Luka 16 - Baibo Busansulushi Bwa Libuku Ili

Cikoshanyo ca shikulama buboni ucenjete

¹ Jesu wakaambila bashikwiiya bakwe ayi, “Kwakalinga musankwa mubile wakalinga kucite shikulama buboni. Bantu bakaluula muntu uyo ayi utoonyonyoola buboni bwakwe.

² Lyalo wakeeta shikulama buboni akumwiipusha ayi, ‘Ngamakaninshi aya ngoontoonyumfwa? Lemba mbone mbowalinga kweendelesha buboni mukwiinga tooelete kunoocili shikulama buboni alimwi.’

³ Mpeeke shikulama buboni uyo wakalyaamboosha mumoyo ayi, ‘Ntoocita buyani ono mwaami wangu mbwaatooyanda kunkusha ncito? Nshicite nkusu shakulima alimwi kusengelela kulampa nsoni.

⁴ Ono mbulya mbweshi ncite kwaamba ayi bantu bakanoontambula mumaandaabo ndaakuswa ncito.’

⁵ “Mpomunyaawo wakeeta bakalinga kucite nkongole kumwaami wakwe womwi womwi akwiipusha mutaanshi ayi, ‘Wakakweletanshi kumwaami wangu?’

⁶ Alakwe wakaamba ayi, ‘Shikopo mwaanda sha mafuta.’ Mpeeke shikulama buboni uyo wakamwaambila ayi, ‘Bwesa lipepa palembetwe nkongole yako. Fwambaana, kala ulembebo ayi shikopo makumi osanwe.’

⁷ Lyalo wakaambila umwi ayi, ‘Ino webo wakakweletanshi?’ Wakakumbula ayi, ‘Masaka ali cuulu comwi a witi.’ Mpeeke alakwe wakamwaambila ayi, ‘Bwesa lipepa palembetwe nkongole yako, ulembewo ayi masaka myaanda yosanwe ayotatwe.’

⁸ Mwaami wakwe uyo wakalumbaisha shikulama buboni utashomeki ceebo cakucenjela kwakwe. Mukwiinga bantu ba mucishi ca panshi cino mbasongo kubamba makani abo kwiinda bantu bali mumumuni.”

⁹ Jesu wakatolelela kubaambila ayi, “Ntoomulwiita ayi amusebenseshe buboni bwa mucishi cino kwaamba ayi mucane beshicibusanyinaanu, buboni bwaakumana, bakamusekelele mumaanda atamaani.

¹⁰ Uyo woonse ushomeka pacintu ciniini, ulaakushomeka apacintu cinene. Alakwe uyo utashomeki pacintu ciniini, teshi akashomeke apacintu cinene.

¹¹ Ono na kamutashomeki pabuboni bwa pacishi cino, ino ngani eshi akamushoome akumupa buboni bwancinencine?

¹² Na kamutashomeki pabuboni bwa bamwi, ino ngani eshi akamupe buboni bweelete kuba bwaanu?

¹³ “Taaku musebenshi weenga wasebensela baami bobilo, mukwiinga ulapata umwi akusuna umwi, nabi kunyumfwila umwi akusuula umwi. Nkokwaamba ayi tamukoonshi kusebensela Lesa abuboni.”

Kwiisha kumwi kwakwe Jesu

¹⁴ BaFalisi ndibakanyumfwa makani aya, bakatalika kushibuluka Jesu mukwiinga balo bakalinga kusunishi maali.

¹⁵ Sombi Jesu wakabaambila ayi, “Mwebo mulalibonekesha kubantu ayi muliluleme, nakubi boobo Lesa ulishi myoyo yanu. Mukwiinga cintu coonse bantu ncibaamba ayi ncibotu abuumbi, kuli Lesa taaku ambocibete.

¹⁶ “Milawo yakwe Mose amaswi akalemba balaluki bakulukulu akalinga kukonkelwa kushikila ciindi cakwe Joni Mubombeki. Kuswa paciindi ico Makani Abotu a Bweene bwakwe Lesa alashimikilwa, alimwi bantu baanji batokweelesha cankusu kwaamba ayi benjile muBweene ubo.

¹⁷ Sombi ncuubu abuumbi liculu acishi kumana kwiinda libala lyomwi lya Milawo kumana ncito.

¹⁸ “Muntu uli woonse uleka mukaakwe akweeba umbi wacita bulale, alakwe uyo weeba mwanakashi wakalekwa wacita bulale.

Musankwa mubile aLasalo

¹⁹ “Kwakalinga musankwa mubile wakalinga kufwala shakufwala shamakwebo uyo wakalinga kulya kabotu lyoonse.

²⁰ Ono kwakalinga aumwi musankwa mupenshi wakalinga kwiitwa ayi Lasalo, uyo wakalinga kucite shilonda mubili woonse. Bantu bakalinga kumubika pamulyango wa ŋanda ya mubile uyo.

²¹ Lasalo wakalinga kuminina mate uto twakulya twakalinga kulokeela panshi lya tebulu ya muntu mubile uyo. Abalo bakabwa bakalinga kwisa mukunoomumyanguta pashilonda.

²² “Musankwa mupenshi uyo wakafwa, muuya wakwe baanjelo bakautola kwiculu kulubasu lwakwe Abulaamu. Muntu mubile uyo alakwe wakafwa akufukilwa.

²³ Mpeeke mubile uyo ndyaakalinga mumusena wa bafu, kaapenga cancinencine, wakalanga kwiculu akubona Lasalo kaali kulubasu lwakwe Abulaamu palaale.

²⁴ Lyalo wakoolobesha ayi, ‘Ta Abulaamu, amunyumfwileeko nkumbu. Amutume Lasalo kwaamba ayi asumpebo munwe mumaanshi ese atontoshe mulaka wangu mukwiinga ndapya abuumbi mumulilo muno.’

²⁵ “Sombi Abulaamu wakaamba ayi, ‘Omwanaangu ibaluka ayi webo ndiwakalinga muumi wakalinga wapekwa shintu shoonse shibotu, alakwe Lasalo shintu shibiibi. Sombi bulya alakwe utookondwa kuno awebo uli mumapensho anene.

²⁶ Kuteshi ceeci ceenka, pakati kesu awebo pali cilindi cilaamfu abuumbi, cakwaamba ayi taaku muntu uli kokuno weenga wacikonsha kusubuka kwisa kooko, nabi uli kooko kwisa kokuno.’

²⁷ Mpomunyaawo mubile uyo wakaamba ayi, ‘Anu ndaseenga ta, mutume Lasalo kuŋanda ya bata

²⁸ mukwiinga ndicite bamakwesu bosanwe. Aye akabacenjeshe kwaamba ayi abalo batakesi kokuno kumusena wa mapensho.’

²⁹ Sombi Abulaamu wakaamba ayi, ‘Abo balicite mabuku akalemba Mose abalaluki bakulukulu bamwi. Balyeelete kukonkela shilembetweemo.’

³⁰ Mubile uyo wakakumbula ayi, ‘Sobwe ta Abulaamu, sombi na umwi waswa kubafu wayaako, ndyeenga basanduka kuswa kushibiibi shabo.’

³¹ Abulaamu wakamwaambila ayi, ‘Na tabanyumfwili Mose abalaluki bakulukulu, teshi bakanyumfwe nabi umwi wabuka kuswa kubafu.’ ”