Luka 23 - Baibo Busansulushi Bwa Libuku Ili

Jesu mbwaakoomboloshekwa kuli Pilato

¹ Bantu boonse abo bakanyamuka, akutola Jesu kuli Pilato.

² Lyalo bakatalika kumubekesha shikani ayi, “Twakacana muntu uyu kayungoola bantu ba mucishi cesu ayi babukile cishi cino. Wakalinga kubaambila ayi bacileeke kupeleka musonko kuli Sisa, muleli munene wa kuLoma. Peculu lya waawo wakalinga kwaamba ayi uyu mwiine ngoUsalitwe wakwe Lesa alimwi ayi ngumwaami.”

³ Mpomunyaawo Pilato wakeepusha ayi, “Sa ndiwe Mwaami wa baJuda?” Jesu wakakumbula ayi, “Mwacaamba nobeene.”

⁴ Mpeeke Pilato wakaambila bamatanjilili ba bapailishi abantu baanji abo ayi, “Nebo taaku mulandu ngondacana mumuntu uyu.”

⁵ Sombi balo bakayuminina kumubekesha kabaamba ayi, “Ulayungoola akufulunganya bantu mukwiisha kwakwe mucishi coonse ca Judeya. Wakatalikila kuGalili ono ngooyu washika akokuno.”

Jesu mbobakamutola kuli Elodi

⁶ Pilato ndyaakanyumfwa boobo wakeepusha ayi, “Sa uyu muntu ngumwine Galili?”

⁷ Ono ndyaakeshiba kwaamba ayi Jesu ulaswa mucishi ceendeleshekwa aElodi, wakamutuma kuli Elodi uyo wakalinga muJelusalemu ciindi ico.

⁸ Elodi ndyaakabona Jesu wakakondwa abuumbi mukwiinga lyoonse wakalinga kunoonyumfwabo. Aboobo wakalinga kuyanda kumubona. Wakalinga kulangila amoyo woonse kwaamba ayi akamuboneewo kaacita caankamiko.

⁹ Aboobo Elodi wakamwiipusha miipusho iinji, sombi Jesu taakwe kukumbulaawo.

¹⁰ Bamatanjilili ba bapailishi abafundishi ba Milawo bakasena pafwaafwi akutalika kubekesha Jesu shikani shiinji cankusu.

¹¹ Elodi abashilumamba bakwe bakaweluluka Jesu akumunyansha. Lyalo bakamufwalika cisani cibotu akumuboosha kuli Pilato.

¹² Kuswa bushiku ubo Elodi aPilato bakatalika kunyumfwana ceebo bakalinga kupatene.

Jesu mbwaakapingulwa kucaikwa

¹³ Mpeeke Pilato wakabunganya bamatanjilili ba bapailishi, beendeleshi abantubo bamwi boonse.

¹⁴ Lyalo wakabaambila ayi, “Uyu muntu mwakamuleta kuli ndime ayi ulayungoola bantu ayi babukile cishi cino. Ono nebo ndindamwiipushisha noonse kamuliiwo, ndacana kwaamba ayi taaciteewo mulandu pashikani shoonse nshemwalinga kwaamba pali nguwe.

¹⁵ Elodi alakwe taakuuwo mulandu ngwaakamucanina muntu uyu mukwiinga alakwe ncamubooshesha kuli ndiswe. Amubone, uyu muntu taaku ncaakacita nceenga wafwitaawo.

¹⁶ Paceebo ceeco ntoomukwipabo akumwaangulula.” [

¹⁷ Ono Pilato lyoonse wakalinga kubaangulwita kaili womwi pabushiku bwa Pasika bwakwiibaluka kusotokela.]

¹⁸ Sombi boonse bakoolobesha pantu pomwi ayi, “Acaikwe muntu uyu! Amutwaangulwite Balabasi!”

¹⁹ (Balabasi uyu wakaangwa ceebo wakatalika shimfulunganya mundabala inene alimwi abucayi.)

²⁰ Sombi Pilato wakalinga kusuni ayi Jesu aangululwe, aboobo wakaambaabo bantu pamakani ngomunya aya.

²¹ Sombi balo bakoolobesha ayi, “Aapopwe pamucilingano! Aapopwe pamucilingano!”

²² Pilato wakabaambila lyatatu ayi, “Ono amundwiite, ncibiibinshi ncaacita? Nebo ndacana kwaamba ayi taaku cibiibi ncaakacita nceenga wafwitaawo. Paceebo ceeco ntoomukwipabo mwaangulule.”

²³ Sombi boonse bakayuminina koolobesha ayi, “Ulyeelete kupopwa pamucilingano.” Mpeeke Pilato wakakomwa kumaswi abo.

²⁴ Aboobo Pilato wakapingula ayi acibe bweenka mbobasuni bantu.

²⁵ Pilato wakaangulula Balabasi uyo ngobakasenga akwaaba Jesu kuli mbabo ayi bamucite kweelana ambuli mbobakalinga kusuni. Balabasi uyo wakaangwa ceebo cakutalika shimfulunganya abucayi.

Jesu mbwaakapopwa pamucilingano

²⁶ Ndibakalinga kutola Jesu mukumupopa, bakakumanya Simoni wa kuSailini kaaswa mumishi. Bakamucata akumunyamwisha mucilingano ayi anooyawo mwisule lyakwe Jesu.

²⁷ Pabantu baanji baanji bakalinga kuya cimukonkela, pakalinga abalutundu abo bakalinga kuya cilila abuumba bunene ceebo cakwe Jesu.

