Kulumbaisha 97 - Baibo Busansulushi Bwa Libuku Ili

Lesa ngumuleli wiindaawo

¹ Mwaami Lesa ngoolela, aboobo nobamucishi ca panshi amukondwe. Amwebo nomwikala pansumbu sha palweenge amusangalale.

² Makumbi amunshinshe ushiya mbi shilimushingulukite. Bululami akoombolosha kwakutanyengelela shili anga ndwiimbi lwa cuuna ca bwaami bwanu.

³ Mulilo uleendela kunembo lyakwe. Ulaya citenta balwani bakwe mumbasu shoonse.

⁴ Kubeka kwa mfula kulamunikila cishi ca panshi, abalo bamucishi ca panshi balakubona akututuma.

⁵ Tulundu tulasunguluka anga mbukato kunembo lya Mwaami Lesa, ee, kunembo lya Muleli wa cishi coonse ca panshi.

⁶ Liculu lyomwi alyomwi lilaambilisha bululami bwakwe. Mishobo yoonse ilabona bulemu bwakwe.

⁷ Abo boonse balambila shibumbwabumbwa balalenshekwa nsoni, ee, abo boonse balyuuma mucaamba ceebo ca shibumbwabumbwa. Abalo balesa balafukama kunembo lya Mwaami Lesa mukumulambila.

⁸ Bantu ba muSiyoni balanyumfwa akusangalala, aalo mandabala a muJuda alakondwa mukwiinga wakoombolosha kwanu noBaami baLesa.

⁹ NobaLesa ba kwiculu Beendaawo, mwebo ndimwe mulela cishi coonse ca panshi. Ndimwe musumpulwa kwiinda baLesa boonse.

¹⁰ Abo basuni Mwaami Lesa abapate bubi, mukwiinga ulalama buumi bwa baabo bashomeka kuli nguwe. Ulabafuna kuswa kunkusu sha bamucita shibi.

¹¹ Mumuni ulamunikila pabantu baluleme. Kusangalala kulapekwa kubasalalite mumyoyo.

¹² Amusangalale muMwaami Lesa mwebo nomululeme! Amulumbaishe liina lyakwe lisalalite!