Maako 1 - Baibo Busansulushi Bwa Libuku Ili

Kushimikila kwakwe Joni Mubombeki

¹ Aya ngomatalikilo a Makani Abotu aamba pali Jesu Klistu, Mwanaakwe Lesa.

² Cakatalika mbuli mbwaakalemba Isaya mulaluki mukulukulu ayi, “Lesa wakaamba ayi, ‘Ndaakutuma muntu wangu kunembo lyako eshi akakubambile nshila.’

³ Muntu umwi utokoolobesha muluyanga ayi, ‘Amubambe nshila ya Mwaami. Amumululikile nshila.’ ”

⁴ Paceebo ceeco, Joni wakesa kulubasu lwa luyanga kaabombeka akushimikila ayi, “Amusanduke kuswa kushibiibi shanu, mubombekwe nkwaamba ayi Lesa amulekelele shibiibi shanu.”

⁵ Bantu baanji ba mucishi ca Judeya amundabala inene ya Jelusalemu, bakaya kuli Joni mukunyumfwa. Ndibakamana kulyaambilila shibiibi shabo, wakababombeka muMulonga wa Joodani.

⁶ Joni wakalinga kufwala shakufwala shakapangwa abooya bwa ngamela alimwi alaamba wacipaya mubukome. Wakalinga kulyabo nsoshi abuuci.

⁷ Wakabaambila bantu ayi, “Uyo utoosa pesule lyangu uleendaawo nkusu pali ndime. Nsheeleteewo akukotama kwaangulula nsapato shakwe.

⁸ Nebo ntoomubombeka amaanshi, sombi lakwe ulaakumubombeka aMushimu Usalashi.”

Kubombekwa akusunkwa kwakwe Jesu

⁹ Kakutana kwiinda aciindi cilaamfu, Jesu wakesa kuswa kuNasaleti mucishi ca Galili. Lyalo Joni wakamubombeka muMulonga wa Joodani.

¹⁰ Ndyaakaswabo mumaanshi, wakabona kwiculu kwacaluka alimwi aMushimu Usalashi kauseluka pali nguwe anga nimpolobe.

¹¹ Mpomunyaawo liswi lyakanyumfwika kuswa kwiculu ayi, “Ndiwe Mwanaangu ngoonsuni abuumbi, pali ndiwe ndikondetwe abuumbi.”

¹² Paciindi ceenka ico, Mushimu Usalashi wakamutola muluyanga

¹³ umo mwaakekala nshiku makumi one kaasunkwa aSatana. Wakekala muluyanga mwikala banyama, lyalo baanjelo bakamutabatila.

Jesu mbwaakeeta bashikwiiya bataanshi

¹⁴ Joni ndibakamubika muntolongo, Jesu wakaya kuGalili kaashimikila Makani Abotu akwe Lesa.

¹⁵ Wakaamba ayi, “Ciindi ceelete cashikila. Bweene bwakwe Lesa buli pafwaafwi. Amusanduke kuswa kushibiibi shanu, mushome Makani Abotu!”

¹⁶ Jesu ndyaakalinga kwiinda muloombe lwa Lweenge lwa Galili, wakabona Simoni alimwi aAndulu mwanike wakwe kabawaala koombe mumaanshi ceebo bakalinga beshikucaya nswi.

¹⁷ Jesu wakabaambila ayi, “Amunkonkele, ndaakumupa nkusu shakuleta bantu kuli ndime bweenka mbomwalinga kucata nswi.”

¹⁸ Amanebo kwaamba boobo, bakashiya toombe twabo akumukonkela.

¹⁹ Ndyaakeendakobo paniini, wakabona Jemusi aJoni mwanike wakwe, bana bakwe Sebedi, kabali mubwaato kababamba toombe twabo.

²⁰ Jesu ndyaakababonabo, wakabeeta. Mukufwambaana abalo bakashiya ishiwabo Sebedi abasebenshi mubwaato akumukonkela.

Jesu mbwaakakusha shikaswa mumusankwa wa kuKapenaumu

²¹ Jesu abashikwiiya bakwe bakashika mundabala ya Kapenaumu. Ndibwakashika bushiku bwakookesha bwa Cibelu, Jesu wakaya mucoonde ca baJuda akutalika kwiisha.

²² Boonse bakakankamana abuumbi ndibakanyumfwa kwiisha kwakwe, mukwiinga wakeeisha ankusu, kuteelana abafundishi ba Milawo.

