Maako 13 - Baibo Busansulushi Bwa Libuku Ili

Jesu mbwaakaamba shakunyonyooka kwa Ŋanda yakwe Lesa

¹ Jesu ndyaakalinga kuswa muŊanda yakwe Lesa, umwi shikwiiya wakwe wakamwaambila ayi, “Bafundishi, amubone mabwe aya kukomena amaanda kubota!”

² Mpomunyaawo Jesu wakamukumbula ayi, “Te waabona maanda anene anene oonse aya? Taaku libwe nabi lyomwi lyeshi likacaale palibwenyina, oonse alaakumwayululwa.”

Makatasho alimwi amapensho

³ Jesu ndyaakalinga kushiite paKalundu ka Olifi kalangene aŊanda yakwe Lesa, Pita, Jemusi, Joni alimwi aAndulu bakeepusha Jesu ndibakalinga beenka ayi,

⁴ “Amutulwiite, ino shintu ishi shilaakucitika lili? Tulaakwishibila kunshi ayi shintu ishi shoonse shitooyanda kucitika?”

⁵ Lyalo Jesu wakabaambila ayi, “Amucenjele kwaamba ayi kutakabi muntu nabi womwi eshi akamucenjeeke.

⁶ Mukwiinga bantu baanji balaakwisa muliina lyangu, akunokwaamba ayi, ‘Ndime wooyo Usalitwe wakwe Lesa,’ alimwi balaakucenjeeka bantu baanji.

⁷ Na mukanyumfwe nkondo alimwi ampuuwo sha nkondo, mutakalisukami. Ishi shilaakucitika, sombi teshi kwaamba ayi ngomamanino a cishi.

⁸ Mushobo umwi ulaakubukila ubye, abwalo buleelo bulaakubukila bulelonyina. Kulaakuba shitentanshi mumisena ipusenepusene alimwi ansala. Shoonse ishi ngamatalikilobo a mapensho.

⁹ “Sombi amwebo mulyeelete kucenjela. Mukwiinga bantu balaakumutola munkuta. Balaakumukwipila mushoonde sha baJuda. Mulaakwiimikana kunembo lya baleli ba shishi alimwi abamaami ceebo ca liina lyangu kwaamba ayi mupe bukamboni pameenso abo.

¹⁰ Sombi citaanshi, Makani Abotu alyeelete kushimikilwa kumishobo yoonse ya bantu.

¹¹ Na bamutola kunkuta mukoombolola, mutalisukami ayi, ‘Ino tutooya mukwaambanshi?’ Sombi mukaambe cintu cili coonse nceenga mwapekwa paciindi ico, mukwiinga teshi ndimwe mweshi mukanokwaamba, nguMushimu Usalashi.

¹² Muntu ulaakubenga mukwabo wa lifumo lyomwi ayi acaikwe, abalo bamaishiwabo balaakubenga bana babo. Abalo baana balaakubukila bamashali, akubacaisha.

¹³ Bantu boonse balaakumupata ceebo ca liina lyangu. Sombi uyo eshi akayuminine kushikila kumamanino a mapensho aya ulaakupulushikwa.

Cintu cilya Ciloondesha

¹⁴ “Na mukabone Cintu cilya Ciloondesha ico cibisha kaciimfwi pamusena mpociteelete kuba, (utoobelenga anyumfwishishe), lyalo abo bali kuJudeya bakacicile kutulundu.

¹⁵ Uyo eshi akanooli paciluli ca ŋanda, atakaseluki kwaamba ayi enjile muŋanda mukukusha cimwi cintu.

¹⁶ Alakwe eshi akanooli mumuunda, atakabooleli kuŋanda mukubwesa cakufwala ca peculu.

¹⁷ Mapensho kubanakashi beshi bakanooli pakati abeshi bakanoocite baana bayamwa munshiku isho!

¹⁸ Kamupaila kwaamba ayi ishi shitakacitiki ciindi ca mupewo.

