Maako 10 - Baibo Busansulushi Bwa Libuku Ili

Makani a kulekana

¹ Jesu wakaswaako kuKapenaumu akuya kucishi ca Judeya kwitala lya Mulonga wa Joodani. Bantu baanji baanji bakabungana alimwi kuli nguwe. Alakwe wakatalika kubeeisha kweelana ambwaakalinga kushibite.

² BaFalisi bamwi bakesa kuli Jesu akumwiipusha cakumusunka ayi, “Sa cilasuminishikwa muMilawo muntu kuleka mukaakwe?”

³ Alakwe Jesu wakabakumbula ayi, “Ino ngumulawonshi Mose ngwaakamupa?”

⁴ Mpeeke abalo bakamukumbula ayi, “Mose wakasuminisha musankwa kulembela mukaakwe nkalata yakumuleka. Lyalo inga wamuleka.”

⁵ Mpomunyaawo Jesu wakabaambila ayi, “Mose wakamupa mulawo uyu mukwiinga muli beshicimpamya.

⁶ Sombi tulabelenga ayi kumatalikilo, ‘Lesa wakabalenga musankwa amwanakashi.’

⁷ ‘Paceebo ceeco, musankwa ulaakushiya baishi abanyina akupankana amukaakwe.

⁸ Lyalo bantu bobilo aba balaakuba mubili womwi.’ Nkokwaamba ayi tababete bobilo ono, sombi baba mubili womwi.

⁹ Aboobo bantu abo Lesa mbwaabika pantu pomwi, muntu ateeleshi kubapansaanya.”

¹⁰ Ndibakenjila muŋanda alimwi, bashikwiiya bakwe bakamwiipushaawo pamakani ngomunya aya.

¹¹ Lyalo Jesu wakabaambila ayi, “Muntu uli woonse uleka mukaakwe akweeba umbi, wacita bulale kuli nguwe.

¹² Alakwe mwanakashi na waleka ibaye akweebwa kumbi, nkokwaamba ayi alakwe wacita bulale.”

Jesu mbwaakapa coolwe baana

¹³ Bantu bamwi bakalinga kutola baana baniini kuli Jesu, ayi abacaate amaansaakwe kwaamba ayi abape coolwe, sombi bashikwiiya bakwe bakabakalalila.

¹⁴ Jesu ndyaakabona boobo, wakakalalila bashikwiiya bakwe akubaambila ayi, “Amuleke baana baniini bese kuli ndime. Mutanoobakasha ceebo Bweene bwakwe Lesa mbwa baabo bali mbuli baaba.

¹⁵ Ntoomulwiita calushinisho ayi uyo woonse utatambuli Bweene bwakwe Lesa anga ngumwaana, ncakwiila teshi akenjileemo.”

¹⁶ Lyalo Jesu wakafukata baana aba akubacata pamitwi alimwi akubapa coolwe.

Musankwa mubile

¹⁷ Jesu ndyaakanyamukabo ayi anooya, musankwa umwi wakamucicilila. Wakashika wafukama kunembo lyakwe akwiipusha ayi, “NoBafundishi babotu, ino inga ndacita buyani kwaamba ayi nkabe abuumi butamaani?”

¹⁸ Mpomunyaawo Jesu wakamwiipusha ayi, “Ceebonshi waamba ayi ndi kabotu? Taakuuwo muntu uli kabotu, sombibo Lesa eenka.

¹⁹ Yalo milawo uliishi yaamba ayi, ‘Utacaayi, utaciti bulale, uteepi, utapi bukamboni bwakubeca, utapambi alimwi lemeka baiso abanyoko.’ ”

²⁰ Mpomunyaawo musankwa uyu wakakumbula ayi, “NoBafundishi, milawo yoonse iyi ndailama kuswabo kubwanike bwangu.”

