Luka 5 - Baibo Busansulushi Bwa Libuku Ili

Jesu mbwaakeeta bashikwiiya bakwe bataanshi

¹ Bushiku bumwi Jesu wakalinga kwiimfwi muloombe lwa Lweenge lwa Genesaleti. Bantu baanji bakalinga kushindikana kwaamba ayi banyumfwe maswi akwe Lesa.

² Lyalo Jesu wakabona maato obilo kaangitwe muloombe, beshikucaya nswi kabali baswaamo kabasansha toombe twabo.

³ Jesu wakenjila mubwaato bomwi ubo bwakalinga bwakwe Simoni, mpeeke wakamusenga ayi abushindike kwaamba ayi butalamukeeko kuswa muloombe. Mpomunyaawo wakekala mubwaato watalika kwiisha bantu abo.

⁴ Ndyaakamanisha kwiisha, wakaambila Simoni ayi, “Katiya pakatikati kwaamba ayi muwaale toombe twanu mumaanshi mucate nswi.”

⁵ Simoni wakakumbula ayi, “NoBafundishi, swebo bwatuceta pamaanshi katusuni kucata nswi, sombi maawe akomuubo. Nakubi boobo toombe ntootuwaalaawo mukwiinga ndimwe mwaamba.”

⁶ Ono ingayi bacite kweelana ambobakaambilwa, bakacata nswi shiinji cakwaamba ayi toombe katuyanda kupasuka.

⁷ Lyalo bakeetabo babyaabo bakalinga mubwaato bumwi ayi bese babacafweeko kusubula. Abalo bakesa mpeeke basubula nswi shilya akususha maato obilo ayo cakuyanda kupila.

⁸ Ndyaakabona boobo, Simoni Pita wakafukama kunembo lyakwe Jesu akwaamba ayi, “Amunshiiye Nkambo, mukwiinga ndimucita shibi!”

⁹ Simoni ababye bakakankamana abuumbi pakufula kwa nswi shilya nshibakacata.

¹⁰ Jemusi aJoni bana bakwe Sebedi babye Simoni abalo bakakankamana abuumbi. Lyalo Jesu wakaambila Simoni ayi, “Utaloondi mukwiinga bulya kuswa sunu, unanooli shikuleta bantu kuli ndime, bweenka mbowalinga kucata nswi.”

¹¹ Mpomunyaawo maato abo bakaakwelela kuloombe lwa lweenge. Kuswawaawo bakashiya shoonse akukonkela Jesu.

Jesu mbwaakashilika musankwa wakalinga kuciswa manata

¹² Jesu ndyaakalinga kucili mundabala imwi wakakumana amuntu wakalinga kuciswa manata mubili woonse. Ingayi abone Jesu, wakafukama kunembo lyakwe akumusenga ayi, “Nkambo, na kamusuni inga mwanshilika.”

¹³ Jesu wakafungulula lyaansa lyakwe wakamucata akwaamba ayi, “Ee ndisuni, ba kabotu!” Lyalo manata akamana.

¹⁴ Kuswawaawo Jesu wakamwaambila ayi, “Nyumfwa, utalwiiti muntu nabi womwi pacikani ici. Sombi ululamebo kuya kumupailishi, ukalitondeshe kuli nguwe ayi waba kabotu. Koya upe cipo kweelana abwakaamba Mose kwaamba ayi bantu bashome ayi waba kabotu.”

¹⁵ Nakubi boobo impuwo yakwe Jesu yakanyumfwika kubantu baanji. Aboobo bantu baanji bakesa kuli nguwe kwaamba ayi banyumfwe maswi akwe alimwi ayi malwashi abo amane.

¹⁶ Sombi lakwe wakabashiya akuya kumusena kwatakalinga kwikala bantu mukupaila.

Jesu mbwaakashilika musankwa wakalinga kuyuminite mubili

¹⁷ Bushiku bumwi Jesu ndyaakalinga kwiisha, baFalisi abafundishi ba Milawo bamwi bakalingaawo abalo apo. Bantu abo bakaswa mumishi yoonse ya kuGalili, kuJudeya alimwi akuJelusalemu. Nkusu shakwe Lesa shakushilika shakalinga muli Jesu.

¹⁸ Mpomunyaawo bantu bamwi bakaleta musankwa wakalinga kuyuminite mubili pamacila. Bakeelesha kumwinjisha muŋanda ayi bamooneke muliimfwa lyakwe Jesu.

¹⁹ Sombi pakumwiinshila kumutola mukati pakabula mukwiinga wa bantu kufula. Lyalo bakatantaakwe peculu lya ciluli ca ŋanda akupanga bulyango. Bakamwiinsha akumuleelesha pamacila pakati ka bantu kushikila muliimfwa lyakwe Jesu.

