Luka 18 - Baibo Busansulushi Bwa Libuku Ili

Cikoshanyo ca mukalubinje mwanakashi amoomboloshi

¹ Mpomunyaawo Jesu wakalwiita bashikwiiya bakwe cikoshanyo, cakubeeisha ayi balyeelete kupaila lyoonse cakutatyongola.

² Wakaamba ayi, “Kwakalinga moomboloshi mundabala imwi watakalinga kuloonda Lesa nabi kulemeka muntu.

³ Kwakalinga amukalubinje mwanakashi mundabala yeenka iyo wakalinga kuya kumoomboloshi lyoonse lyoonse mukusenga ayi, ‘Amumanishileko mulandu uyu ngooncite ashimulanduma!’

⁴ Nshiku shakafulabo moomboloshi uyo kaakaka, sombi pesule wakalyaamboosha mwiine ayi, ‘Nakubi kwaamba ayi nshiloondi Lesa nabi kulemeka muntu,

⁵ ceebo cakwaamba ayi mukalubinje uyu walema kunjobekela, ntoomoomboloshesha mulandu wakwe. Mukwiinga inga wampensha kunoosa mbwaatalikila!’ ”

⁶ Mpomunyaawo Mwaami Jesu wakaamba ayi, “Te mwanyuumfwa mbwaakaamba moomboloshi utaluleme uyo?

⁷ Ono sa Lesa teshi akabacitile shiluleme bantu bakwe basalitwe abo bamusenga malumwi amashiku? Sa ulaakucelwa kubacafwa?

⁸ Ntoomulwiita ayi ulaakufwambaana kubacitila shiluleme. Ono sa MwanaaMuntu pakwisa ulaakucana bantu bashomeka?”

Cikoshanyo ca muFalisi amusonkeshi

⁹ Lyalo Jesu wakaamba cikoshanyo cimwi kubaabo bakalinga kuyeeya ayi baliluleme kwiinda bamwi boonse.

¹⁰ Wakaamba ayi, “Kwakalinga basankwa bobilo bakaya mukupaila kuŊanda yakwe Lesa. Umwi wakalinga muFalisi alakwe umwi wakalinga musonkeshi.

¹¹ “Mpomunyaawo muFalisi wakanyamuka akupaila ayi, ‘Ndamulumba nobaLesa ceebo nshibete mbuli bamwi bantu boonse bapambi, bataluleme nabi beshibulale alimwi ndalumba ceebo nshibete mbuli musonkeshi uyu.

¹² Ndalikasha kulya mankanda obilo munsondo alimwi pashintu likumi shoonse nsheenga ndacaana ndakushawo comwi akumupa, noBaami.’

¹³ “Sombi musonkeshi uyo wakanyamuka alakwe weemikana palaale. Taakwe kulangaawo akwiculu pakupaila, sombi wakalikumbata akwaamba ayi, ‘NobaLesa, amunyumfwileko nkumbu nebo nemucita shibi!’

¹⁴ Ntoomulwiita ayi musonkeshi wakaboola kumishaabo kaaluleme pameenso akwe Lesa kuteshi muFalisi. Mukwiinga uyo woonse ulisumpula, ulaakuceeshekwa. Awooyo uliceesha, ulaakusumpulwa.”

Jesu mbwaakapa coolwe baana baniini

¹⁵ Bantu bamwi bakaleta baana baniini kuli Jesu ayi abacaate amaansaakwe kwaamba ayi abape coolwe. Bashikwiiya bakwe ndibakabona boobo bakakalalila bantu abo.

¹⁶ Sombi Jesu wakeeta baana akwaamba ayi, “Amuleke baana baniini bese kuli ndime. Mutanoobakasha ceebo Bweene bwakwe Lesa mbwabaabo bali mbuli baaba.

¹⁷ Ntoomulwiita calushinisho ayi uyo woonse utatambuli Bweene bwakwe Lesa anga ngumwaana, ncakwiila teshi akenjileemo.”

Musankwa mubile

¹⁸ Mutanjilili wa baJuda umwi wakeepusha Jesu ayi, “NoBafundishi babotu, ino ndyeelete kucita buyani kwaamba ayi nkabe abuumi butamaani?”

¹⁹ Jesu wakamwiipusha ayi, “Ino ceebonshi waamba ayi ndi kabotu? Taaku muntu uli kabotu, sombibo Lesa eenka.

