Luka 7 - Baibo Busansulushi Bwa Libuku Ili

Mbwaakashilika musebenshi wa munene wa bashilumamba mwaanda

¹ Jesu ndyaakamanisha kwaamba maswi aya kubantu, wakaya kuKapenaumu.

² Kwakalinga mutanjilili umwi wa bashilumamba mwaanda wakalinga kucite musebenshi ngwaakalinga kusuni abuumbi. Uyo musebenshi wakalinga kuciswa cakufwa.

³ Lyalo ndyaakanyumfwa mpuwo yakwe Jesu, wakatuma bamaloba ba baJuda bamwi kwaamba ayi bakasenge Jesu ayi ese ashilike musebenshi wakwe.

⁴ Bakatumwa abo ndibakashika kuli Jesu, bakamusenga camaansa obilo ayi, “Bona, muntu uyo ulyeelete kwaamba ayi umucaafwe,

⁵ mukwiinga ulisuni mushobo wesu alimwi wakatuyakila acoonde.”

⁶ Mpeeke Jesu wakayaabo. Ndyaakashika pafwaafwi aŋanda, munene wa bashilumamba wakatuma babye kuli Jesu mukumwaambila ayi, “Nkambo, mutalishupibo, mukwiinga nebo nsheelete kwaamba ayi mwinjile muŋanda yangu.

⁷ Nceceeco ncentakwe kushita nemwiine kuli ndimwe. Nakubi boobo mwaambebo liswi musebenshi wangu utooba kabotu.

⁸ Mukwiinga anebo ndimuntu ukonkela milasho ya banene ba pancito alimwi ndicite bashilumamba mboondwiita nsheensuni. Ndacita na ndaambila shilumamba ayi, ‘Koya,’ alakwe ulaya. Na ndaambila shilumamba umwi ayi, ‘Kosa,’ alakwe ulesa. Na ndaambila musebenshi wangu ayi, ‘Cita ici,’ alakwe ulacicita.”

⁹ Jesu ndyaakanyumfwa boobo, wakakankamana. Lyalo wakalanga kubantu baanji abo bakalinga kumukonkela akwaamba ayi, “Ntoomulwiita calushinisho ayi nshina kubonawo kale lushomo lunene bobulya nabi muIsilaeli!”

¹⁰ Mpeeke bantu bakatumwa ndibakaboola kuŋanda, bakacana musebenshi uyo waba kale kabotu.

Jesu mbwaakabusha mwaana musankwa wa mukalubinje mwanakashi

¹¹ Kuswawaawo Jesu wakaya kundabala iitwa ayi Naini. Bashikwiiya bakwe abantu bamwi baanji bakayaakwe.

¹² Jesu ndyaakashikabo kufwaafwi amwinjililo wa ndabala, wakakumanya beshicililo kabayumwite lufu. Uyo musankwa mufu wakalinga ngomwaana eenkabo kuli banyina bamukalubinje. Bantu baanji ba mundabala iyo bakalinga amukalubinje uyo.

¹³ Mpeeke Mwaami Jesu ndyaakabona mukalubinje uyo wakamunyumfwila nkumbu akumwaambila ayi, “Cileke kulila.”

¹⁴ Jesu wakaya kunembo akucata kumupeso, lyalo bakalinga kuyumwite lufu bakeemikana. Mpomunyaawo wakaamba ayi, “Webo ndaba, ntookwaambila ayi buka!”

¹⁵ Musankwa uyo wakalinga kufwite wakabuka wekala akutalika kwaamba. Lyalo Jesu wakamuboosha kuli banyina.

¹⁶ Boonse bantu bakaloonda abuumbi, mpeeke bakalumbaisha Lesa kabaamba ayi, “Ncakwiila mulaluki munene wesa mukwikala pakati kesu!” Bakaamba alimwi ayi, “Lesa wesa mukupulusha bantu bakwe!”

¹⁷ Kuswawaawo mpuwo yakwe Jesu yakamwaika mucishi coonse ca Judeya alimwi ashishi shoonse shakalinga kushingulukite.

Joni Mubombeki mbwaakatuma bashikwiiya bakwe kuli Jesu

¹⁸ Bashikwiiya bakwe Joni bakamulwiita shoonse ishi. Paceebo ceeco Joni wakeeta bobilo pabashikwiiya bakwe,

¹⁹ akubatuma kuMwaami Jesu mukwiipusha ayi, “Sa ndimwe baabo mbwaakaamba Joni ayi balaakwisa nabi tunoocilangila umwi?”

²⁰ Abo bakatumwa ndibakashika kuli Jesu, bakamwaambila ayi, “Joni Mubombeki watutuma kwaamba ayi twiipushe na ndimwe baabo beelete kwisa nabi tunoolangila umbi?”

²¹ Paciindi ceenka ico Jesu wakashilika bantu baanji kumalwashi apusenepusene, kumapensho, kukusha bashikaswa alimwi wakabonya boofu baanji.

²² Lyalo Jesu wakakumbula bashikwiiya bakwe Joni ayi, “Kamuya mukalwiite Joni shoonse nshimwabona akunyumfwa, boofu batoolasha, balema myeendo batokweenda, beshimanata batooba kabotu, bashinkite matwi batoonyumfwa, bafu batoobushikwa alimwi bakandu mumushimu batooshimikilwa Makani Abotu.

²³ Ulicite coolwe muntu uyo utatonshi muli ndime!”

²⁴ Ono bashikwiiya bakwe Joni ndibakaya, Jesu wakatalika kwaambila bantu baanji baanji bakalingaawo shakwe Joni Mubombeki ayi, “Ndimwakaya muluyanga mwakaya mukubonanshi? Sa mwakaya mukubona litete lyakalinga kutenkaana kumuuwo?

