Luka 12 - Baibo Busansulushi Bwa Libuku Ili

Jesu mbwaakacenjesha pakwaamba ncootaciti

¹ Paciindi ico, bantu bali shuulu shuulu ndibakabungana cakwaamba ayi bantu bakatalika kulyatana, Jesu wakataanguna kwaambila bashikwiiya bakwe ayi, “Amucenjele acimena ca baFalisi, nkokwaamba ayi kwaamba nshebataciti.

² Taaku cintu cifweketwe nceshi cikabule kufwekulwa, nabi cishisitwe ceshi cikabule kushibikwa.

³ Aboobo isho shoonse nshemwakaamba mumunshinshe shilaakunyumfwika lumwi lubala alimwi shoonse nshemwakatepetesha muntu mucipinda shilaakwaambilishikwa pameenso a bantu.

Weelete kuloondwa

⁴ “Ntoomulwiita nobeensuma ayi mutanoloonda baabo bacayabo mubili, sombi taaku cimwi nceenga bacita.

⁵ Ono ntoomutondesha wooyo ngomweelete kuloonda. Amuloonde Lesa uyo weenga amana kucaya mubili ulicite nkusu shakuuwaala mumulilo utamaani. Ee, ntoomwaambila ayi amumuloonde.

⁶ “Sa te tuntiinga tosanwe tuloolwa maali obilobo? Ono taaku nabi komwi ka ntuto Lesa nkaalubite.

⁷ Sombi mwebo amisusu ya mumitwi yanu yoonse ilibelengetwe. Paceebo ceeco mutaloondi mukwiinga mwebo mulayandika kwiinda tuntiinga tuunji.

Shakusumina akukaka Jesu

⁸ “Ntoomulwiita ayi uyo weenga wansumina pameenso a bantu, alakwe MwanaaMuntu ulaakumusumina pameenso a baanjelo bakwe Lesa.

⁹ Sombi uyo weenga wankaka pameenso a bantu, alakwe MwanaaMuntu ulaakumukaka pameenso a baanjelo bakwe Lesa.

¹⁰ Uyo woonse waamba maswi abiibi kuMwanaaMuntu inga walekelelwa, sombi uyo woonse ucobola Mushimu Usalashi, teshi akalekelelwe.

¹¹ “Baakumucata ayi bakamoomboloshe mushoonde sha baJuda, kubeendeleshi nabi kubaleli, mutakalisukami ayi mutooliimikanina buyani mukwaamba nabi nceshi mukaambe.

¹² Mukwiinga Mushimu Usalashi ulaakumwiisha paciindi ceenka ico nshemweelete kwaamba.”

Cikoshanyo ca mubile muluya

¹³ Umwi muntu wakalinga mulikoto wakaambila Jesu ayi, “NoBafundishi, amumwaambile nandumi yangu ampeeko buboni bwakashiya bata balobe.”

¹⁴ Sombi Jesu wakamukumbula ayi, “Webo ndaba, ino ngani waamba ayi nebo mbe moomboloshi pali ndimwe nabi shikwaabanya shintu shakamushiila ishiwanu mulobe.”

¹⁵ Lyalo Jesu wakaambila bantu abo ayi, “Amucenjele alimwi mulibaambe ayi mutabi bantu basunishi bubile. Ceebo buumi bwa muntu tabubete mukufula kwa buboni mbwaacite.”

¹⁶ Mpeeke Jesu wakabalwiita cikoshanyo ayi, “Umwi muntu mubile wakalinga kucite muunda umo mwakaswa shakulya shiinji.

¹⁷ Ndyaakabona boobo, wakatalika kuyeeya mumoyo ayi, ‘Ntoocita buyani butala nshicite mwakubika shakulya shangu shoonse ishi?’

¹⁸ Lyalo wakaamba ayi, ‘Mbulya mbweencite. Ntoomwaya matala angu akuyaka amwi anene mweshi nkabike shakulya shangu shoonse abuboni bwangu bumwi boonse.

¹⁹ Ono ndaakulyaambila ayi, Ulicite buboni buunji bweshi bukabule kumana kwamyaaka iinji. Aboobo liibe, kolya, konwa akusekana.’

