, “Ubu mbulowa bwangu bwa cipangano cipya bweshi bukatiilwe ceebo ca bantu baanji.

²⁵ Ntoomulwiita calushinisho ayi teshi nkanwewo lyobilo maanshi a shisepo sha minyansa, kushikila pabushiku ubo ndyeshi nkanwe maanshi apya a shisepo ishi muBweene bwakwe Lesa.”

²⁶ Ndibakamana kwiimba lwiimbo lwakulumbaisha Lesa, bakaya kuKalundu ka Olifi.

Jesu mbwaakaambila Pita ayi ulaakunkaka

²⁷ Jesu wakaambila bashikwiiya bakwe ayi, “Noonse mulaakutyongola akunshiya neenka. Kweelana ambokulembetwe ayi, ‘Ndaakucaya mweembeshi, mpeeke mbelele shoonse shilaakupalangana.’

²⁸ Sombi na nkabushikwe kuswa kubafu, ndaakutanjila kuya kuGalili.”

²⁹ Pita lakwe wakamwaambila ayi, “Nabi boonse bakatyongooke akumushiya, sombi nebo teshi nkamushiyeewo.”

³⁰ Mpomunyaawo Jesu wakaambila Pita ayi, “Ntookulwiita calushinisho ayi sunu lyeenka mashiku, kombwe kaatana kulila lyabili, utokwaamba mankanda otatwe ayi toonshi.”

³¹ Pita wakaamba cankusu ayi, “Nabi na baambe ayi bancaile pantu pomwi amwebo, nebo inga nshaambiiwo ayi nshimwishi.” Lyalo bashikwiiya boonse bakaamba bweenkoobo.

Jesu mbwaakapaila mumuunda wa Getisemani

³² Jesu abashikwiiya bakwe bakaya kumusena wiitwa ayi Getisemani. Lyalo Jesu wakabaambila ayi, “Amwikale pano ndyeenciya mukupaila.”

³³ Mpeeke Jesu wakaya aPita, Jemusi alimwi aJoni. Wakatalika kupenshekwa abuumbi akulisukama mumoyo.

³⁴ Mpeeke wakabaambila ayi, “Moyo wangu wacatwa buumba bwakuyanda kuncaya. Amwikale pano, munoolindilila kamulibambite.”

³⁵ Lyalo Jesu wakeendakobo paniini, mpeeke wakawita panshi akutalika kupaila ayi na kacikonsheka mapensho anene aya atamucitikili.

³⁶ Wakapaila ayi, “Ta, mwebo mulakonsha kucita shintu shoonse. Amukushe nkomeshi ya mapensho iyi pali ndime. Nakubi boobo mutaciti kweelana akuyanda kwangu, sombi amucite kuyanda kwanu.”

³⁷ Jesu ndyaakaboola kubashikwiiya bakwe botatwe abo, wakacana balilete. Lyalo wakaambila Pita ayi, “Simoni, sa ulilete? Sa waalilwa kulindilila apaciindi ciniinibo ici?

³⁸ Amwikale kamulibambite akupaila ayi mutanjili mumasunko. Moyo walo ulisuni, sombi mubili ngowabula nkusu.”

³⁹ Jesu wakaboolela mukupaila alimwi, kaamba maswi ngomunya alya ataanshi.

⁴⁰ Ndyaakaboola alimwi, wakacana balilete ceebo shikoye shabo shakalikulemete kutulo. Aboobo bakabula acakwaamba.

⁴¹ Ndyaakaboola lyatatu, wakabeepusha ayi, “Sa abubulya mucilete akunoocookesha? Ono bulya camana! Ciindi cashikila. Amubone, MwanaaMuntu ono utokwaabwa mumaansa a bamucita shibi.

⁴² Amunyamuke, katiya. Amubone, shikungaba washika kale.”

Jesu mbwaakacatwa

⁴³ Mpomunyaawo Jesu kaacaamba, alakwe Judasi, womwi wa bashikwiiya bakwe bali likumi abobilo wakashika. Wakesa abantu baanji bakalinga kucite mipeeni ankooli. Bantu aba bakabatuma mbamatanjilili ba bapailishi, bafundishi ba Milawo abamaloba.

⁴⁴ Ono uyo shikwaaba Jesu wakalinga wabapa kale citondesho ayi, “Uyo ngweshi njeenkaanshe akufyonta mwishibe ayi ngonguwe. Mumucaate, mumutoole kamumulamite cankusu.”

⁴⁵ Judasi ndyaakashika, wakeendililabo kuya kuli Jesu akwaamba ayi, “Mwaboneka Nkambo!” Mpomunyaawo wakamufyonta.

⁴⁶ Mpeeke abo bantu bakalibumba pali Jesu, bamucata.

⁴⁷ Sombi umwi muntu pabaabo baalingaawo, wakakusha mupeeni wakwe akusutula kutwi musha wa mupailishi munene.

⁴⁸ Ono Jesu wakabeepusha ayi, “Ino mweshitanshi amipeeni alimwi ankooli pakwisa mukuncata, anga ndi mwiipi?

⁴⁹ Nebo ndakalinga anu inshiku shiinji, kaamwiisha muŋanda yakwe Lesa, sombi tamukwe kuncataawo, sobwe. Sombi shoonse ishi shacitika kweelana ambokulembetwe muMalembo akwe Lesa.”