²⁰ Yalo milawo uliishi yaamba ayi, ‘Utaciti bulale, utacaayi, uteepi, utapi bukamboni bwakubeca, lemeka baiso abanyoko.’ ”

²¹ Musankwa uyo wakakumbula ayi, “Iyi milawo yoonse ndeekonkela kuswa kubwanike bwangu.”

²² Jesu ndyaakanyumfwa boobo, wakamwaambila ayi, “Kwacaalabo cintu comwi ncooelete kucita. Koya uulishe shoonse nshoocite, maali upe bakandu, lyalo ulaakuba abuboni kwiculu. Na umanishe kucita boobo, ndyeshi use unkonkele.”

²³ Sombi musankwa uyo ndyaakanyumfwa boobo, wakoongumana mukwiinga wakalinga mubile abuumbi.

²⁴ Jesu ndyaakabona ayi woongumana wakaamba ayi, “Nciyumu abuumbi kubantu babile kwinjila muBweene bwakwe Lesa!

²⁵ Ncuubu ngamela kupula muliinso lya nyeleti kwiinda muntu mubile kwinjila muBweene bwakwe Lesa.”

²⁶ Bantu bakanyumfwa cikani ici bakeepusha ayi, “Ino ngani eshi akapulushikwe?”

²⁷ Jesu wakakumbula ayi, “Ico citakonsheki kubantu, kuli Lesa kwalo cilakonsheka.”

²⁸ Lyalo Pita wakaamba ayi, “Amubone! Swebo twakashiya maandeesu akukonkela ndimwe.”

²⁹ Jesu wakakumbula ayi, “Ntoomulwiita calushinisho ayi uyo woonse ushiya ŋanda yakwe, mukaakwe, bamakwabo, bashali bakwe nabi bana bakwe ceebo ca Bweene bwakwe Lesa,

³⁰ ulaakutambula shintu shiinji abuumbi pacishi ca panshi alimwi muciindi citoosa ulaakuba abuumi butamaani.”

Jesu mbwaakaamba shalufu lwakwe lyatatu

³¹ Jesu wakatola bashikwiiya bakwe bali likumi abobilo palubasu akubalwiita ayi, “Tutooya kuJelusalemu uko shoonse shakalemba balaluki bakulukulu isho shaamba paMwanaaMuntu nkweshi shikacitikile.

³² Mukwiinga MwanaaMuntu ulaakwaabwa mumaansa a baswamashi bakunsengwe abo beshi bakamuweluluke, kumutukana, akumushipila mate.

³³ Balaakumukwipa akumucaya, sombi pabushiku bwatatu ulaakubushikwa kuswa kubafu.”

³⁴ Bashikwiiya bakwe taaku ncibaanyumfwaawo pacikani ici. Maswi aya tabakwe kwaanyumfwisha ceebo akalinga kushishitwe kuli mbabo, aboobo tabakwe kwishiba Jesu ncaakalinga kwaamba.

Jesu mbwaakashilika moofu

³⁵ Jesu ndyaakashika pafwaafwi aJeliko wakacana moofu kaashiite mweela nshila, kaasengelela.

³⁶ Mpeeke moofu uyo ndyaakanyumfwa bantu baanji kabeenda munshila iyo, wakeepusha cakalinga kucitika.

³⁷ Bantu bakamwaambila ayi, “NguJesu wa kuNasaleti utokwiinda.”

³⁸ Mpomunyaawo wakoolobesha ayi, “BaJesu nobana babo baDefedi, amunyumfwileko nkumbu!”

³⁹ Abo bakalinga kunembo bakamukalalila akumwaambila ayi aumune. Sombi lakwe wakeendilishaawo koolobesha ayi, “NoBana babo baDefedi, amunyumfwileko nkumbu!”

⁴⁰ Mpeeke Jesu wakeemikana akwaambila bantu ayi bamulete kuli nguwe. Ndyaakashika pafwaafwi Jesu wakamwiipusha ayi,

⁴¹ “Nciinshi ncoosuni ayi nkucitile?” Lakwe wakamukumbula ayi, “Nkambo, ndisuni kwaamba ayi ntalike kubona alimwi.”

⁴² Lyalo Jesu wakamwaambila ayi, “Talika kubona, lushomo lwako lwakushilika.”

⁴³ Paciindi ceenka ico wakatalika kubona, lyalo wakakonkela Jesu kaaya cilumbaisha Lesa. Bantu boonse ndibakabona mbocakacitika abalo bakalumbaisha Lesa.