Kulumbaisha 99 - Baibo Busansulushi Bwa Libuku Ili

Lesa ngomwaami wiindaawo pabamaami boonse

¹ Mwaami Lesa ulalela, bamumishobo yoonse abatutume. Ulishiite pakati ka bakelebu, cishi ca panshi acitenkaane.

² Mwaami Lesa ulicite nkusu muSiyoni. Ncakwiila ulasumpulwa pamishobo yoonse.

³ Bantu boonse balaakulumbaisha liina lyakwe lyankusu alimwi liyoosha. Lakwe ulisalalite!

⁴ Mwaami Shinkusu shoonse, ulisuni shiluleme. Lakwe walengesha ayi koombolosha kululeme kube muIsilaeli, ee, muIsilaeli mwaleta bululami akoombolosha cakutanyengelela.

⁵ Aalumbaishikwe Mwaami Lesa, Lesa wesu, amumulambile kunembo lya cuuna cakwe ca bwaami! Lakwe ulisalalite!

⁶ Mose aAloni bakalinga bapailishi bakwe Lesa bamwi, Samwelo alakwe wakalinga pakati ka baabo bakalinga kupaila kuli nguwe. Aba bantu bakalinga kulilila kuMwaami Lesa alakwe wakalinga kubakumbula.

⁷ Wakaambila bene Isilaeli kuswa mulicincilo lya likumbi, alimwi bakakonkela milawo amilasho iyo yoonse njaakabapa.

⁸ NoBaami baLesa, baLesa besu mwakakumbula bantu banu. Mwakabatondesha ayi muli baLesa balekelela shibiibi, nakubi kwaamba ayi mwakalinga kubapa mulandu pashibiibi shabo.

⁹ Aalumbaishikwe Mwaami Lesa, Lesa wesu, atumulambile pakalundu kakwe kasalalite! Mwaami Lesa, Lesa wesu ulisalalite!