Kulumbaisha 98 - Baibo Busansulushi Bwa Libuku IliLesa ngomuleli wa cishi ca panshi coonse Lwiimbo. 1 Amwiimbile Mwaami Lesa lwiimbo lupya, mukwiinga wakacita shintu shikankamika. Lyaansa lyakwe lyalulyo, ee, mukono wakwe usalalite wamulengesha kukoma. 2 Mwaami Lesa wapukisha lupulusho lwakwe, akuyubulula bululami bwakwe kumishobo yoonse. 3 Wakalama cipangano cakwe kubene Isilaeli. Wakashomeka akutondesha lusuno lwakwe lutamaani kuli mbabo. Lupulusho lwakwe Lesa wesu, bantu boonse mucishi coonse balubona. 4 Amoolobeshe cakusangalala kuMwaami Lesa nobamucishi ca panshi! Amumulumbaishe akumwiimbila cakukondwa! 5 Amwiimbe nyimbo shakulumbaisha Mwaami Lesa! Amumulumbaishe mukulisha tulumbu! 6 Amulishe mapeenga ameeca a mbelele shisankwa, moolobeshe cakusangalala kuMwaami Lesa utulela! 7 Lweenge aluwoote pantu pomwi ashintu shoonse shiliimo! Cishi ca panshi aciimbe pantu pomwi aboonse bekala muli ncico. 8 Maaba a mumulonga aaumane mukulumbaisha Lesa, tulundu atwalo atwiimbe pantu pomwi cakusangalala 9 mukwiinga Mwaami Lesa ulaakwisa mukulela cishi. Ulaakunoolela bamucishi ca panshi boonse cabululami alimwi mulushinisho. |
Lenje Bible with Deuterocanon © Bible Society of Zambia, 2003.
Bible Society of Zambia