Luka 3 - Baibo Busansulushi Bwa Libuku Ili

Kushimikila kwakwe Joni Mubombeki

¹ Wakalinga mwaaka wa likumi ayosanwe Tibelyasi kaali Sisa, muleli munene wa kuLoma, Pontyasi Pilato paciindi ici wakalinga ngomuleli wa cishi ca Judeya. Elodi wakalinga ngomuleli wa cishi ca Galili alakwe Filipo, mukwabo Elodi, wakalinga kweendelesha cishi ca Ituliya aTilakonitisi. Lisaniya wakalinga ngomuleli wa cishi ca Abilini.

² Ciindi ici ceenka Anasi aKayafasi bakalinga mbobapailishi banene. Nceciindi liswi lyakwe Lesa ndilyakashika kuli Joni mwanaakwe Sekaliya muluyanga.

³ Mpeeke wakaya cishimikila mumishi yoonse yakalinga kushingulukite Mulonga wa Joodani, kaabaambila ayi, “Amusanduke kuswa kushibiibi shanu mubombekwe ayi Lesa amulekelele shibiibi shanu.”

⁴ Cakacitika bweenka mbuli bwakalemba Isaya mulaluki mukulukulu ayi, “Muntu umwi utokoolobesha muluyanga ayi, ‘Amubambe nshila ya Mwaami. Amumululikile nshila.

⁵ Misena yoonse ikuneme ilaakufukilwa alimwi tulundu ashuulu shoonse shilaakweelanishikwa. Nshila shipetookitepetookite shilaakululamikwa. Asheesho shoonse shicite mankununkunu shilaakweelanishikwa.

⁶ Lyalo mishobo yoonse ya bantu ilaakubona lupulusho lwakwe Lesa!’ ”

⁷ Bantu baanji bakaya kuli Joni mukubombekwa. Sombi lakwe wakabaambila ayi, “Nobana bansoka mwebo! Ngani wamucenjesha kuloonda bukali bwakwe Lesa butoosa?

⁸ Amucite ncito shibotu shitondesha ayi mwasanduka kuswa kushibiibi shanu. Mutanoolibeca mumyoyo yanu ayi, ‘Swebo tulicite Abulaamu ishiwesu.’ Ntoomulwiita calushinisho ayi Lesa ulakonsha kusandula mabwe kuba baana ba mulunyungu lwakwe Abulaamu.

⁹ Bulya keembe kakutimbwishako shisamu kumiyanda kalibambitwe kale. Aboobo cisamu coonse citacati shisepo shibotu, cilaakutemwa akuwaalwa mumulilo.”

¹⁰ Bantu balya bakamwiipusha ayi, “Ino ono tucite buyani?”

¹¹ Lakwe wakabakumbula ayi, “Uyo ucite shakufwala shobilo apeewo comwi mubye utacite. Alakwe ucite shakulya acite bweenka ubo.”

¹² Beshikusonkesha bamwi bakaya mukubombekwa. Mpeeke bakeepusha Joni ayi, “Nkambo, ino tucite buyani?”

¹³ Wakabaambila ayi, “Mutanosonkesha kwiinda pamweelo ngobamupingwita.”

¹⁴ Abamwi bashilumamba bakamwiipusha ayi, “Ino swebo tucite buyani?” Wakabaambila ayi, “Mutapambi cintu ca muntu akubekesha milandu alimwi mulyeelete kusumina ayi ayo maali ngomutoofola ngaanji.”

¹⁵ Kulangila kwa bantu kwakatalika kuya cikomena, aboobo bantu baanji bakatalika kuyeeya ayi mpashi Joni ngoUsalitwe wakwe Lesa.

¹⁶ Lyalo Joni wakabaambila boonse ayi, “Nebo ntoomubombeka amaanshi, sombi uyo utoosa uleendaawo nkusu pali ndime cakwaamba ayi nsheelete akwaangulula nsapato shakwe. Uyo lakwe ulaakumubombeka aMushimu Usalashi alimwi amulilo.

¹⁷ Lakwe ulicite kale acakuululushishako maila kwaamba ayi akaaululushe akwaalongela mubutala. Lyalo ulaakutenta buungu boonse mumulilo utashimiki.”

¹⁸ Joni wakashimikila bantu Makani Abotu munshila shiinji shiinji shimwi.

