Luka 14 - Baibo Busansulushi Bwa Libuku Ili

Jesu mbwaakashilika musankwa wakalinga kushimbite mubili

¹ Bumwi bushiku bwakookesha bwa Cibelu Jesu wakeetwa kuya mukulya kuŋanda ya umwi munene wa baFalisi. Mpeeke baFalisi bakalinga kumulangishisha.

² Ono panembo lyakwe Jesu pakalinga muntu wakalinga kushimbite mubili.

³ Lyalo Jesu wakeepusha baFalisi abafundishi ba Milawo ayi, “Sa Milawo ilatusuminisha kushilika pabushiku bwakookesha bwa Cibelu nabi tau?”

⁴ Sombi bakalinga kuumwitebo. Mpeeke Jesu wakabwesa muntu uyo, wamushilika akumwaambila ayi anooya.

⁵ Kuswawaawo Jesu wakabaambila ayi, “Ino na womwi pakati kanu kaacite mwaana musankwa nabi musune wawita mumukalo pabushiku bwakookesha, sa inga taamusubuli ciindi ceenka ico?”

⁶ Sombi bakaalilwa kumukumbula.

Kuliceesha akutambula kabotu beensu

⁷ Mpeeke Jesu ndyaakabona bantu bamwi bakeetwa mukulyaakwe mbobakalinga kusala shuuna sha bulemu, wakabalwiita cikoshanyo ayi,

⁸ “Na muntu wakwiita kubwiinga, tabashikili kwikala pacuuna ca bulemu mukwiinga inga muntu uyo anu wakeeta muntu umwi wiinda ndiwe bulemu.

⁹ Aboobo uyo wakamwiita noonse nobilo ulaakwisa akukwaambila ayi, ‘Amupe baaba cuuna ico.’ Ono lyalo ulaakunyumfwa nsoni pakunyamuka kuya mukwikala pacuuna citacite bulemu.

¹⁰ Anu na weetwa koya ukale pamusena uteshi wa bulemu kwaamba ayi uyo mwiine wakamwiita acite kwisa mukukwaambila ayi, ‘Kosa kuno ndaba, ukalileko waawa pacuuna ca bulemu.’ Ici cilaakukupa bulemu pameenso a baabo boonse mboweetwaabo pantu pomwi.

¹¹ Mukwiinga uyo woonse ulisumpula ulaakuceeshekwa, sombi uyo woonse uliceesha ulaakusumpulwa.”

¹² Lyalo Jesu wakaambila wakabeeta uyo ayi, “Na mweeta bantu mukulyaanu cakulya ca malumwi nabi ca macolesha, muteeti babyaanu, banandumi shanu, bakwabanu nabi beshimukobonyinaanu babile, mpashi abalo inga bamwiita bweenka ubo, aboobo mulaakulipilwa paceeco ncemwaacita.

¹³ Sombi na wabamba shakulya ayi musekelele, ita bakandu, balema myeendo, balema bamwi alimwi aboofu.

¹⁴ Lyalo ulaakupekwa coolwe mukwiinga balo inga tabacikoonshi kucita mushobo womwi kuli ndiwe. Lesa ulaakukulambula pabushiku ubo bantu basalalite ndyeshi bakabushikwe kuswa kubafu.”

Cikoshanyo cakusekelela kunene

¹⁵ Mpeeke womwi pabaabo Jesu mbaakalinga kulyaabo, ndyaakanyumfwa makani aya, wakaambila Jesu ayi, “Ulicite coolwe uyo eshi akacanike akulya pakusekelela muBweene bwakwe Lesa!”

¹⁶ Lakwe Jesu wakamukumbula ayi, “Kwakalinga muntu umwi wakabamba shakulya shiinji kwaamba ayi bakasekelele akwiita bantu baanji.

¹⁷ Paciindi cakusekelela wakatuma musebenshi wakwe ayi akeete baabo boonse bakasengwa kubaako mukwiinga shintu shoonse shakalinga kubambitwe kale.

