Lute 4 - Baibo Busansulushi Bwa Libuku Ili

Bowasi mbwaakeeba Lute

¹ Mpeeke Bowasi wakaya kumwinjililo wa ndabala akwikala uko. Lyalo shikamukowa wakwe Elimeleki uyo Bowasi ngwaakalinga waambaawo wakesa pafwaafwi. Mpomunyaawo Bowasi wakamwiita ayi, “Shikookuno mwana, kala panshi.” Alakwe wakaya wekala.

² Lyalo Bowasi wakeeta abamaloba ba mundabala bali likumi akubasenga ayi bekale apo peenka abalo. Ndibakalinga kushiite,

³ wakaambila shikamukowa uyo ayi, “Bulya Naomi mbwaakaboola kuswa kuMoabu, ulisuni kuulisha muunda wakalinga wa mukwabesu Elimeleki.

⁴ Aboobo ndayeeya kwaamba ayi ndyeelete kukwishibisha cikani ici. Ono na ulisuni kuwuula, wuule pameenso a bamanene aba bashiite pano. Sombi na toosuni waambe, ceebo ndiwe weelete kutaanguna kwiipushikwa shakuula muunda ulya, pesule ndime.” Musankwa uyo wakaamba ayi, “Ntoowuula.”

⁵ Lyalo Bowasi wakaamba ayi, “Ncibotu. Ono na utoowuula kuswa kuli Naomi, ingayi utokuulila kuntu komwi aLute mukalubinje mwine Moabu. Ulyeelete kucita boobo ayi muunda unooli mumaansa a bamuŋanda ya mulobe Elimeleki.”

⁶ Musankwa ulya wakaamba ayi, “Na mboboobo, ingayi nshikoonshi kuwuula ceebo ono citokwaamba ayi bana bangu tabakoonshi kuubwesa nebo na ndafwa. Wuule webo. Nebo inga cabota kutawuulabo.”

⁷ Ono munshiku isho, kumanisha makani mukuulisha nabi mukushinta cimwi cintu, cakalinga kushibite utokuulisha kufuula nsapato yomwi akupa utokuula. Mukucita boobo bene Isilaeli mobakalinga kutondeshela ayi makani amana.

⁸ Aboobo musankwa ulya ndyaakaambila Bowasi ayi, “Webo wuule,” wakafuula nsapato yakwe akupa Bowasi.

⁹ Mpomunyaawo Bowasi wakaambila bamaloba abo abantu bamwi bakalingaawo ayi, “Noonse bulya muli bakamboni ayi sunu ndoola kuswa kuli Naomi shoonse shakalinga shakwe Elimeleki abana bakwe basankwa, Kilyoni aMaloni.

¹⁰ Kwiilikaawo apo, Lute mwine Moabu wakalinga muka Maloni mulobe, waba mukaangu. Ici citoolengesha ayi buboni bwa mulobe bunoocili mumaansa a bamuŋanda yakwe. Bamulunyungu lwakwe abalo bananooshiite pakati ka beshikamukowa wakwe, nkokwaamba ayi mundabala umo mweenka Maloni mwaakalinga kwikala. Mwebo muli bakamboni bangu sunu!”

¹¹ Bamaloba abamwi boonse bakalinga kumwinjililo wa ndabala bakaamba ayi, “Ee tuli bakamboni. Mwaami Lesa aalengeshe bakaako kuba mbuli Lakelo aLeya, abo bakashalila Jakobo baana baanji. Aakulengeshe kubila mucipani cakwe Efulati akupuka muno muBetileemu.

¹² Baana abo Mwaami Lesa mbweshi akakupe mumwanakashi uyu cikula bwangu, abalengeshe bamuŋanda yako kuba anga mbakwe Pelisi mwaana musankwa uyo Tama ngwaakashalila Juda.”

Bowasi abamulunyungu lwakwe

¹³ Aboobo Bowasi wakeeba Lute. Mwaami Lesa wakamupa coolwe cakumita akuba amwaana musankwa.

¹⁴ Mpeeke banakashi bakaambila Naomi ayi, “Aalumbwe Mwaami Lesa! Wakupa mushikulu musankwa ayi akakulaame. Mwaana uyu aakapuke muno muIsilaeli!

¹⁵ Mulokashi wako ulikusuni alimwi wakacita shintu shiinda kuba abaana basankwa bali bosanwe abobilo. Ono ngooyu wakushalila amushikulu musankwa, uyu weshi akalete buumi bupya kuli ndiwe alimwi weshi akakulaame waakucembela.”

¹⁶ Naomi wakabwesa mwaana wamufukata akutalika kumulela kabotu.

¹⁷ Beshikamukobonyina Naomi banakashi bakaambila bantu boonse ayi, “Kwashalwa mwaana kuli Naomi!” Bakatumba mwaana uyo ayi Obedi. Obedi ngowakalinga ishi Jese uyo wakashala Defedi.

¹⁸ Ono mulunyungu lwakwe Pelisi, Pelisi wakashala Esiloni,

¹⁹ Esiloni wakashala Lamu, Lamu wakashala Aminadabu.

²⁰ Aminadabu wakashala Nashoni, Nashoni wakashala Salumoni.

²¹ Salumoni wakashala Bowasi, Bowasi wakashala Obedi.

²² Obedi wakashala Jese, lyalo Jese wakashala Defedi.