Luka 22 - Baibo Busansulushi Bwa Libuku Ili

Mbobakapangana shakucaya Jesu

¹ Ono bushiku bwakusekelela kulya Cimaande, ubo bwalinga kwiitwa ayi bushiku bwa Pasika bwakwiibaluka kusotokela, bwakalinga kuya cishikila.

² Bamatanjilili ba bapailishi abafundishi ba Milawo bakalinga kuyandoola nshila yakucailaamo Jesu cabushishi ceebo bakalinga kuloonda bantu.

Judasi mbwaakasumina kwaaba Jesu

³ Lyalo Satana wakenjila muli Judasi, wiitwa ayi Isikalyoti, uyo wakalinga womwi wa bashikwiiya bali likumi abobilo.

⁴ Aboobo Judasi wakaya mukulwiita bamatanjilili ba bapailishi abeshikulindilila Ŋanda yakwe Lesa mbuli mbweenga waaba Jesu kuli mbabo.

⁵ Mpomunyaawo bakakondwa abuumbi, lyalo bakasuminishanya kwaamba ayi inga bamulipila maali.

⁶ Mpeeke wakasumina, akulangoola ciindi ceelete kumwaabilaawo bantu kabateshi.

Jesu mbwaakalibambila kulya Pasika

⁷ Bwakashika bushiku bwakusekelela kwakulya Cimaande pakalinga kucailwa twana twa mbelele twakwiibaluka bushiku bwakusotokela.

⁸ Lyalo Jesu wakatuma Pita aJoni, wabaambila ayi, “Kamuya mubambe cakulya ca bushiku bwa Pasika kwaamba ayi tulye.”

⁹ Balo bakamwiipusha ayi, “Nkuli nkomusuni kwaamba ayi tubambile?”

¹⁰ Wakabaambila ayi, “Amunyumfwe, mwenjilabo mundabala inene mutookumanya musankwa uyumwite nongo ya maanshi, mumukonkele kushikila muŋanda mweshi aye enjile.

¹¹ Lyalo mukaambile mwine ŋanda ayi, ‘Bafundishi besu batokwiipusha ayi ino cili kuli cipinda mweshi ndite cakulya ca bushiku bwa Pasika abashikwiiya bangu?’

¹² Lyalo utoomutondesha cipinda cinene ca peculu cibambitwe kale. Umo mweenka mweshi muye mubambile cakulya.”

¹³ Mpeeke bakaya akucana shintu shoonse bweenka mbuli mbwaakabaambila Jesu. Lyalo bakabamba cakulya ca bushiku bwa Pasika bwakwiibaluka kusotokela.

Mulalilo wa Mwaami

¹⁴ Mpeeke ndicakashika ciindi, Jesu wakekala abatumwi bakwe kwaamba ayi balye.

¹⁵ Lyalo Jesu wakabaambila ayi, “Ndakalinga kusuni amoyo wangu woonse, kwaamba ayi ndye cakulya ici ca bushiku bwa Pasika bwa kwiibaluka kusotokela, pantu pomwi amwebo kaantana kupenshekwa.

¹⁶ Mukwiinga ntoomulwiita ayi teshi nkalye cakulya ici alimwi kushikila cikasansululwe muBweene bwakwe Lesa.”

¹⁷ Mpomunyaawo Jesu wakabwesa nkomeshi, walumba Lesa, mpeeke wabaambila ayi, “Amutambule munweemo noonse,

¹⁸ ceebo ntoomulwiita ayi kuswa sunu teshi nkanwe lyobilo maanshi a shisepo sha minyansa, kushikila Bweene bwakwe Lesa bwaakwisa.”

¹⁹ Kuswawaawo wakabwesa cimaande, walumba Lesa, lyalo wacikomoona akupa bashikwiiya bakwe akwaamba ayi, “Uyu ngumubili wangu [uyo waabwa ceebo ca ndimwe. Kamucita ceeci mukunjibaluka.”

²⁰ Mbweeke ubo, ndibakamana kulya mulalilo, Jesu wakapa bashikwiiya bakwe nkomeshi akubaambila ayi, “Nkomeshi iyi ncecipangano cipya cakwe Lesa ca mubulowa bwangu bweshi bukatiilwe ceebo ca ndimwe.]

²¹ “Sombi amubone! Uyo utoongaba ntoolyaakwe pano peenka!

²² Mukwiinga MwanaaMuntu ulaakufwa bweenka mbuli Lesa mbwaakayanda, sombi mapensho kumuntu uyo utoomwaaba!”

²³ Mpomunyaawo bashikwiiya bakatalika kuliipusha weenga wacita boobo pakati kabo.