²¹ Lyalo Jesu wakamulangilishisha calusuno akumwaambila ayi, “Kwacaalabo cintu comwi. Koya ukoolishe shintu shoonse nshoocite. Maali ngweshi ukacaneemo, ukaabile bakandu, lyalo ulaakucana bubile kwiculu. Na umanishe kucita boobo, ndyeshi use unkonkele.”

²² Ndyaakanyumfwa maswi aya, musankwa uyu wakoongumana alimwi wakaswaawo abuumba mukwiinga wakalinga mubile.

²³ Mpomunyaawo Jesu wakacebuka, walanga bashikwiiya bakwe bakalinga kumushingulukite akubaambila ayi, “Nciyumu abuumbi kubantu babile kwinjila muBweene bwakwe Lesa!”

²⁴ Bashikwiiya bakwe bakakankamana ndibakanyumfwa maswi aya. Sombi lakwe Jesu wakabaambila alimwi ayi, “Nobamakwesu, ncintu ciyumu abuumbi kwinjila muBweene bwakwe Lesa!

²⁵ Ncuubu ngamela kupula muliinso lya nyeleti, kwiinda muntu mubile kwinjila muBweene bwakwe Lesa.”

²⁶ Lyalo bashikwiiya bakwe bakakankamana abuumbi. Aboobo bakatalika kwiipushanya ayi, “Nkokwaamba ayi ngani eshi akapulushikwe?”

²⁷ Jesu wakabalanga akubalwiita ayi, “Kubantu ici inga tacicitikiiwo, sombi kuli Lesa inga cacitika mukwiinga shoonse shintu shilakonsheka kuli nguwe.”

²⁸ Mpomunyaawo Pita wakatalika kwaambila Jesu ayi, “Amubone, swebo twakashiya shoonse akumukonkela.”

²⁹ Jesu wakaamba ayi, “Ndushinisho ntoomulwiita ayi taaku muntu uyo wakashiya ŋanda yakwe nabi wakashiya banandumi, banankashi shakwe, banyina, baishi, baana nabi myuunda ceebo ca liina lyangu alimwi aMakani Abotu,

³⁰ eshi akabule kutambula myaanda ya shintu paciindi cino. Uyo ulaakuba amaanda aanji, banandumi abanankashi shakwe baanji, banyina abaana baanji alimwi amyuunda iinji, sombi ulaakutambula alimwi amapensho. Ono sombi muciindi citoosa, ulaakutambula buumi butamaani.

³¹ Sombi baanji abo bataanshi, balaakuba bacaalishi. Abalo abo bacaalishi, balaakuba bataanshi.”

Jesu mbwaakaamba shalufu lwakwe lyatatu

³² Jesu abashikwiiya bakwe ndibakalinga kuya kuJelusalemu, lakwe wakatanjila panembo lyabo. Bashikwiiya bakwe bakalisukama, abalo bantu bakalinga kwisa cibakonkela bakaloonda. Lyalo Jesu wakeeta bashikwiiya bakwe bali likumi abobilo palubasu alimwi. Mpeeke wakatalika kubalwiita sheshi shikacitike kuli nguwe.

³³ Wakaamba ayi, “Tutooya kuJelusalemu, uko MwanaaMuntu nkweshi bakamwaabe kubamatanjilili ba bapailishi abafundishi ba Milawo. Balaakumupingula ayi acaikwe akumwaaba kubaswamashi bakunsengwe.

³⁴ Abalo abo balaakumuwela, kumushipila mate, kumukwiipa alimwi akumucaya. Sombi pabushiku bwatatu, ulaakubuka kuswa kubafu.”

Kusenga kwakwe Jemusi aJoni

³⁵ Jemusi alimwi aJoni, bana bakwe Sebedi, bakaya kuli Jesu akumwaambila ayi, “Bafundishi, tulisuni kwaamba ayi mutucitile cili coonse nceshi tusenge.”

³⁶ Mpeeke Jesu wakabeepusha ayi, “Nciinshi ncemusuni kwaamba ayi mucitile?”

