Luka 13 - Baibo Busansulushi Bwa Libuku Ili

Musanduke kuswa kushibiibi shanu nabi kufwa

¹ Paciindi ico bantu bamwi bakalingaawo bakalwiita Jesu shabene Galili abo Pilato mbwaakacaya akusenkanya bulowa bwabo pamilambu iyo njebakalinga kubenga.

² Lyalo Jesu wakakumbula ayi, “Sa mutooyeeya ayi abo bene Galili ncebakacailwa boobo bakalinga bamucita shibi beenda bene Galili bamwi boonse?

³ Sobwe! Ono ntoomulwiita ayi na mubule kusanduka kuswa kushibiibi shanu, amwebo mulaakufwa.

⁴ Ino abo bantu bali likumi abosanwe alimwi abotatwe ndibakawitwa ŋanda ilaamfu ya maanda peculu kuSailomu, mutooyeeya ayi bakalinga kubisha kwiinda bantu boonse bakalinga kwikala muJelusalemu?

⁵ Sobwe! Sombi na mubule kusanduka kuswa kushibiibi shanu, amwebo noonse mulaakufwa.”

Chikoshanyo ca mukuyu utacati shisepo

⁶ Kuswawaawo Jesu wakabaambila cikoshanyo ici ayi, “Kwakalinga muntu umwi wakalinga kucite cisamu ca mukuyu cakalinga kushangitwe mumuunda wa shisepo. Bumwi bushiku wakaya kucisamu ayi akabonemo nkuyu, sombi taakwe kushicana.

⁷ Mpeeke wakaambila shikusebensa mumuunda ayi, ‘Bona, njimyaaka yotatwe keensa mucisamu ici ayi mpashi ndacanamo nkuyu, sombi nshishicaniimo. Citemebo, cinanonyonyoolabo bulongo.’

⁸ Sombi musebenshi uyo wakakumbula ayi, ‘Amucileeke nkambo, kwamwaaka uno. Ndaakutipula mweela akubikamo mboleshi.

⁹ Na mwakali cikacate shisepo, ingayi cabota. Sombi na cikabule kucata, acikatemwebo.’ ”

Jesu mbwaakashilika mwanakashi mulema pabushiku bwakookesha

¹⁰ Pabushiku bumwi bwakookesha bwa Cibelu, Jesu wakalinga kwiisha mucoonde ca baJuda.

¹¹ Mucoonde umo mwakalinga mwanakashi wakalinga kucite shikaswa uyo wakalinga kumupensha kwamyaaka likumi ayosanwe alimwi ayotatwe. Wakalinga kweendabo kaakonkomene, taakalinga kucikonsha koololoka napaceyi.

¹² Jesu ndyaakabona mwanakashi uyo wakamwaambila ayi, “Nankashi, waangululwa kubulwashi bwako!”

¹³ Mpeeke Jesu wakabika maansaakwe pali nguwe, lyalo wakoololoka akulumbaisha Lesa.

¹⁴ Mpomunyaawo munene wa mucoonde wakakalala abuumbi ceebo Jesu wakashilika pabushiku bwakookesha bwa Cibelu. Mpeeke wakaambila bantu ayi, “Kuli nshiku shosanwe abomwi nshetweelete kusebensa. Aboobo munoosa munshiku isho mukuba kabotu, kuteshi pabushiku bwakookesha, sobwe!”

¹⁵ Lyalo Mwaami Jesu wakamukumbula ayi, “Mwebo nobantu nomwaamba nshemutaciti! Ngani mulikoto weenga taacalwiti musune nabi mbongolo yakwe mucimpati akwiitola mukunwa maanshi pabushiku bwakookesha bwa Cibelu?

¹⁶ Ino uyu mwanakashi wa mulishalane lyakwe Abulaamu uyo Satana ngwaakaanga myaaka likumi ayosanwe alimwi ayotatwe, sa teelete kwaangululwa pabushiku bwakookesha?”

¹⁷ Jesu ndyaakaamba boobo balwani bakwe bakanyumfwa nsoni, sombi bantu boonse kabasangalete pashintu shoonse shibotu shikankamika nshaakacita.