²³ Kaaciisha mucoonde kwakaboneka muntu wakalinga kucite shikaswa wakatama ayi,

²⁴ “Anu twamucitanshi mwebo nobaJesu ba kuNasaleti? Sa mwesa mukutunyonyoola? Ndimwishi, ndimwe wooyo Usalalite uswa kuli Lesa!”

²⁵ Lyalo Jesu wakakalalila shikaswa ayi, “Umuna, swa muli nguwe!”

²⁶ Shikaswa wakamunyukumuna abuumbi, wakatama cankusu akuswaamo.

²⁷ Bantu boonse bakakankamana akutalika kuliipusha ayi, “Anu nciinshi ici? Anu nkwiisha kupya kuli buyani uku? Uyu muntu ulicite nkusu shakwaambilabo liswi bashikaswa abalo bamunyumfwila!”

²⁸ Mpomunyaawo impuwo yakwiisha kwakwe yakanyumfwika mucishi coonse ca Galili.

Jesu mbwaakashilika bantu baanji

²⁹ Ndibakaswabo mucoonde ca baJuda, Jesu pantu pomwi aJemusi aJoni, bakalulamabo kumishaabo Simoni aAndulu.

³⁰ Bapongoshi bakwe Simoni banakashi bakalinga balwashi cimpwita, kabaletebo mubulo. Ndyaakashikabo Jesu, bakalingaawo bakamulwiita kuciswa kwa bapongoshi bakwe Simoni.

³¹ Mpomunyaawo wakaya muŋanda mwakalinga balwashi, wabacata palyaansa akubabusha. Lyalo cimpwita cakamana, bakatalika kutabataba akubapa shakulya.

³² Ciindi camuntungulya, bantu bakaleta balwashi baanji abaabo bakalinga kucite bashikaswa kuli Jesu.

³³ Bantu baanji ba mundabala mulya bakesa mukubungana paŋanda.

³⁴ Jesu wakashilika bantu baanji bakalinga kuciswa malwashi apusenepusene alimwi akukusha bashikaswa baanji. Wakakasha bashikaswa abo kwaamba mukwiinga balo bakalinga kumwiishi ayi nguMwanaakwe Lesa.

Jesu mbwaakashimikila muGalili

³⁵ Bushiku bwakaboolaawo kumuyamaca, Jesu wakabuka akuswa muŋanda. Lyalo wakaswa mundabala akuya kumusena kwatakalinga kwikala bantu uko nkwaakaya mukupailila.

³⁶ Simoni abaabo babye mbwaakalingaabo bakaya cilangoola Jesu.

³⁷ Ndibakamucana, bakaamba ayi, “Bantu boonse batoomuyandoola.”

³⁸ Jesu wakakumbula ayi, “Tulyeelete kuya kumishi imwi akwalo nje nkashimikile mukwiinga ncendakeshita.”

³⁹ Aboobo wakeenda mucishi coonse ca Galili, kaaya cishimikila mushoonde sha baJuda akukusha bashikaswa.

Jesu mbwaakashilika musankwa wakalinga kuciswa manata

⁴⁰ Umwi musankwa mulwashi manata wakesa kuli Jesu, wafukama akusenga ayi, “Na kamusuni, inga mwanshilika.”

⁴¹ Ndishakamucata nkumbu Jesu, wakafungulula lyaansa lyakwe akumucata kaamba ayi, “Ee ndisuni, ba kabotu!”

⁴² Mpomunyaawo manata akamana, wakaba kabotu alimwi.

⁴³ Jesu wakamwaambila ayi anooya alimwi wakamukonkomesha ayi,

⁴⁴ “Nyumfwa, utalwiiti muntu nabi womwi pacikani ici. Sombi ululamebo kuya kumupailishi, ukalitondeshe kuli nguwe ayi waba kabotu. Koya upe cipo kweelana abwakaamba Mose kwaamba ayi bantu bashome ayi waba kabotu.”

⁴⁵ Ono lakwe uyo wakaba kabotu wakalingooyabo cishimika kubantu boonse. Ncakwiila kwaamba kwakwe kwakalenga ayi Jesu atalike kweenda cakuyubayuba mundabala alimwi wakalinga kwikala kulaale amishi. Nakubi boobo bantu bakalinga kuya kuli nguwe kuswa kumisena ipusenepusene.