¹⁹ Mukwiinga mapensho eshi akabeeko ciindi ico taakwe kubonekaawo kale, kuswabo Lesa ndyaakatalika kulenga cishi ca panshi kushikila asunu. Ncakwiila teshi akabooleewo.

²⁰ Nikuteshi Mwaami Lesa kufwiimpyako nshiku isho sha mapensho, naakwiinga taaku muntu nabi womwi wakacaala kaali muumi. Sombi ceebo ca baabo basalitwe, abo mbwaakasala mwiine, ncakwiila Lesa wakashifwiimpya nshiku.

²¹ “Na umwi muntu akamwaambile ayi, ‘Amubone, Usalitwe wakwe Lesa uli kokuno,’ nabi umwi alakwe akamwaambile ayi, ‘Amubone, ngulya uli kokulya,’ mutakamunyumfwili.

²² Mukwiinga abo balyaamba ayi, ‘Ndime Usalitwe wakwe Lesa,’ nabi ayi, ‘Ndi mulaluki,’ balaakwisa. Balaakucita shitondesho sha nkusu sha kwiculu alimwi ashaankamiko kwaamba ayi bacenjeeke, na kacikonsheka, abaabo boonse mbwaakasala Lesa.

²³ Sombi mwebo amucenjele mukwiinga ndamulwiitilabo limwi shintu shoonse ishi kashitana kucitika.

Kwisa kwa MwanaaMuntu

²⁴ “Sombi munshiku isho, mapensho na akamaane, lisuba lilaakubabo munshinshe, mweenshi ulaakucileka kumunika,

²⁵ nyenyeenshi shilaakuloka kuswa mwiculu ashalo nkusu sha mwiculu shilaakutenkaanishikwa.

²⁶ Mpomunyaawo bantu balaakubona MwanaaMuntu keesa mumakumbi ankusu shiinji alimwi abulemu.

²⁷ Lyalo MwanaaMuntu ulaakutuma baanjelo kwaamba ayi babunganye bantu bakwe basalitwe kuswa kwicwe, kumbo, kumalenge alimwi akumatwa kushikila cishi coonse mpociswa ampoceela.

Ciiyo ca cisamu ca mukuyu

²⁸ “Amwiiye ciiyo kuswa pacisamu ca mukuyu. Na mwabona misampi ya ncico yatalika kutontolatontola amatewu na atalika kusonsa, muleshiba ayi meensa ali pafwaafwi.

²⁹ Mbweeke ubo amwebo, na mukabone shintu ishi kashicitika, mukeshibe kwaamba ayi MwanaaMuntu uli pafwaafwi kwisa, ingayi ulibo pamulyango.

³⁰ Ntoomulwiita calushinisho ayi shintu shoonse ishi shilaakucitika, bantu boonse baliiwo bulya kabatana kumaninina kufwa.

³¹ Liculu alimwi acishi ca panshi shilaakumana, sombi maswi angu teshi akamaneewo, sobwe.

Taaku ushi bushiku nabi ciindi

³² “Sombi pamakani a bushiku bwakwisa nabi ciindi, taaku nabi womwi ushi. Baanjelo boonse ba kwiculu tabeshi, nabi MwanaaMuntu teeshiiwo, sombibo baTa beenka.

³³ Amucenjele, mulangishishe, mukwiinga tamwishi ciindi ico ndyeshi cikashiike.

³⁴ Cilibo anga ngumuntu uli palweendo lwakuswa paŋanda yakwe. Ulaashiya ncito shoonse mumaansa a basebenshi bakwe, womwi ancito yakwe, akulwiita shikulindilila pamulyango ayi alindilile.

³⁵ Anu kamulibambitebo lyoonse mukwiinga tamwishi na mwine ŋanda ulaakwisa lili. Mpashi akese macolesha, pakati ka mashiku, kumuyamaca nabi macuunsa.

³⁶ Na akaboole cakupulumukabo atakacani kamulete.

³⁷ Ishi nshentoomulwiita, ntokwaambila bantu boonse ayi, ‘Kamulibambitebo lyoonse!’ ”