²⁸ Ono Jesu wakapiluluka akubaambila ayi, “Nobalutundu ba muJelusalemu mutalilili ndime, sombi mulililile nobeene alimwi abana banu.

²⁹ Mukwiinga nshiku shilaakushika bantu ndyeshi bakanokwaamba ayi, ‘Balicite coolwe banakashi batana kushalaawo akuyamwisha!’

³⁰ Lyalo balaakutalika kwaambila tulundu tunene ayi, ‘Amutuwiite’ alimwi atulundu tuniini ayi, ‘Amutufwekelele.’

³¹ Ino ono na bantu kabacita boobo kucisamu cicili citontola, ino kulaakuba buyani caakuyuma?”

³² Bakatola abamwi bobilo abo bakalinga beepi ayi abalo bakapopwe pamicilingano pantu pomwi aJesu.

³³ Lyalo ndibakashika kumusena wiitwa ayi Cifuwa ca mutwi, bakapopa Jesu pamucilingano. Abalo beepi abo bakabapopa pamicilingano, umwi kululyo alakwe umwi kucipiko.

³⁴ Mpeeke Jesu wakaamba ayi, “Ta, amubalekelele mukwiinga tabeshi ncebatoocita.” Kuswawaawo bakooma cisolo kwaamba ayi baabane shakufwala shakwe.

³⁵ Bantu bakalinga kwiimfwi mweela kabeebela, beendeleshi babo ndibakalinga kuweluluka Jesu kabaamba ayi, “Wakapulusha bamwi ono aalipulushe mwiine, na ngoUsalitwe uyo Lesa ngwaakasala!”

³⁶ Bashilumamba abalo bakamuweluluka, bakesa akumupa waini ulula usashite,

³⁷ akumwaambila ayi, “Na uli mwaami wa baJuda, lipulushe omwiine!”

³⁸ Peculu lyakwe pakalinga kulembetwe ayi, “Uyu ngoMwaami wa baJuda.”

³⁹ Mwiipi umwi wakalinga kupopetwe kulubasu lumwi lwakwe Jesu wakacobola Jesu ayi, “Sa teshi ndiwe Usalitwe wakwe Lesa? Lipulushe, aswebo utupulushe!”

⁴⁰ Sombi umwi wakakalalila mubye akumwaambila ayi, “Sa webo tooloondi Lesa? Twapopwa pamicilingano soonse,

⁴¹ sombi swebo tulyeelete kupopwa mukwiinga tutootambula cilambu ceelete pashintu nshetwalinga kucita. Ono lakwe uyu taaku cibiibi ncaakacita.”

⁴² Mpeeke wakaamba ayi, “BaJesu, mukanjibaluke mwaakwisa muBweene bwanu.”

⁴³ Lyalo Jesu wakamwaambila ayi, “Ncakwiila ntookulwiita ayi sunu lyeenka utooba anebo muMusena ukondelesha.”

Lufu lwakwe Jesu

⁴⁴ Ono lisuba ndilyakashika pakati kamutwi, kwakaba munshinshe koonse kushikila 3 koloko, malumwi.

⁴⁵ Lyalo cisani cakalinga kushitilisha muŊanda yakwe Lesa cakakwamuka pakati.

⁴⁶ Lyalo Jesu wakoolobesha aliswi lya peculu ayi, “Ta, muuya wangu ndaubika mumaansaanu!” Ingayi amanebo kwaamba boobo, wakatula moyo, wafwa.

⁴⁷ Mpomunyaawo munene wa bashilumamba mwaanda ndyaakabona boobo, wakalumbaisha Lesa akwaamba ayi, “Ncakwiila uyu muntu wakalinga kululeme!”

⁴⁸ Abalo bantu boonse baanji abo bakalinga kubungene kabeebela, ndibakabona cakacitika, bakaboolela kumaandaabo mubuumba.

⁴⁹ Bantu boonse bakalinga kushibene aJesu alimwi abanakashi bakamukonkela kuswa kuGalili, bakeemikana palaale akubona isho shoonse shakacitika.

Jesu mbwaakabikwa

⁵⁰ Kwakalinga muntu wiitwa ayi Josefu wakalinga kwikala mundabala ya Alimateya mucishi ca Judeya. Wakalinga muntu uli kabotu ulemekwa,

⁵¹ alimwi wakalinga kulangilabo Bweene bwakwe Lesa. Nakubi kwaamba ayi alakwe wakalinga mweendeleshi wa munkuta ya baJuda, taakalinga kusumina miyeeyo amicito imwi ya beendeleshinyina.

⁵² Uyu muntu wakaya kuli Pilato mukusenga mutuntu wakwe Jesu.

⁵³ Lyalo wakaselusha mutuntu pamucilingano akuupombela acisani. Mpeeke wakaubika mucuumbwe cakakabwa mulibwe umo mutana kubikwaawo kale muntu.

⁵⁴ Bwakalinga bushiku bwakulibambila bwa Cisanu. Ceebo bushiku bwakookesha bwa Cibelu bwaalinga pafwaafwi kutalika.

⁵⁵ Banakashi abo bakakonkela Jesu kuswa kuGalili bakaya aJosefu akubona cuumbwe alimwi amutuntu wakwe Jesu mbowakabikwa.

⁵⁶ Kuswawaawo bakaboolela kuŋanda akuya mukubamba mafuta atununkila kabotu tumwi twakunanika mutuntu wakwe Jesu. Pabushiku bwakookesha bwa Cibelu, bakookesha kweelana aMilawo.