¹⁸ Sombi boonse bakeetwa bakatalika kwaamba sheesho shakabataatisha. Mutaanshi wakaamba ayi, ‘Ndoola muunda, aboobo ndyeelete kuya mukuubona. Ndakombelela bandekeleleeko.’

¹⁹ Umwi wakaamba ayi, ‘Ndoola basune bakwana shipani shosanwe, bulya ntooya mukubeelesha. Ndakombelela bandekeleleeko.’

²⁰ Alakwe umwi wakaamba ayi, ‘Nebo ndaswabo mukweeba onoono, aboobo ndaleela.’

²¹ “Lyalo musebenshi wakaboolela mukuluula kumwaami wakwe. Mwine ŋanda uyo wakakalala. Mpeeke wakaambila musebenshi ayi, ‘Endesha, koya munshila shinene ashiniini sha mundabala ukeete bakandu, balema myeendo, balema bamwi aboofu.’

²² Ndyaakaboola musebenshi wakaamba ayi, ‘Nkambo, ndaciita kweelana ambomwaŋambila, ono musena moocili.’

²³ Lyalo mwaami wakwe wakakumbula ayi, ‘Koya mutushila amumikondo ya mumishi, ukaambile bantu cankusu ayi bese kwaamba ayi ŋanda yangu isule.

²⁴ Ntoomwaambila ayi taaku nabi womwi pabaabo bakalinga beetwa kataanshi, eshi akamyangeewo shakulya sha pakusekelela kwangu!’ ”

Shintu shiyandika pakuba shikwiiya

²⁵ Bantu baanji baanji bakakonkela Jesu, lyalo wakapiluluka akubaambila ayi,

²⁶ “Muntu uli woonse usuni kuba shikwiiya wangu ulyeelete kusuna ndime kwiinda baishi abanyina, bakaakwe abana bakwe, banandumi abanankashi shakwe, ee, nabi buumi bwakwe mwiine.

²⁷ Uyo woonse utanyamuni mucilingano wakwe akunkonkela, inga taabi shikwiiya wangu.

²⁸ “Ngani mulikoto lyanu, na utooyanda kuyaka ŋanda ilaamfu ya maanda peculu, weenga wabula kwikala panshi akubona na ulicite maali aanji akwaamba ayi amanishe ŋanda iyo?

²⁹ Mukwiinga na wamanishabo lwiimbi yaala kumanisha, woonse weenga weebona inga wamuseka.

³⁰ Balaakwaamba ayi, ‘Uyu muntu wakatalikabo kuyaka ŋanda njeshi abule akumanisha!’

³¹ “Ee, ngumwaaminshi ushi kwaamba ayi shinkondonyina ulicite bashilumamba bali shuulu makumi obilo, usuni kulwana cishi cakwe, weenga teekali panshi akuliipusha na bashilumamba bakwe bali shuulu likumi, inga bacikonsha kulwana akukoma mwaaminyina?

³² Aboobo na wabona kwaamba ayi inga tabacikoonshi, ulatuma beshikumwiimikanina kumwaaminyina kaacili kulaale ayi bakamusenge ayi batalwaani, pabebo kunyumfwana aluumuno pakati kabo.

³³ Amwebo mbocibete bweenka ubo. Nkokwaamba ayi amwebo na mwabula kusuula akushiya shintu shanu shoonse nshemucite, tamukoonshi kuba bashikwiiya bangu.

Shamwiinyo usambalete

³⁴ “Mwiinyo ngubotu, sombi na wasambalala, inga mwacita buyani kwaamba ayi ube kabotu alimwi?

³⁵ Nkokwaamba ayi taucite ncito kubulongo nabi pamulwi wa bufumba bwakubika mumuunda, ngwakusowabo. Uyo ucite matwi aanyumfwe!”