⁵⁰ Mpeeke bashikwiiya bakwe boonse bakamupalangana, bamushiya eenka.

⁵¹ Musankwa umwi wakalinga kufwetebo cisani ceenka, wakalinga kwisa cikonkela Jesu. Bantu ndibakalinga kusuni ayi alakwe bamucaate,

⁵² wakacica lubilo matakosha akubashiilabo cisani ncaakalinga kufwete.

Jesu mbobakamutola kunkuta

⁵³ Mpomunyaawo Jesu bakamutola kumupailishi munene. Lyalo boonse bamatanjilili ba bapailishi, bamaloba alimwi abafundishi ba Milawo bakabungana pantu pomwi.

⁵⁴ Alakwe Pita wakalinga kuya cikonkela Jesu palaale, wakaya mukwinjila amulubansa lwa ŋanda ya mupailishi munene. Mpeeke wakekala pantu pomwi abeshikulindilila kuŊanda yakwe Lesa kaayota mulilo.

⁵⁵ Bamatanjilili ba bapailishi alimwi abaabo boonse beendelesha nkuta, bakalinga kuyandoola bukamboni bwakwaamba ayi bacanine Jesu mulandu wakumucailaawo, sombi tabakwe kubucana.

⁵⁶ Nakubi kwaamba ayi bantu baanji bakalinga kupa bukamboni bwakubeca pali Jesu, bukamboni bwabo tabukwe kukoshanya.

⁵⁷ Lyalo bamwi bakanyamuka akubekesha Jesu ayi,

⁵⁸ “Uyu muntu twakamunyumfwa kaamba ayi, ‘Nebo ndaakumwaya Ŋanda yakwe Lesa iyi yakayakwabo abantu alimwi munshiku shotatwe, ndaakuyaka imwi yeshi ikabule kuyakwa abantu.’ ”

⁵⁹ Abalo bantu aba boonse bukamboni bwabo tabukwe kukoshanya.

⁶⁰ Lyalo mupailishi munene wakanyamuka pameenso abo boonse, akwiipusha Jesu ayi, “Sa teshi ukumbuleewo pamakani aya oonse ngobatookwaambila?”

⁶¹ Sombi Jesu wakoomunabo tontolo, taaku ncakakumbulaawo. Mupailishi munene wakeepusha Jesu alimwi ayi, “Sa ndiwe Usalitwe, Mwanaakwe Lesa ulemekwa?”

⁶² Jesu wakakumbula ayi, “Ee, ndime, alimwi noonse mulaakubona MwanaaMuntu kaashite kulyaansa lyalulyo lya baIshi Beshinkusu shoonse. Mulaakumubona keesa mumakumbi a kwiculu.”

⁶³ Mpomunyaawo mupailishi munene wakakwamoona shakufwala shakwe akwaamba ayi, “Ono apa sa inga katucilangoola abamwi bakamboni?

⁶⁴ Noonse mwalinyumfwila mbwaacobola Lesa. Ono mutooyeeya buyani?” Lyalo boonse bakakumbula ayi acaikwe.

⁶⁵ Mpomunyaawo bamwi bakatalika kumushipila mate, bamufweka pameenso, bamuuma akumwiipusha ayi, “Twaambile na inga wamwishiba wakuuma?” Abalo beshikulindilila bakeendililabo kunomuuma makoofi.

Pita mbwaakakaka Jesu

⁶⁶ Pita ndyaakalinga muunshi, kaali mulubansa lwa ŋanda, umwi mwanakashi musebenshi wa mupailishi munene wakesa kuli nguwe.

⁶⁷ Ndyaakabona Pita kaayota mulilo, wakamulangilishisha akumwaambila ayi, “Awebo wakalinga aJesu ulya wa kuNasaleti.”

⁶⁸ Sombi Pita wakakaka, akwaamba ayi, “Isho nshotokwaamba, nshishishiiwo alimwi nshintooshinyumfwaawo akushinyumfwa.” Lyalo Pita wakaswita pansengwe kuswa mulubansa. Ciindi ceenka ico, akombwe wakalila.

⁶⁹ Mwanakashi uyo musebenshi wakabona Pita akutalika kulwiita baabo bakalingaawo ayi, “Alakwe muntu ulya ngwa mulikoto lyakwe Jesu.”

⁷⁰ Sombi Pita wakakaka alimwi. Ndipakeendabo ciindi ciniini, bantu abo bakalingaawo bakaambila Pita alimwi ayi, “Ncakwiila webo uli wa mulikoto lyakwe Jesu mukwiinga awebo uli wa kuGalili.”

⁷¹ Pita wakaalabo, wasansaawo amaanshi akutalika kulumbila ayi, “Lesa ulimbwene na ntokwaamba cakubeca. Uyu muntu ngomutokwaamba, nebo nshimwishiiwo.”

⁷² Amanebo kwaamba boobo Pita, kombwe wakalila lwabili. Lyalo wakeebaluka maswi akamulwiita Jesu ayi, “Kombwe kaatana kulila mankanda obilo, webo Pita ulaakunkaka mankanda otatwe.” Mpeeke wakatalika kulila.