²⁰ Jesu ndyaakabona lushomo lwabo, wakaamba ayi, “Ndaba, shibiibi shako shalekelelwa.”

²¹ Ingayi bafundishi ba Milawo alimwi abaFalisi bakatalika kwiipushanya ayi, “Ino ngani uyu utoocobola Lesa? Ngani weenga walekelela shibiibi? sa te nguLesa eenkabo?”

²² Lyalo Jesu wakeshiba ncibakalinga kuyeeya mumyoyo yabo wakabeepusha ayi, “Ino mutooyeeyelanshi shintu sha mushobo uyu mumyoyo yanu?

²³ Ncili cuubu kwaambila muntu ayi, ‘Shibiibi shako shalekelelwa,’ nabi kwaamba ayi, ‘Nyamuka, weende’?

²⁴ Sombi ntooyanda kwaamba ayi mwishibe ayi MwanaaMuntu ulicite bulemu ankusu shakulekelela shibiibi pacishi ca panshi.” Mpomunyaawo wakaambila uyuminite mubili ayi, “Ntookwaambila, nyamuka, bwesa macila ako uye kumishaanu.”

²⁵ Mpomunyaawo wakabuka mumeenso abo, wabwesa macila mpaakalinga kulete akutalika kunooya, kaaya cilumbaisha Lesa.

²⁶ Bantu boonse bakakankamana abuumbi alimwi bakaloonda. Lyalo bakatalika kulumbaisha Lesa akwaamba ayi, “Ici ncetwabona sunu, tatuna kucibonaawo.”

Jesu mbwaakeeta Lefi

²⁷ Kuswawaawo Jesu wakaswita pansengwe akubona shikusonkesha wakalinga kwiitwa ayi Lefi, kaashite mukaanda kamusonko. Mpeeke Jesu wakamwaambila ayi, “Nkonkele.”

²⁸ Mpomunyaawo alakwe wakasulukoobo pasheesho shoonse shakalinga mukaanda akumukonkela.

²⁹ Lefi wakabamba shakulya shiinji kwaamba ayi basekelele aJesu muŋanda yakwe. Kwakalinga beshikusonkesha abantu bamwibo bakacanikaawo akulya pantu pomwi ambabo.

³⁰ BaFalisi bamwi abafundishi ba Milawo ba mulikoto lyabo, bakatalika kutongookila bashikwiiya bakwe Jesu ayi, “Ino mutoolitanshi akunwa pantu pomwi abeshikusonkesha alimwi abantu batakonkeli Milawo yakwe Mose?”

³¹ Lyalo Jesu wakabakumbula ayi, “Teshi bantu bayumu balangoola mushiliki, sombi balwashi beenka.

³² Nshikwe kwisa mukwiita baluleme, sombi bamucita shibi kwaamba ayi basanduke kuswa kushibiibi shabo.”

Mwiipusho wa pakulikasha kulya

³³ Bamwi bantu bakeepusha Jesu ayi, “Bashikwiiya bakwe Joni Mubombeki liinji balaba aciindi cakulikasha kulya akupaila, abalo bashikwiiya ba baFalisi balacita bweenka ubo, sombi baako tababiiwo aciindi ici, balalya akunwa.”

³⁴ Lyalo Jesu wakabaambila ayi, “Sa inga babye shibwiinga mwabakakatisha kutalya shibwiinga kaacili abo? Sobwe!

³⁵ Sombi ciindi cilaakushika shibwiinga ndyeshi akakushikweewo pali mbabo, lyalo paciindi ico ndyeshi bakalikashe kulya.”

³⁶ Kuswawaawo Jesu wakabalwiitaawo cikoshanyo ayi, “Taaku muntu weenga wakwamuna cimami kunsalu ipya akutunga pacakufwala cikulukulu. Taakoonshi kucita boobo mukwiinga ubo inga wanyonyoola nsalu iyo alimwi cimami ico inga taceendelani acakufwala ico.

³⁷ Taaku muntu weenga wabika waini upya munkomwe sha shipaya shikulukulu. Na wabikamo waini upya ulapasula nkomwe alimwi waini woonse ulatika ashalo nkomwe shilanyonyooka.

³⁸ Nkokwaamba ayi waini upya ulyeelete kubikwa munkomwe sha shipaya shipya.

³⁹ Taaku muntu weenga wasuna kunwa waini upya na wamana kunwa waini ukulukulu mukwiinga ulaamba ayi, ‘Ulya ukulukulu ngubotu.’ ”