Lute 3 - Baibo Busansulushi Bwa Libuku Ili

Lute mbwaakeebwa alimwi

¹ Mpeeke mukuya kwa nshiku, Naomi wakaambila Lute ayi, “Omwanaangu mbuyani na ndakuyandweetawo shikukweeba kwaamba ayi shintu shinookweendela kabotu?

² Ingashila kwaamba ayi Bowasi mwine banakashi mbowalinga kusebensaabo, ngushikamukowa wesu. Ono kutika, sunu macolesha unanoolupula bale palubansa lwakwe lwakulupwitaawo.

³ Usambe, ulibike mafuta anunkila kabotu akufwala shakufwala shiindaawo kubota nshoocite. Lyalo uye kooko nkwaatoolupwita, sombi ateshibi kwaamba ayi mpooli kushikila amane kulya akunwa.

⁴ Ubike maano kwishiba mpweshi aone. Aona, uye unyamunune shakulifweka shakwe, unjile akoona kumyeendo yakwe. Lyalo utookulwiita cakucita.”

⁵ Lute wakakumbula ayi, “Ntoocita shoonse nshemwandwiita.”

⁶ Mpeeke Lute wakaya kumusena wakulupwitaawo akucita bweenka bwakamulwiita bapongoshi bakwe.

⁷ Bowasi ndyaakamana kulya akunwa, wakalinga kuboneka kukondwa abuumbi. Wakaya kucifufu ca bale ayi aye oone. Lute wakaya cakubendelela, wanyamuna shakulifweka akwinjila woona kumyeendo yakwe Bowasi.

⁸ Mashiku wakapapuka cakwaandamuka wapiluluka, wakakankamana kucana kuli mwanakashi kumyeendo yakwe.

⁹ Mpeeke wakeepusha ayi, “Anu ndiwe ni?” Alakwe wakakumbula ayi, “Ndime Lute nkambo. Ceebo cakwaamba ayi mwebo muli beshikamukowa beene beene, ndimwe mweelete kundama. Anu aboobo ndasengesha ayi mucite kweelana amulawo wesu.”

¹⁰ Mpeeke Bowasi wakaamba ayi, “Mwaami Lesa aakupe coolwe. Ubu buumi mbowatondesha bweendaawo kubota kwiinda mbowakatondesha bapongoshi bako, muceebo tookwe kuyanda kweebwa kubacikula bwangunyoko, bakandu nabi babile.

¹¹ Ono utaloondi Lute. Ntoocita shoonse nshewasenga, ceebo muntu woonse mundabala ino ulishi kwaamba ayi uli mwanakashi ucite mibo ibotu.

¹² Ndushinisho ndi shikamukowa mwiine mwiine alimwi ndyeelete kukulama, ono nkwaali wiindaawo pali ndime.

¹³ Koshiite kushikila buce. Macuunsacuunsa tutoomwiipusha na ulisuni kukulama. Na asumine ingayi cabota, sombi na akake, nebo ndalumbila muliina lya Mwaami Lesa muumi kwaamba ayi ndanookulama. Ono ona apa kushikila buce.”

¹⁴ Lyalo Lute wakoona palya kumyeendo yakwe. Sombi wakabuka kapatana kutuba bunene kwaamba ayi bantu batamuboni ceebo Bowasi taakalinga kusuni muntu uli woonse kwishiba ayi walinga kulete waawo.

¹⁵ Bowasi wakamwaambila ayi, “Leta cisani ncoofwete uciyaale apa.” Lute wakacita ubo, mpeeke Bowasi wakapuumwiitawo bale ukwanabo mpashi makilogilamu ali 20 akumucafwa kubika pacifushi. Mpomunyaawo Lute wakaboolela mundabala acifunta ico.

¹⁶ Ndyaakashika kuŋanda, bapongoshi bakwe bakamwiipusha ayi, “Weenda buyani mwanaangu?” Lute wakaamba shoonse shakamucitila Bowasi.

¹⁷ Wakeelikaawo akwaamba ayi, “Bandwiita ayi nsheelete kuboola maansabo kuno. Aboobo bampa bale woonse uyu.”

¹⁸ Naomi wakamulwiita ayi, “Ono omwanaangu, kalika moyo kushikila ubone ishi shoonse mbweshi shibe. Sunu Bowasi teshi ookeshe kushikila amanishe kubamba shintu ishi.”