²⁰ Sombi Lesa wakamwaambila ayi, ‘Webo omuluya! Sunu lyeenka mashiku utoofwa. Ino shintu shoonse ishi nshiwakalinga kubamba kushika cecino ciindi shitooba shakwe ni?’ ”

²¹ Mpeeke Jesu pakumanisha wakaamba ayi, “Mbweeke ubo mbocibete kubaabo balilundikila buboni, sombi tababiliteewo kuli Lesa.”

Shoma muli Lesa

²² Kuswawaawo Jesu wakaambila bashikwiiya bakwe ayi, “Paceebo ceeco ntoomwaambila ayi mutalisukami pabuumi bwanu ayi na ndaakulyanshi nabi mubili wanu ayi nkafwalenshi.

²³ Mutaciti boobo mukwiinga buumi bulayandika kwiinda shakulya awalo mubili ulayandika kwiinda shakufwala.

²⁴ Amuyeeye bacikwangala, tabashangi, tabatebuli, tabacite ŋanda shakusungilaamo shintu nabi matala. Sombi Lesa ulabasanina. Sa tamwishi kwaamba ayi mulayandika abuumbi kuli Lesa kwiinda bayuni?

²⁵ Ngani pali ndimwe weenga walinungilako buumi napaceyi kwiinda mukulisukama pashintu ishi?

²⁶ Ino ono na tamucikoonshi kucita kantu kaniini mbuli kaako, mulalisukaminanshi ashintu shimwi shoonse?

²⁷ Amuyeeye maluba a muluundu mbwaakula. Taasebensi nabi kutunga shakufwala, sombi ntoomulwiita ayi nabi Solomoni mububile bwakwe boonse, taakwe kubaawo ashakufwala shibotu shiboneka mbuli maluba ayo.

²⁸ Ono na Lesa ulafwalika boobo bwiisu ubo bucita sunu mpobuli, sombi ciilo bwapya, sa mwebo inga taamufwaliki kwiindaawo? Kuceya lushomo ndomucite mwebo nobantu!

²⁹ “Anu mutanoolisukama nabi kuyeeya bunene nceshi mulye nabi kunwa.

³⁰ Ishi nsheshintu bantu bakunsengwe shibayandoola, sombi Ishiwanu ulishi kwaamba ayi shoonse ishi mulishisuni.

³¹ Aboobo amuyandoole Bweene bwakwe Lesa, lyalo Lesa ulaakumupa shintu shoonse ishi.

Bubile bwa kwiculu

³² “Mwebo nolitanga liniini, mutaloondi mukwiinga Ishiwanu camukonda kumupa bwaami.

³³ Amuulishe buboni mbomucite, maali mupe bapengete. Amulilangweete mpotomona shitabooli alimwi amubike buboni bwanu kwiculu nkweshi bukabule kuceya mukwiinga taaku beepi beenga bashikaako atubambala tatukoonshi kubunyonyoola.

³⁴ Amucite boobo mukwiinga myoyo yanu ilaba kweenka uko kuli bubile bwanu.

Basebenshi balibambite

³⁵ “Kamulibambite kusebensa alimwi malampi anu kaanyaka lyoonse.

³⁶ Amube mbuli basebenshi batoolindilila mwaami wabo utooswa kubwiinga kwaamba ayi apo poonse mpweshi ashite akukonkoonsha, beendililebo kumucalwita.

³⁷ Balicite coolwe basebenshi beshi bakacanike kabalangila alimwi kabalibambite mwaami wabo aakuboola. Ntoomwaambila calushinisho ayi mwaami wabo ulaakufwala shakufwala shakusebenselaamo, kwikalika basebenshi aba panshi akubapa shakulya.

³⁸ Balicite coolwe basebenshi abo mbweshi akacane balilibambite, nakubi kwaamba ayi wesa pakati ka mashiku nabi kumuyamaca.

³⁹ Sombi amunyumfwishe cikani ici. Naakwiinga mwine ŋanda keeshi ciindi mwiipi ndyeshi ese, inga taalekibo mwiipi ayi enjile muŋanda yakwe.

⁴⁰ Amwebo mbweeke ubo, amwikale kamulibambite mukwiinga MwanaaMuntu ulaakwisa paciindi ncemutamwingashite.”

