Luka 19 - Baibo Busansulushi Bwa Libuku Ili

Jesu aSakeyo

¹ Jesu ndyaakenjila muJeliko wakalinga kwiindilitebo.

² MuJeliko umo mwakalinga muntu wiitwa ayi Sakeyo, musonkeshi munene wakalinga mubile.

³ Wakalinga kuyanda kubona Jesu mbwaabete, sombi mukwiinga wa kufwiimpa, taakwe kumubona ceebo ca bantu kufula.

⁴ Aboobo wakacica kuya kunembo mukutanta kucisamu ca mukuyu kwaamba ayi amuboone mukwiinga Jesu mpwaakalinga kuya mukwiinda.

⁵ Jesu ndyaakashika pamusena apo wakalanga kwiculu akumwaambila ayi, “Sakeyo, fwambaana seluka ceebo ndyeelete kuya mukwikala kuŋanda yako sunu.”

⁶ Mpomunyaawo Sakeyo wakaseluka cakufwambaana akutambula Jesu cakusangalala.

⁷ Lyalo bantu boonse bakabona cikani ici bakatalika kutongooka akwaamba ayi, “Amubone muntu uyu waya mukushikila kuŋanda ya mucita shibi.”

⁸ Sombi Sakeyo wakanyamuka akwaambila Mwaami Jesu ayi, “Amubone, Nkambo, ndaakupa musa wa buboni bwangu kubakandu. Peculu lya waawo na kuli ngondakanyengelela buboni, ndaakumubooshesha akwiilikaawo mankanda one.”

⁹ Jesu wakamwaambila ayi, “Lupulusho sunu lwashika muŋanda ino mukwiinga alakwe musankwa uyu ngumwanaakwe Abulaamu.

¹⁰ Ceebo MwanaaMuntu wakesa mukuyandoola akupulusha basowekete.”

Cikoshanyo ca maali a golodi

¹¹ Bantu kabacikutika cikani ici, Jesu wakatolelela kubaambila cikoshanyo mukwiinga wakashika pafwaafwi akuJelusalemu. Mpeeke bantu bakalinga kuyeeya ayi Bweene bakwe Lesa bulibo pafwaafwi kuboneka.

¹² Mpomunyaawo wakaamba ayi, “Kwakalinga musankwa wakalinga kulemekwa uyo wakaya kucishi ca kulaale ayi akapekwe bwaami akuboolela alimwi.

¹³ Kaatana kuya wakeeta basebenshi bakwe bali likumi akubapa lyaali lyaali lya golodi alimwi akubaambila ayi, ‘Pamaali aya ndisuni nkacane mpindu.’

¹⁴ Ono mbaakalinga kwikalaabo mucishi umo tebakalinga kusuni kwaamba ayi abe mwaami. Aboobo bakatuma nkombe pesule ayi, ‘Swebo tatusuni kwaamba ayi uyo muntu abe mwaami wesu.’

¹⁵ “Nakubi boobo muntu uyo wakaya mukupekwa bwaami, lyalo wakapiluka. Ingayi ashikebo, wakeeta basebenshi bakwe abo mbwaakapa maali ayi eshibe ngobakacaninaawo.

¹⁶ Mpeeke mutaanshi wakesa akwaamba ayi, ‘Palyaali lyanu nkambo, ndakacaninaawo amwi ali likumi.’

¹⁷ Mpomunyaawo wakamwaambila ayi, ‘Wakacita kabotu omusebenshi mubotu! Ono mukwiinga washomeka mushintu shiniini utooba mweendeleshi wa mandabala anene ali likumi.’

¹⁸ Alakwe musebenshi wabili wakesa waamba ayi, ‘Nkambo, palyaali lyanu ndakacaninaawo amwi osanwe.’

¹⁹ Mwaami wakamwaambila ayi, ‘Webo utooba mweendeleshi wa mandabala anene ali osanwe.’

²⁰ “Musebenshi watatu wakesa waamba ayi, ‘Nkambo, ndi lyaali lyanu, ndakalyaangabo pakatambala akulishisa.

²¹ Ndakaloonda mukwiinga muli bakali. Mulabwesa shiteshi shaanu akutebula mpomutakwe kushanga.’

²² Mwaami wakwe wakamwaambila ayi, ‘Webo omusebenshi mubiibi! Ono maswi eenka ngowasebensesha atookushinina. Ulishi kwaamba ayi ndimukali, ndabwesa shiteshi shaangu akutebula mpontakwe kushanga.

²³ Ino ono tookwe kulibikilanshi kubutala bwa maali? Naakwiinga pakuboola ndacana mpindu peculu.’