²⁵ Ino nciinshi ncemwakalinga mukubona? Sa ngumuntu wakalinga kufwete shakufwala shibotu? Tau, abo bafwala shakufwala shibotu, akwikala kabacite shintu shibotu shoonse shimwi, balekala mumaanda a bamaami.

²⁶ Amundwiite, nciinshi ncemwakaya mukubona? Sa ngumulaluki? Ee, ntoomulwiita calushinisho ayi ngumunene kwiinda pamulaluki.

²⁷ Mukwiinga Joni ngowooyo wakaambwa muMalembo akwe Lesa ayi, ‘Ndaakutuma muntu wangu kunembo lyako eshi akakubambile nshila.’

²⁸ Ntoomwaambila ayi kuswa kale kale takuna kubawo muntu wiinda Joni, sombi uyo muniini muBweene bwakwe Lesa ngumunene kwiinda nguwe.”

²⁹ Bantu boonse abeshikusonkesha bakanyumfwa kushimikila kwakwe Joni. Ndibakabombekwa anguwe, bakasumina kwaamba ayi Lesa uliluleme.

³⁰ Sombi baFalisi abafundishi ba Milawo mukukaka kubombekwa aJoni, bakakaka muyeeyo wakwe Lesa ngwaakabamba.

³¹ Jesu wakatolelela kwaamba ayi, “Anu bantu ba cecino ciindi inga ndabakoshanisha anshi? Anu bali anga ninshi?

³² Bali anga mbanike bashiite pamusena wakuulishisha kaboolobeshanya ayi, ‘Twakamulishisha ngoma, sombi mwebo tamukwe kushana. Twakamwiimbila nyimbo sha buumba, sombi mwebo tamukwe kulila!’

³³ Mukwiinga Joni Mubombeki wakesa kaalikasha kulya alimwi kaatanwi waini, sombi mwebo mwakaamba ayi, ‘Ulicite shikaswa.’

³⁴ Ono MwanaaMuntu ndyaakesa kaalya akunwa, mwebo mwakaamba ayi, ‘Amubone, ngumulyabi, ngucakolwa, ngushicibusa abeshikusonkesha alimwi abamucita shibi!’

³⁵ Sombi busongo bwakwe Lesa bulaboneka kwaamba ayi mbwancinencine kwiinda mubantu boonse babutambula.”

Jesu muŋanda yakwe Simoni muFalisi

³⁶ Umwi muFalisi wakeeta Jesu ayi akalye anguwe. Mpeeke Jesu wakaya kuŋanda mukulya.

³⁷ Ono mundabala yeenka iyo mwakalinga mwanakashi mufuule. Ndyaakanyumfwa ayi Jesu utoolya muŋanda ya muFalisi uyo, wakatola musaashi wakapangwa kulibwe lya alabasita kauswite mafuta anunkila kabotu amakwebo.

³⁸ Wakashika weemikana kwisule lyakwe Jesu pafwaafwi ashimpanta kaalilabo buumpute. Wakatontosha shimpanta shakwe Jesu aminsonshi yakwe akutalika kwiipukuta amisusu yakwe. Mpeeke wakafyonta shimpanta akushitila mafuta ayo.

³⁹ Lyalo muFalisi ulya wakeeta Jesu ndyaakabona bobulya, wakalyaamboosha ayi, “Muntu uyu naalinga mulaluki wancinencine naashiba mbwaabete mwanakashi uyu utoomucata mukwiinga ngumucita shibi.”

⁴⁰ Sombi Jesu wakamwaambila ayi, “Simoni ndicite cakukulwiita.” Simoni wakakumbula ayi, “Nciinshi noBafundishi?”

⁴¹ Mpeeke Jesu wakaamba ayi, “Shikukweletesha maali umwi wakalinga kucite beshinkongole bobilo. Umwi wakakongola myaanda yosanwe aumwi makumi osanwe amaali.

⁴² Ndibakaalilwa kuboosha, boonse wakabalekelela. Ono pabantu bobilo balya, nguli eshi akasune bunene shikukweletesha?”

⁴³ Simoni wakakumbula ayi, “Nebo ntooyeeya ayi ngooyo wakakongola maali aanji.” Jesu wakamwaambila ayi, “Wakumbula kabotu.”

⁴⁴ Mpeeke wakalanga kumwanakashi uyo akwaambila Simoni ayi, “Sa wamubona mwanakashi uyu? Mbondashikila muŋanda yako tookwe kumpaawo maanshi akusamba kushimpanta. Sombi lakwe wasansha shimpanta shangu aminsonshi yakwe akushipukuta amisusu yakwe.

⁴⁵ Webo tookwe kufyontaawo pakuŋansha, sombi lakwe kuswabo mbondeshita muŋanda taana kucilekaawo kufyonta shimpanta shangu.

⁴⁶ Bona mbondeshita tookwe kunanikawo mafuta mumutwi, sombi lakwe wananika mafuta anunkila kabotu kushimpanta.

⁴⁷ Aboobo ntookulwiita ayi shibiibi shakwe nashifuuli shalekelelwa mukwiinga watondesha lusuno lunene. Nkokwaamba ayi uyo woonse walekelelwa paniini ulatondesha lusuno luniini.”

⁴⁸ Mpomunyaawo Jesu wakaambila mwanakashi uyo ayi, “Shibiibi shako shalekelelwa.”

⁴⁹ Mpeeke abo mbaakalinga kulyaabo bakatalika kuliipusha ayi, “Anu ngani muntu uyu ulekelela shibiibi?”

⁵⁰ Ono Jesu wakaambila mwanakashi uyo ayi, “Lushomo lwako lwakupulusha, koya muluumuno.”