Luka 15 - Baibo Busansulushi Bwa Libuku Ili

Cikoshanyo ca mbelele isowekete

¹ Ono basonkeshi abataalinga kukonkela Milawo yakwe Mose, bakabungana pakalinga Jesu ayi banyumfwe kwiisha kwakwe.

² Mpomunyaawo baFalisi abafundishi ba Milawo bakatalika kutongooka akwaamba ayi, “Uyu muntu ulatambula buyani bantu batakonkeli Milawo yakwe Mose akulyaabo?”

³ Lyalo Jesu wakabalwiita cikoshanyo ici ayi,

⁴ “Na womwi pali ndimwe kaacite mbelele shili mwaanda, ono yomwi yasoweka, sa te ulashiya sheshilya shili 99 kumafulo akuya mukwiilangoola kushikila weecana?

⁵ Lyalo na weecana ulasangalala akwiinyamuna pacifushi

⁶ akwiitola kuŋanda. Mpeeke uleeta babye abeshimukobonyina akubalwiita ayi, ‘Amusekelele anebo, mukwiinga mbelele yangu yakalinga yasoweka ndeecana.’

⁷ Ntoomulwiita ayi akwalo kwiculu kulaba kusekelela bweenka ubo pamucita shibi womwi na wasanduka kuswa kushibiibi, kwiinda pabantu bali 99 baluleme batayandiki kusanduka.

Cikoshanyo ca lyaali lisowekete

⁸ “Nabi na twaambe ayi walutundu umwi kaacite maali asilifa ali likumi, sombi lyomwi lyasoweka, ulacita buyani? Sa te ulamunika lilampi akupyanga ŋanda yakwe akulangoola kabotu moonse kushikila walicana?

⁹ Mpeeke na walicana, uleeta babye abeshimukobonyina pantu pomwi akubalwiita ayi, ‘Ndisangalete abuumbi mukwiinga lyaali lyangu lyakalinga lyasoweka ndalicana. Atusekelele!’

¹⁰ Ntoomulwiita ayi akwiculu bweenka ubo, baanjelo bakwe Lesa balasangalala abuumbi pamucita shibi womwi uyo usanduka kuswa kushibiibi.”

Cikoshanyo ca mwaana musankwa wakasoweka

¹¹ Jesu wakabaambila alimwi ayi, “Kwakalinga musankwa umwi wakalinga kucite baana basankwa bobilo.

¹² Ono mwanikebantu wakaambila baishi ayi, ‘Ta, amumpe buboni mbonjelete kwaabilwa.’ Mpeeke ishiwabo wakabaanya buboni bwakwe kuli mbabo.

¹³ Kapatana kwiinda nshiku shiinji, mwanikebantu uyo wakoolisha buboni bwakwe akunyamuka lweendo kuya kucishi ca kulaale. Uko nkwaakaya, wakanyonyoola buboni bwakwe boonse mubwikaalo bubiibi.

¹⁴ Ndyaakamana kunyonyoola buboni, mucishi ico mwakaba nsala inene abuumbi, lyalo wakatalika kupenga.

¹⁵ Mpeeke wakaya kumuntu umwi wa mucishi ico kwaamba ayi akasebensele cakulya. Ono muntu uyo wakamupa ncito yakweembela nkumba.

¹⁶ Musankwa uyo wakalinga kukumbwa taaye uyo nkumba ngoshakalinga kulya uko, sombi taaku muntu nabi womwi wakalinga kumupa cakulya.

¹⁷ Pesule ndyaakesaamo maano wakalyaamboosha mwiine ayi, ‘Basebenshi boonse ba bata balicite shakulya shiinji abuumbi, ono nebo kuno ntooyanda kufwa kunsala!

¹⁸ Ntoonyamuka nje kuli bata nkaambe ayi, Ta, ndaabisha kuli Lesa akuli ndimwe.

¹⁹ Nsheelete kwiitwa alimwi ayi mwanaanu. Sombi mundeele anga ngumusebenshi wanu.’

²⁰ Mpomunyaawo wakanyamuka akuboolela kuli baishi. Kaacilibo palaale baishi bakamubona, mpeeke bakamunyumfwila nkumbu akumucicilila bamukumbata akumufyonta.

²¹ Mwaana uyo wakaambila baishi ayi, ‘Ta, ndakabisha kuli Lesa akuli ndimwe. Nsheelete kwiitwa ayi mwanaanu.’

²² Sombi baishi bakaambila basebenshi babo ayi, ‘Amufwambaane! Amulete cakufwala cibotu afwale. Mumufwalike ninga kumunwe ansapato.

²³ Amulete ŋombe ilya iinite bunene mucaye kwaamba ayi tulye tusekelele.

²⁴ Mukwiinga mwanaangu uyu wakalinga kufwite, ono waba muumi alimwi wakalinga kusowekete, ono wacanika.’ Lyalo bakatalika kusekelela.

²⁵ “Ciindi ico munenebantu wakalinga mumuunda. Ono ndyaakashika pafwaafwi aŋanda, wakanyumfwa bantu bakalinga kwiimba akushana.

²⁶ Paceebo ceeco wakeeta musebenshi womwi akumwiipusha cakalinga kucitika.

²⁷ Musebenshi wakakumbula ayi, ‘Mukwanu wesa, aboobo baiso bamucaila ŋombe iinite bunene mukwiinga waboola kaali muumi.’

²⁸ Munenebantu uyo wakakalala abuumbi alimwi wakakaka akwinjila muŋanda. Paceebo ceeco baishi bakaswita pansengwe mukumukombelela ayi enjile muŋanda.

²⁹ Sombi wakakumbula baishi ayi, ‘Amubone! Myaaka kufula njindamusebensela anga ngumusha alimwi nshina kumubishishaawo napaceyi. Sombi tamuna kumpaawo kale nabibo kapongo kwaamba ayi nsekelele abeensuma.

³⁰ Sombi mwanaanu uyu wakanyonyoola buboni bwanu mubanakashi bafuule, ndyaaboola kuŋanda, mwamucaila ŋombe iinite!’

³¹ Baishi bakamwaambila ayi, ‘Omwanaangu, lyoonse tuli awebo alimwi shoonse shintu nsheencite nshaako.

³² Sombi tulyeelete kusekelela akusangalala mukwiinga mwanike wako wakalinga kufwite, ono waba muumi, wakalinga kusowekete, ono wacanika.’ ”