Musebenshi ushomeka autashomeki

⁴¹ Mpeeke Pita wakeepusha ayi, “Nkambo, sa ici cikoshanyo mutoolwiitabo ndiswe sweenka, na abantu boonse?”

⁴² Mwaami Jesu wakakumbula ayi, “Ino nguli musebenshi ushomeka ucite maano? Ngooyo mwaami wakwe ngwaakapa mulimo wakweendelesha ŋanda yakwe akunoopa babye cakulya paciindi ceelete.

⁴³ Ulicite coolwe musebenshi uyo mwaami wakwe ngweshi akacane kaasebensa boobo, aakuboola.

⁴⁴ Ntoomulwiita calushinisho ayi mwaami wakwe ulaakumupa mulimo wakulama shintu shoonse nshaacite.

⁴⁵ Ono na musebenshi uyo waamba mumoyo wakwe ayi, ‘Mwaami wangu wacelwa kwisa,’ lyalo watalika kuuma basebenshinyina basankwa abanakashi alimwi akutalika kulya, kunwa akukolwa.

⁴⁶ Mwaami wa musebenshi uyo ulaakwisa pabushiku mbwaatengashite aciindi ncaateshi. Ulaakumupa mulandu akumuwaala kooko nkweshi kukanooli batashomeki.

⁴⁷ “Musebenshi uyo ushi mwaami wakwe mbwaayanda, sombi taalibambili nabi kucita buyanda mwaami wakwe, ulaakuumwa cankusu.

⁴⁸ Sombi musebenshi uteshi ciyanda mwaami wakwe na wabisha cakuteshiba uloomwabo paniini. Uyo woonse upekwa shiinji ulayandika kuboosha shiinji. Uyo eenka wakapekwa shiinji ulyeelete kuboosha shiinji peculu lya sheesho nshaakapekwa.

Bantu balaakupansaana ceebo cakwe Jesu

⁴⁹ “Ndakesa mukuwaala mulilo mucishi. Ndalinga kusuni kwaamba ayi mulilo uyu naakwiinga koonyaka kale!

⁵⁰ Sombi ndyeelete kubombekwa mumapensho aanji, aboobo moyo wangu uli mubuumba kushikila mapensho aya akamaane!

⁵¹ Sa mulayeeya ayi ndakesa mukuleta luumuno mucishi ca panshi? Ndakaleta kupansaana.

⁵² Kuswa sunu bali bosanwe muŋanda balaakubukilana, botatwe balaakubukila bobilo abalo bali bobilo balaakubukila bali botatwe.

⁵³ Baishi balaakubukila mwaana musankwa, alakwe mwaana musankwa ulaakubukila baishi, banyina balaakubukila mwaana mwanakashi, alakwe mwaana mwanakashi ulaakubukila banyina. Bapongoshi banakashi balaakubukila mulokashi, alakwe mulokashi ulaakubukila bapongoshi bakwe banakashi.”

Shakwishiba ciindi

⁵⁴ Jesu wakaambila bantu boonse abo alimwi ayi, “Na mwaboona likumbi lyanyamuka kuswa kumbo, lyalo mulaamba ayi, ‘Mfuula itooloka sunu,’ ncakwiila ilaloka.

⁵⁵ Na muuwo watalika kupuupa kuswa kumalenge mulaamba ayi, ‘Sunu kutoopya ciine,’ alimwi kulaba mbweeke ubo.

⁵⁶ Mwebo nobantu nomwaamba nshemutaciti! Mulishi kusansulula mbociboneka cishi akwiculu. Ono cilaala buyani kwishiba shitoocitika munshiku shino?

Kunyumfwana ashimulandunyoko

⁵⁷ “Ino nceebonshi ncemutasalili ciluleme nobeene?

⁵⁸ Na utooya kunkuta ashimulandunyoko ulyeelete kufwambaana kunyumfwanaakwe kamuciya kunkuta. Ulyeelete kucita boobo mukwiinga inga wakutola kumoomboloshi, alakwe moomboloshi wakutol kumushilikani, alakwe mushilikani inga wakubika muntolongo.

⁵⁹ Ntoomulwiita calushinisho ayi teshi ukasweemo umo kushikila ukalipile shoonse shiyandika.”