Munene kwiinda bamwi mbwaaelete kuba

²⁴ Lyalo bashikwiiya bakatalika kupikishanya makani akwishiba munene pakati kabo.

²⁵ Mpomunyaawo Jesu wakabaambila ayi, “Baami ba mucishi ca panshi balicite nkusu pabantu babo alimwi abo batondesha nkusu pabantu babo, balisuni kwiitwa ayi, ‘Beshikucita shibotu kubantu.’

²⁶ Sombi mwebo tabushi mbomweelete kuba ubo, sobwe. Munene pali ndimwe ulyeelete kuba mbuli mwanike alakwe mweendeleshi ulyeelete kuba musebenshi wanu noonse.

²⁷ Ino munene ngani? Sa ngulya uletelwabo shakulya na ngumusebenshi shikubamba shakulya? Ncakwiila ngooyo uletelwabo. Sombi nebo kuli ndimwe ndi anga ngumusebenshi.

²⁸ “Mwebo mwekala anebo mumasunko angu oonse.

²⁹ Ono bweenka mbuli baTa mbobakampa nkusu shakweendelesha, anebo mbweshi nkamupe amwebo.

³⁰ Mulaakulya akunwa pantu pomwi anebo muBweene bwangu alimwi mulaakwikala pashuuna sha bwaami akoombolosha mishobo likumi ayobilo ya Isilaeli.

Jesu mbwaakaambila Pita ayi ulaakunkaka

³¹ “Simoni, Simoni, nyumfwa! Satana wasuminishikwa kumusunka bweenka mbuli mulimi mbwaapupulusha maila.

³² Sombi ndakupailila kwaamba ayi lushomo lutamaani. Ono waakupilukila kuli ndime ukayumye babyo.”

³³ Sombi Pita wakakumbula ayi, “Nkambo, nebo ndilibambite kuya amwebo muntolongo nabibo kufwa.”

³⁴ Jesu wakakumbula ayi, “Ntookulwiita Pita ayi sunu lyeenka kombwe kaatana kulila, utokwaamba mankanda otatwe ayi toonshi.”

Shakunyamuna mpotomona, coola amupeeni

³⁵ Jesu wakeepusha bashikwiiya bakwe ayi, “Lilya ndindakamutuma kamutacite mpotomona, coola nabi nsapato, sa kuli ncemwakapenga?” Balo bakakumbula ayi, “Taaku.”

³⁶ Lyalo wakabaambila ayi, “Ono bulya uyo woonse ucite mpotomona nabi coola, anyamune. Alakwe uyo utacite mupeeni, aulishe cakufwala cakwe ca peculu kwaamba ayi aule.

³⁷ Cililembetwe ayi, ‘Alakwe bakamubelengela pantu pomwi abamucita shibi.’ Ntoomulwiita ayi Malembo aya alyeelete kucitika cancinencine muli ndime. Ceebo shoonse shilembetwe pali ndime shili pafwaafwi kucitika.”

³⁸ Bashikwiiya bakaamba ayi, “Amubone Nkambo, tulicite mipeeni yobilo.” Jesu wakakumbula ayi, “Njiinji yeenka iyo.”

Jesu mbwaakapaila mumuunda wa Getisemani

³⁹ Jesu wakaswaamo mundabala inene akuya kuKalundu ka Olifi bweenka mbwaakalinga kushibite, abalo bashikwiiya bakwe bakamukonkela.

⁴⁰ Ndyaakashikabo kumusena uyo Jesu wakabaambila ayi, “Amupaile kwaamba ayi mutenjili mumasunko.”

⁴¹ Lyalo Jesu wakabashiya weendakobo paniini wafukama wapaila. Wakaamba ayi,

⁴² “Ta, na mulisuni, amukushe nkomeshi ya mapensho iyi pali ndime, nakubi boobo mutaciti kweelana akuyanda kwangu, sombi amucite kuyanda kwanu.” [

⁴³ Mpomunyaawo munjelo wakesa kuswa kwiculu akumuyumya.

⁴⁴ Ceebo cakupenshekwa bunene mumoyo, wakapaila cankusu kwiinda pakutaanguna. Lyalo nkasaalo yakwe yakalinga anga njimindoondo ya bulowa itoolokela panshi.]

⁴⁵ Ndyaakaswa mukupaila wakaboolela kubashikwiiya bakwe botatwe abo akucana balilete ceebo bakalinga kulemete abuumbi kubuumba.

⁴⁶ Jesu wakabeepusha ayi, “Ceebonshi mulilete? Amubuke, mupaile kwaamba ayi mutenjili mumasunko.”

Jesu mbwaakacatwa

⁴⁷ Jesu ndyaakalinga kucaamba, likoto lya bantu lyakesa kalitanjilitwe aJudasi, womwi wa bashikwiiya bali likumi abobilo. Judasi wakasena pafwaafwi kwaamba ayi afyonte Jesu.