Cikoshanyo ca mbuto ya masitadi

¹⁸ Kuswawaawo Jesu wakeepusha ayi, “Anu Bweene bwakwe Lesa buli anga niinshi? Inga ndabukoshanisha anshi?

¹⁹ Bulikoshenye aluseke lwa masitadi ulo ndwaakabwesa muntu akulushanga mumuunda. Ndilwakamena akukula, cakaba cisamu alimwi abayuni bakapanga shiinswa mumisampi ya ncico.”

Cikoshanyo ca cimena

²⁰ Jesu wakeepusha alimwi ayi, “Anu Bweene bwakwe Lesa inga ndabukoshanisha anshi?

²¹ Buli anga ncimena ciniini mwanakashi ncaakasenkanya mushikopo shotatwe sha fulaulo kushikila woonse wafutumuka.”

Mulyango ushaankene

²² Jesu ndyaakalinga mulweendo lwakuya kuJelusalemu, wakeenda mumandabala amumishi kaaya ciisha.

²³ Mpeeke umwi muntu wakeepusha Jesu ayi, “Nkambo, sa mbaniinibo beshi bakapulushikwe?” Jesu wakakumbula ayi,

²⁴ “Amweeleshe cankusu kwinjila pamulyango ushaankene mukwiinga ntoomwaambila ayi bantu baanji balaakweelesha kwinjila, sombi teshi bakacikoonshe.

²⁵ Mpomunyaawo mwine ŋanda ulaakunyamuka akucalaako kumulyango. Lyalo mulaakwiimikana akutalika kukonkoonsha akwaamba ayi, ‘Amutucalwiteeko nkambo!’ Sombi lakwe ulaakumukumbula ayi, ‘Nshishi ankomwaswita!’

²⁶ Mpomunyaawo mulaakutalika kwaamba ayi, ‘Swebo twakalinga kulya akunwa pantu pomwi amwebo alimwi mwakalinga kwiisha mumandabala esu.’

²⁷ Sombi ulaakumwaambila alimwi ayi, ‘Nshishi ankomwaswita, amusweewo apa noonse nobamucita shibi!’

²⁸ Ono mulaakulila akulumanya meeno mwaakubona Abulaamu, Isaki, Jakobo alimwi abalaluki bakulukulu boonse kabali muBweene bwakwe Lesa, sombi mwebo kamuli pansengwe!

²⁹ Bantu balaakuswa kwicwe akumbo, kumatwa akumalenge kwisa mukulya muBweene bwakwe Lesa.

³⁰ Lyalo abo bacaalishi balaakuba bataanshi, abalo bataanshi balaakuba bacaalishi.”

Jesu mbwaakalinga kusuni ndabala ya Jelusalemu

³¹ Paciindi ceenka ico baFalisi bamwi bakesa kuli Jesu akumwaambila ayi, “Amusweeko kuno, muye kumusena umwi mukwiinga Elodi utooyanda kumucaya.”

³² Sombi Jesu wakabakumbula ayi, “Kamuya mukamwaambile uyo ucite maano a busulwe ayi, ‘Ntookusha bashikaswa akushilika bantu sunu aciilo. Ono pabushiku bwatatu ndaakumanisha ncito yangu.’

³³ Nakubi boobo ndyeelete kunooli palweendo sunu, ciilo alimwi aisona mukwiinga teshi cibotu mulaluki kucailwa kumwi, sombibo kuJelusalemu.

³⁴ “Webo Jelusalemu, Jelusalemu, noocaya balaluki akuuma mabwe bantu abo Lesa mbwaatuma kuli ndiwe! Liinji liinji ndalinga kusuni kubunganya bantu bako bweenka mbuli nkuku mboifukatila twaana twa njiyo mumapapaminwa, sombi webo wakakaka!

³⁵ Aboobo Ŋanda yakwe Lesa ili muli ndiwe, yaba litongo. Ntoomulwiita ayi teshi mukamboneewo alimwi kushikila mukaambe ayi, ‘Ulicite coolwe uyo utoosa muliina lya Mwaami Lesa.’ ”