³⁷ Abalo bakakumbula ayi, “Mwaakwikala pacuuna canu cabulemu, tulisuni kwaamba ayi mukatusuminishe kwikala umwi kululyo lwanu, alakwe umwi kucipiko.”

³⁸ Sombi Jesu wakabaambila ayi, “Tamucishi ncemutoosenga. Sa inga mwanwita munkomeshi ya mapensho njeshi nkanwiteemo? Sa inga mwabombekwa bweenka mbweshi nkabombekwe nebo?”

³⁹ Mpeeke bakamukumbula ayi, “Inga twacikonsha.” Lyalo Jesu wakabaambila ayi, “Nkomeshi njeshi nkamwiteemo, amwebo mulaakunwitaamo. Kubombekwa nkweshi nkabombekwe, amwebo nkweshi mukabombekwe.

⁴⁰ Sombi nebo nshicite nkusu shakusala wooyo eshi akekale kululyo lwangu nabi kucipiko. MbaTa beshi bakape misena iyi kubaabo mbobakabambila.”

⁴¹ Ono bashikwiiya bamwi bali likumi ndibakanyumfwa makani aya, bakatalika kukalalila Jemusi aJoni.

⁴² Mpomunyaawo Jesu wakabeeta bashikwiiya boonse akubalwiita ayi, “Mwebo mulishi kwaamba ayi abo babandwa ayi baami ba baswamashi bakunsengwe, balabonesha bwaami pali mbabo. Abalo beendeleshi babo mbweeke ubo.

⁴³ Sombi tabwishi mbocibete ubo pali ndimwe. Uyo woonse usuni kuba munene pali ndimwe, ulyeelete kuba musebenshi wanu.

⁴⁴ Ncakwiila uyo woonse usuni kuba mutanjilili pali ndimwe, ulyeelete kuba musha wa boonse.

⁴⁵ Mukwiinga MwanaaMuntu alakwe taakwe kwisa mukusebenselwa, sombi mukusebensela bamwi akwaaba buumi bwakwe kwaamba ayi alubule bantu baanji.”

Jesu mbwaakashilika Batimeyasi moofu

⁴⁶ Mpomunyaawo bakashika mundabala ya Jeliko. Lyalo Jesu ndyaakaswaamo pantu pomwi abashikwiiya bakwe alimwi abantu baanji baanji, moofu wiitwa ayi Batimeyasi, mwanaakwe Timeyasi wakalinga kushiite mweela nshila kaasenga maali.

⁴⁷ Ndyaakanyumfwa ayi nguJesu wa kuNasaleti utokwiinda, wakatalika koolobesha ayi, “BaJesu, nobana babo baDefedi, amunyumfwileko nkumbu!”

⁴⁸ Bantu baanji bakamukalalila akumwaambila ayi aumune. Sombi lakwe wakeendilishaawo koolobesha ayi, “NoBana babo baDefedi, amunyumfwileko nkumbu!”

⁴⁹ Mpomunyaawo Jesu wakeemikana akwaamba ayi, “Amumwiite.” Mpeeke bakamwiita moofu uyo akumwaambila ayi, “Kalika moyo, nyamuka kosa kuno, utookwiita.”

⁵⁰ Lyalo moofu uyu wakafuula cakufwala ca peculu akuciwaala panshi akuya kuli Jesu.

⁵¹ Mpeeke Jesu wakamwiipusha ayi, “Nciinshi ncoosuni ayi nkucitile?” Alakwe moofu wakakumbula ayi, “Bafundishi, ndisuni kwaamba ayi ntalike kubona alimwi.”

⁵² Lyalo Jesu wakamwaambila ayi, “Koya unooya, lushomo lwako lwakushilika.” Paciindi ceenka ico wakatalika kubona. Lyalo wakakonkela Jesu nkwaakalinga kuya.