¹⁹ Wakalinga kubaambila ayi baswe kushibiibi shabo. Munshiku isho sheenka, Joni wakakalalila Elodi pacilubo cakweeba Elodyasi muka mukwabo alimwi ashimwibo shilubo nshaakalinga kucita.

²⁰ Sombi Elodi lakwe wakeendilishaawo pabubi boonse pakwaanga Joni.

Jesu mbwaakabombekwa

²¹ Bantu boonse ndibakamana kubombekwa alakwe Jesu wakabombekwa. Ono ndyaakalinga kupaila liculu lyakacaluka.

²² Lyalo Mushimu Usalashi wakaseluka pali nguwe mbuli mpolobe aliswi lyakanyumfwika kuswa kwiculu ayi, “Ndiwe Mwanaangu ngoonsuni abuumbi. Pali ndiwe ndikondetwe abuumbi.”

Bashali bakulukulu bakwe Jesu

²³ Jesu wakatalika ncito yakwe kaayanda kukwanisha myaaka ili makumi otatwe. Wakalinga ngumwanaakwe Josefu mbuli mbobakalinga kuyeeya bantu. Josefu wakalinga mwanaakwe Eli,

²⁴ Eli mwanaakwe Matati, Matati mwanaakwe Lefi, Lefi mwanaakwe Meluki, Meluki mwanaakwe Janayi, Janayi mwanaakwe Josefu.

²⁵ Josefu mwanaakwe Matatiyasi, Matatiyasi mwanaakwe Amosi, Amosi mwanaakwe Naamu, Naamu mwanaakwe Esili, Esili mwanaakwe Nagai.

²⁶ Nagai mwanaakwe Maati, Maati mwanaakwe Matatiyasi, Matatiyasi mwanaakwe Semeini, Semeini mwanaakwe Joseki, Joseki mwanaakwe Joda,

²⁷ Joda mwanaakwe Jowanani, Jowanani mwanaakwe Leesa, Leesa mwanaakwe Selubabelo, Selubabelo mwanaakwe Shiyalutyelo, Shiyalutyelo mwanaakwe Neli,

²⁸ Neli mwanaakwe Meluki, Meluki mwanaakwe Adi, Adi mwanaakwe Kosamu, Kosamu mwanaakwe Elimadamu, Elimadamu mwanaakwe Ee.

²⁹ Ee mwanaakwe Joshiwa, Joshiwa mwanaakwe Elyasa, Elyasa mwanaakwe Jolimu, Jolimu mwanaakwe Matati, Matati mwanaakwe Lefi,

³⁰ Lefi mwanaakwe Simyoni, Simyoni mwanaakwe Juda, Juda mwanaakwe Josefu, Josefu mwanaakwe Jonamu, Jonamu mwanaakwe Eliyakimu,

³¹ Eliyakimu mwanaakwe Meleya, Meleya mwanaakwe Mena, Mena mwanaakwe Matata, Matata mwanaakwe Natani, Natani mwanaakwe Defedi,

³² Defedi mwanaakwe Jese, Jese mwanaakwe Obedi, Obedi mwanaakwe Bowasi, Bowasi mwanaakwe Salumoni, Salumoni mwanaakwe Nashoni,

³³ Nashoni mwanaakwe Aminadabu, Aminadabu mwanaakwe Adimini, Adimini mwanaakwe Ani, Ani mwanaakwe Esiloni, Esiloni mwanaakwe Pelesi, Pelesi mwanaakwe Juda,

³⁴ Juda mwanaakwe Jakobo, Jakobo mwanaakwe Isaki, Isaki mwanaakwe Abulaamu, Abulaamu mwanaakwe Tela, Tela mwanaakwe Nawo,

³⁵ Nawo mwanaakwe Selaki, Selaki mwanaakwe Leu, Leu mwanaakwe Pelegi, Pelegi mwanaakwe Eba, Eba mwanaakwe Shela,

³⁶ Shela mwanaakwe Kainani, Kainani mwanaakwe Afakisadi, Afakisadi mwanaakwe Shemu, Shemu mwanaakwe Nowa, Nowa mwanaakwe Lameki,

³⁷ Lameki mwanaakwe Metusela, Metusela mwanaakwe Enoki, Enoki mwanaakwe Jaledi, Jaledi mwanaakwe Maalalilu, Maalalilu mwanaakwe Kenani,

³⁸ Kenani mwanaakwe Enoshi, Enoshi mwanaakwe Seti, Seti ngomwanaakwe Adamu, Adamu mwanaakwe Lesa.