Lute 1 - Baibo Busansulushi Bwa Libuku Ili

Elimeleki abamuŋanda yakwe mbobakalongela kuMoabu

^1-2 Kale kale, cishi ca Isilaeli kaciceendeleshekwa aboomboloshi, muIsilaeli mwakaba nsala. Mpeeke musankwa wakalinga kwiitwa ayi Elimeleki wamucipani cakwe Efulati alimwi uyo wakalinga kwikala muBetileemu mucishi ca Juda. Musankwa uyo wakalongela kuMoabu aNaomi mukaakwe, pantu pomwi abana bakwe basankwa bobilo, Maloni aKilyoni. Ndibakalinga kucili kooko,

³ Elimeleki wakafwa. Lyalo Naomi wakacaalabo eenka abana bakwe basankwa bobilo abo.

⁴ Bana bakwe bakeeba banakashi bene Moabu. Umwi liina wakalinga Opa alakwe umwi kaali Lute. Ndipakeenda myaaka mpashi likumi,

⁵ Maloni aKilyoni bakafwa abalo. Mpeeke Naomi wakacaala eenkabo cakubulaawo ibaye nabi baana basankwa.

Naomi aLute mbobakaboolela kuBetileemu

⁶ Kunembo liya Naomi wakanyumfwa ayi bantu bene mishaabo, Lesa wakabapa coolwe kwiinda mukubapa shakulya shiinji. Mpomunyaawo wakalibambila kuboolela pantu pomwi abamalokashi bakwe.

⁷ Lyalo wakanyamuka abamalokashi bakwe abo kuboolela kuJuda. Sombi munshila

⁸ Naomi wakabaambila ayi, “Amuboolele mukekaale abamanyinawanu. Mwaami Lesa aamucitile shintu shibotu bweenka mbomwakalinga kucitila baabo bakatushiya akuli ndime.

⁹ Lesa aakalengeshe ayi noonse mukeebwe alimwi akuba amaandaanu.” Aboobo Naomi wakabalasha kwiinda mukubafyonta. Sombi balo bakatalika kulila cakooloma

¹⁰ akwaambila Naomi ayi, “Sobwe! Tutooya soonse kubene mishaanu.”

¹¹ Naomi wakakumbula ayi, “Nobana bangu mulyeelete kuboolela. Ceebonshi mutooyanda kuya anebo? Sa mutooyeya ayi inga ndakonsha kushala baana basankwa abamwi beenga bamweeba?

¹² Sobwe, amuboolelebo. Nebo ndacembela cakuteebwa tubili. Ono nabi ndayeeya ayi inga ndakonsha kushala, lyalo ndeebwa sunu mashiku akuba abaana basankwa,

¹³ sa inga mwacikonsha kulindila kushikila bakula? Sa ici inga cakonsha kumukasha kweebwa kumbi? Sobwe, nobana bangu, mulishi kwaamba ayi ici nciyumu. Mwaami Lesa wamfutatila, ono ndanyumfwila nkumbu mwebo.”

¹⁴ Mpeeke bakatalika kulila cakooloma alimwi. Mpomunyaawo Opa wakalasha bapongoshi bakwe banakashi kwiinda mukubafyonta akuboolela kumishaabo. Sombi Lute wakakakatila.

¹⁵ Aboobo Naomi wakamwaambila ayi, “Lute, bona mukwatwanyoko waboolela kubene mishaabo akuli balesa bakwe. Boolela awebo.”

¹⁶ Sombi Lute wakakumbula ayi, “Mutankakatishi kumushiya. Amunsuminishebo njaanu. Mukwiinga kuli koonse nkweshi muye, anebo ntooya, uko nkweshi mukanookala, anebo nkweshi kanookala. Bene mishaanu, anebo balaakuba bene misheesu, alimwi Lesa wanu ulaakuba Lesa wangu.

¹⁷ Uko nkweshi mukafwite, anebo nkweshi nkafwite alimwi kweenka uko nkweshi nkabikwe. Lesa aakampe mulandu na cimwi, kuleka lufu, cikampansaanye amwebo!”

¹⁸ Naomi ndyaakabona ayi Lute ulishinishite kuyaakwe, wakabula maswi amwi akwaamba.

¹⁹ Bakeenda kushikila bashika kuBetileemu. Ndibakashika, ndabala yoonse yakasangalala abuumbi. Banakashi bakakankamana akwaamba ayi, “Sa ncakwiila nguNaomi uyu?”

²⁰ Lakwe wakakumbula ayi, “Mutanjiti ayi Naomi. Kamunjita ayi Mala ceebo Mwaami Lesa Shinkusu walengesha buumi bwangu kubica.

²¹ Ndindakalonga kuswa kokuno ndakalinga kucite shintu shiinji, sombi Mwaami Lesa wamboosha maansabo. Ino inga mwanjita buyani ayi Naomi kakuli Mwaami Lesa Shinkusu shoonse wamfutatila akuntumina mapensho?”

²² Ono mboboobo Naomi mbwaakaboola kuswa kuMoabu aLute mulokashi wakwe mwine Moabu. Bakashika kuBetileemu kumatalikilo aciindi cakutebula bale.