²⁴ “Lyalo mwaami wakaambila bakalingaawo ayi, ‘Amumunyaaye lyaali ilyo mupe musebenshi ucite ali likumi.’

²⁵ Sombi balo bakaamba ayi, ‘Nkambo, uyu ulicite kale maali ali likumi!’

²⁶ Sombi mwaami wakakumbula ayi, ‘Ntoomulwiita ayi uyo woonse ucite kale ulaakupekwa ashimwi. Sombi uyo ucite kaniini ulaakunyaikwa akaako koonse nkaacite.

²⁷ Ono balwani bangu abo batakalinga kusuni ayi nebo mbe mwaami wabo, amubaleete kuno mubacaaye kambweneeko!’ ”

Jesu mbwaakenjila muJelusalemu

²⁸ Jesu ndyaakamana kwaamba boobo, wakabatanjilila kuya kuJelusalemu.

²⁹ Ndyaakashika kufwaafwi amandabala a Betifagi aBetani mweela Kalundu ka Olifi, wakatuma bashikwiiya bakwe bamwi bobilo

³⁰ akubaambila ayi, “Kamuya mumushi ulya ngomutoobona. Mwashikabo, mulacana mwanaambongolo kaangitwe uyo ngobatana kutantawo kale bantu, muye mumwaangulule, mumulete kokuno.

³¹ Na umwi muntu amwiipushe ayi, ‘Mutoomwaangulwitanshi?’ mumwaambile ayi, ‘Mwaami ulicitaakwe ncito.’ ”

³² Ncakwiila bashikwiiya abo bakaya akucana bweenka mbwaakabaambila Jesu.

³³ Ndibakalinga kwaangulula mwanaambongolo uyo, beene bakeepusha ayi, “Ino mutoomwaangulwitanshi?”

³⁴ Balo bakakumbula ayi, “Mwaami ulicitaakwe ncito.”

³⁵ Lyalo bakatola mwanaambongolo kuli Jesu akuyalawo shakufwala shabo sha peculu pali nguwe. Mpeeke batantikawo Jesu.

³⁶ Ndyaakalinga kuya kaatantite pambongolo, bantu bakayala shakufwala shabo sha peculu munshila.

³⁷ Ndyaakashika pafwaafwi akuJelusalemu kunkunamo ya Kalundu ka Olifi, likoto lyoonse lya bantu bakalinga kukonkela kwiisha kwakwe Jesu, lyakasangalala akutalika kulumbaisha Lesa amaswi a peculu ceebo ca milimo ya nkusu sha kwiculu njebakabona.

³⁸ Bakaamba ayi, “Lesa aape coolwe kuMwaami uyo utoosa muliina lyakwe! Akube luumuno kwiculu abulemu kuli Lesa!”

³⁹ Mpomunyaawo baFalisi bamwi bakalinga mulikoto bakaambila Jesu ayi, “NoBafundishi, amwaambile bashikwiiya banu boomune!”

⁴⁰ Jesu wakakumbula ayi, “Ntoomulwiita ayi na aba boomune, mabwe atokoolobesha ngawo.”

Jesu mbwaakalilila Jelusalemu

⁴¹ Lyalo Jesu ndyaakasena pafwaafwi akubona Jelusalemu, wakalila.

⁴² Wakaamba ayi, “Awebo naakwiinga kooshi sheesho shintu sheenga shakuletela luumuno. Sombi mukubula coolwe shakashisikwa kuli ndiwe.

⁴³ Ciindi cilaakushika balwani bako ndyeshi bakashingulushe lilinga akukushinkila koonse koonse ayi ubule pakucicila.

⁴⁴ Balaakukumwayulula akunyonyoola boonse bekala muli ndiwe, alimwi teshi bakashiye libwe palibwenyina mukwiinga tookwe kwishiba ciindi Lesa ndyaakesa mukukupulusha.”

Jesu mbwaakaya muŊanda yakwe Lesa

⁴⁵ Kuswawaawo Jesu wakenjila muŊanda yakwe Lesa akutalika kutandamo baabo bakalinga kuulisha.

⁴⁶ Wakabaambila ayi, “Cililembetwe ayi, ‘Ŋanda yangu ilaakwiitwa ayi ŋanda yakupaililaamo,’ sombi mwebo mwayaalula yaba mumwakuyubila beepi!”

⁴⁷ Lyalo Jesu wakalinga kwiisha lyoonse muŊanda yakwe Lesa. Mpeeke bamatanjilili ba bapailishi, bafundishi ba Milawo abeendeleshi ba cishi bakatalika kuyandoola nshila yakumucailaamo.

⁴⁸ Sombi tabakwe kwiicana mukwiinga bantu boonse bakalinga kusuni abuumbi kunyumfwa nshaakalinga kwaamba.