⁴⁸ Sombi Jesu wakamwaambila ayi, “Judasi, sa utokwaaba MwanaaMuntu kwiinda mukufyonta?”

⁴⁹ Ono bashikwiiya bakalinga aJesu ndibakabona cakalinga kucitika, bakeepusha ayi, “Nkambo, sa tubayase mipeeni?”

⁵⁰ Lyalo umwi wa bashikwiiya wakasutula kutwi walulyo musha wa mupailishi munene.

⁵¹ Sombi Jesu wakaamba ayi, “Amucileeke kulwana!” Mpomunyaawo Jesu wakacata kutwi wa muntu uyo akumushilika.

⁵² Mpomunyaawo Jesu wakaambila bamatanjilili ba bapailishi, beshikulama kuŊanda yakwe Lesa abamaloba ba baJuda abo bakesa mukumucata ayi, “Ino mweshitanshi amipeeni ankooli anga ndi mwiipi?

⁵³ Ndaalinga amwebo muŊanda yakwe Lesa lyoonse, sombi tamukwe kuncata. Anu ici nceciindi ncemwasuminishikwa kwaamba ayi mwaami wa munshinshe atondeshe nkusu shakwe.”

Pita mbwaakakaka Jesu

⁵⁴ Mpomunyaawo bakacata Jesu akumutola kuŋanda ya mupailishi munene. Alakwe Pita wakalinga kuya cikonkela Jesu palaale.

⁵⁵ Ono ndibakakunka mulilo pakati kalubansa lwa ŋanda ya mupailishi, boonse bakekala, alakwe Pita wakekala ambabo.

⁵⁶ Lyalo mwanakashi musebenshi wa mupailishi munene ndyaakabona Pita kaayota mulilo, wakamulangishisha akwaamba ayi, “Uyu musankwa alakwe wakalinga aJesu!”

⁵⁷ Sombi Pita wakakaka akwaamba ayi, “Sobwe omwanakashi, nshimwishiiwo muntu uyo!”

⁵⁸ Ndipakeendakobo ciindi ciniini musankwa umwi alakwe wakamubona akumwaambila ayi, “Te awebo walinga kweenda aJesu?” Sombi Pita wakakumbula ayi, “Tau, teshi ndime!”

⁵⁹ Ndipakeenda ciindi cineneeko aumwi muntu wakaamba cankusu ayi, “Ncakwiila muntu uyu walinga kweenda aJesu mukwiinga ngumwine Galili.”

⁶⁰ Sombi Pita wakakumbula ayi, “Sobwe, ayo makani ngootokwaamba nsheeshi nebo napaceyi!” Lyalo Pita kaacaamba kombwe wakalila.

⁶¹ Mpomunyaawo Mwaami Jesu wakapiluluka akulangilisha Pita. Lyalo alakwe wakeebaluka maswi a Mwaami mbuli mbwaakamwaambila ayi, “Kombwe kaatana kulila sunu, webo Pita utoonkaka mankanda otatwe.”

⁶² Lyalo wakaswita pansengwe, waya walila abuumbi.

Jesu mbobakamuweluluka akumuuma

⁶³ Mpeeke basankwa bakalinga kulindilila Jesu bakamuweluluka akumuuma.

⁶⁴ Lyalo bakamufweka pameenso, bakamuuma akumwiipusha ayi, “Twaambile, ino ngani wakuuma?”

⁶⁵ Bakamwaambila aamwi maswi aanji a mucobwe.

Jesu mbwaakatolwa kunkuta

⁶⁶ Ndibwakaca, bamaloba ba baJuda, bamatanjilili ba bapailishi, abafundishi ba Milawo bakabungana. Mpeeke Jesu wakatolwa kuli mbabo.

⁶⁷ Bakamwiipusha ayi, “Tulwiite na ndiwe Usalitwe wakwe Lesa.” Sombi wakabakumbula ayi, “Na mulwiite, teshi mushome, sobwe.

⁶⁸ Na mwiipushe, teshi munkumbuleewo.

⁶⁹ Sombi kuswa sunu MwanaaMuntu unanooshiite kulubasu lwalulyo lwakwe Lesa Shinkusu shoonse.”

⁷⁰ Lyalo boonse bakeepusha ayi, “Sa nkokwaamba ayi ndiwe Mwanaakwe Lesa?” Alakwe wakakumbula ayi, “Mwacaamba nobeene.”

⁷¹ Mpomunyaawo bakaamba ayi, “Sa apa inga katuciyandoola abamwi bakamboni? Twalinyumfwila kale mbwaalyaambilila mwiine.”